సేవ, ఆధ్యాత్మికతలు మూర్తీభవించిన అమ్మ మాతా అమృతానందమయి జీకి నేను సాదర నమస్సులు అర్పిస్తున్నాను. అమ్మ డెబ్భయ్యో పుట్టినరోజు సందర్భంగా, దీర్ఘాయుష్షుతో పాటు ఆరోగ్యవంతమైన జీవనం అమ్మకు కలగాలని నేను ఆకాంక్షిస్తున్నాను. ప్రపంచం నలు మూలలా ప్రేమనూ, కరుణనూ వ్యాపింపచేయాలన్న ఆమె ఉద్యమం నిరంతరం మునుముందుకు సాగిపోతూ ఉండాలని నేను ప్రార్థిస్తున్నాను. అమ్మ అనుయాయులతో పాటు వేర్వేరు రంగాల నుంచి ఇక్కడకు తరలివచ్చిన వారందరికీ నేను అభినందనల్నీ, శుభాకాంక్షల్నీ తెలియజేస్తున్నాను.
మిత్రులారా,
అమ్మతో 30 సంవత్సరాలకు పైగా నాకు ప్రత్యక్ష అనుబంధం ఉంది. కచ్ఛ్‌లో భూకంపం వచ్చిన తరువాత, అమ్మతో కలసి దీర్ఘకాలం పనిచేసే అవకాశం నాకు దక్కింది. అమృతపురిలో అమ్మ 60వ జన్మదినాన్ని జరుపుకొన్న రోజు నాకు ఇప్పటికీ జ్ఞ‌ాపకముంది. ఈ రోజు నిర్వహిస్తున్న కార్యక్రమానికి నేను స్వయంగా హాజరై ఉండి ఉంటే, ఆనందంతో ఉబ్బితబ్బిబ్బు అయ్యుండే వాణ్ని. ఈ రోజుకు కూడా, అమ్మ చిరునవ్వు మోము, ఆప్యాయత పొంగిపొరలే ఆమె స్వభావం ఇదివరకటిలా చెక్కుచెదరకుండా ఉన్నాయి. పైపెచ్చు, గడచిన పది సంవత్సరాల్లో, అమ్మ చేస్తున్న కార్యక్రమాలూ, ప్రపంచంపై అవి ప్రసరిస్తున్న ప్రభావమూ అనేక రెట్లు విస్తరించాయి. కిందటి సంవత్సరం ఆగస్టులో, హర్యానాలోని ఫరీదాబాద్‌లో అమృత ఆసుపత్రిని ప్రారంభించే భాగ్యం నాకు లభించింది. అమ్మ హాజరీ, ఆమె ఆశీస్సుల కాంతి మండల ప్రభావాన్ని మాటల్లో చెప్పలేం.. కేవలం అనుభూతించగలుగుతామంతే. నాకు గుర్తుంది.. ఆ రోజు నేను అమ్మతో చెప్పిన మాటల్ని ఇవాళ మళ్లీ చెబుతున్నా.. స్నేహ-త్తిండే, కారుణ్య-త్తిండే, సేవన్-త్తిండే, త్యాగ-త్తిండే, పర్యాయమాణ అమ్మ. మాతా అమృతానందబయి దేవి, భార-త్తిండే మహత్తాయ, ఆధ్యాత్మిక పారంపర్య-త్తిండే, నేరవ-కాశియాణ.. అని. ఈ మాటలకు- ప్రేమ, కరుణ, సేవ, త్యాగం.. వీటికి ప్రతీక అమ్మ- అని అర్థం. భారత ఆధ్యాత్మిక సంప్రదాయానికి ఆమె వాహికగా కూడా ఉన్నారు.
