नवी दिल्ली, 25 नोव्हेंबर 2025

"सूर्यकिरण XIX - 2025" या संयुक्त लष्करी सरावाची 19 वी आवृत्ती आज उत्तराखंडमधील पिथोरागड येथे सुरू झाली. हा सराव 25 नोव्हेंबर ते 8 डिसेंबर 2025 दरम्यान आयोजित केला जात आहे.

भारतीय तुकडीत 334 जवानांचा समावेश आहे, ज्यामध्ये प्रामुख्याने आसाम रेजिमेंटच्या जवानांचा सहभाग आहे. नेपाळच्या तुकडीतही 334 जवान सहभागी आहेत, ज्यात प्रामुख्याने देवी दत्ता रेजिमेंटचे जवान सहभागी आहेत.

या सरावाचे उद्दिष्ट संयुक्त राष्ट्रांच्या आदेशाच्या सातव्या अध्यायांतर्गत उप-परंपरागत कारवायांचा संयुक्तपणे सराव करणे आहे, हा आहे. या सरावाची व्याप्ती जंगल युद्ध, पर्वतीय प्रदेशात दहशतवादविरोधी कारवाया, मानवतावादी सहाय्य आणि आपत्ती निवारण (HADR), वैद्यकीय प्रतिसाद, पर्यावरण संवर्धन तसेच एकात्मिक भू-हवाई मोहीमांमध्ये बटालियन-स्तरीय समन्वय बळकट करणे अशी आहे.

सूर्यकिरण-XIX सरावाच्या या आवृत्तीत मानवरहित हवाई प्रणाली (UAS), ड्रोन-आधारित ISR, कृत्रिम बुद्धिमत्ता-सक्षम निर्णय सहाय्यक साधने, मानवरहित लॉजिस्टिक वाहने आणि चिलखती संरक्षण प्लॅटफॉर्म यासारख्या विशिष्ट आणि उदयोन्मुख तंत्रज्ञानाचा समावेश करण्यावर लक्ष केंद्रित केले जाईल. यामुळे दोन्ही सैन्य दलांना प्रचलित जागतिक गतिमानतेनुसार दहशतवादविरोधी मोहीमा चालवण्यासाठी रणनीती, तंत्रे आणि प्रक्रिया सुधारण्यास आणि जुळवून घेण्यास मदत होईल.

संयुक्त प्रयत्नांचा उद्देश शांतता स्थापन करण्याच्या कार्यादरम्यान संयुक्त राष्ट्रांच्या हितांना आणि अजेंड्याला अग्रक्रम देत दोन्ही देशातील सैन्यदलांमधील कार्य पातळीची परस्परसंवादक्षमता वाढवण्यावर तसेच जीवित आणि मालमत्तेवरील जोखीम कमी करणे हा आहे.

दोन्ही बाजू विविध युद्ध कौशल्यांवरील संयुक्त सरावाबाबत अनुभव आणि पद्धतींची देवाणघेवाण करतील, यामुळे सहभागी दलांना एकमेकांकडून शिकण्याची संधी मिळेल. सर्वोत्तम पद्धतींच्या आदानप्रदानामुळे भारतीय सेना आणि नेपाळ सेना यांच्यातील संरक्षण सहकार्याची पातळी आणखी बळकट होईल. या सरावामुळे दोन्ही शेजारी राष्ट्रांमधील दृढ द्विपक्षीय संबंधांना देखील चालना मिळेल.

आशिष सांगळे / श्रद्धा मुखेडकर /प्रिती मालंडकर

 

 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

 

 

 

(Release ID: 2194283) Visitor Counter : 13