మిత్రులారా,
అమ్మ చేస్తున్న కార్యాల్లో ఒక కోణాన్ని పరిశీలిస్తే ఆమె.. దేశ విదేశాల్లో సంస్థల్ని స్థాపించారు. వాటిని  ప్రోత్సహించారు. ఆరోగ్య రంగం కావొచ్చు లేదా విద్య రంగం కావొచ్చు.. అమ్మ మార్గదర్శకత్వంలో ఏర్పాటైన ప్రతి సంస్థా మానవులకు సేవ చేయడాన్నీ, సమాజ సంక్షేమానికి పాటుపడడాన్నీ కొత్త శిఖర స్థాయులకు చేర్చింది. దేశం స్వచ్ఛత ఉద్యమాన్ని మొదలుపెట్టినప్పుడు, ఆ ఉద్యమాన్ని విజయవంతం చేయడానికి మొదటగా ముందుకు వచ్చిన వ్యక్తుల్లో అమ్మ ఒకరుగా నిలిచారు. గంగానది తీరంలో స్నానాలకు గదులను నిర్మించడానికి రూ.100 కోట్లు ఆమె విరాళంగా ఇచ్చారు. దీంతో స్వచ్ఛతకు ఒక కొత్త శక్తి సమకూరింది. అమ్మకు ప్రపంచవ్యాప్తంగా అనుయాయులున్నారు.. వారు కూడా భారత్ పేరుప్రతిష్ఠల్నీ, దేశ విశ్వసనీయతనీ పెంపొందింపచేశారు. ఇంత గొప్ప స్ఫూర్తి లభించిందంటే, మరి  ప్రయత్నాలు కూడాను పెద్దవి అయిపోతాయి.    
మిత్రులారా,
మహమ్మారి తరువాతి కాలపు ప్రపంచంలో,  అభివృద్ధి విషయంలో ప్రస్తుతం మానవతకు పెద్దపీట వేస్తూ భారత్ అనుసరిస్తున్న విధానం సర్వత్ర ఆమోదయోగ్యతను సంతరించుకుంది. ఈ దశలో, అమ్మ వంటి మహనీయ వ్యక్తులు భారత్ అవలంబిస్తున్న మానవీయ ప్రధాన విధానానికి ప్రతిబింబంగా ఉంటున్నారు. అశక్తుల్ని సశక్తులుగా చేయడం, ఆదరణకు నోచుకోని వర్గాలకు పెద్దపీట వేయడమనే మానవీయ యజ్ఞాన్ని అమ్మ సర్వ కాలాల్లో నిర్వహిస్తున్నారు. కొద్ది రోజుల కిందట.. నారీశక్తి వందన్ అధినియాన్ని.. భారత పార్లమెంటులో ఆమోదించారు. మహిళల మార్గదర్శకత్వంలో అభివృద్ధిని సాధించాలన్న సంకల్పంతో ముందుకుపోతున్నభారత్‌కు అమ్మ వంటి స్ఫూర్తి మూర్తి లభించారు. ప్రపంచంలో శాంతినీ, ప్రగతినీ ప్రోత్సహించడానికి అమ్మ అనుయాయులంతా ఇలాంటి పనులు కొనసాగిస్తారని నేను నమ్ముతున్నాను. మరో సారి, అమ్మకు ఆమె 70వ జన్మదినాన్ని పురస్కరించుకొని శుభాకాంక్షలు తెలియజేస్తున్నాను. ఆమెకు దీర్ఘాయుష్షు కలుగుగాక.. ఆమె ఆరోగ్యంగా ఉండుగాక.. ఆమె ఇదే విధంగా మానవాళికి సేవలను అందించుగాక.. మరి మా అందరిపై మీరు ఇలాగే మీ వాత్సల్యాన్ని వర్షిస్తూ ఉండాలని ఆకాంక్షిస్తూ నేను నా ప్రసంగాన్ని ముగిస్తున్నాను. మరో సారి అమ్మకు నేను ప్రణామం చేస్తున్నాను.
గమనిక: ఇది ప్రధానమంత్రి ఉపన్యాసానికి అనువాదం. ప్రధాని హిందీలో మాట్లాడారు.

***