Ka Employees’ State Insurance Corporation (ESIC) ka la plie paidbah ia artylli ki sienjam ba kongsan - ka Scheme for Promoting Registration of Employers and Employees (SPREE 2025) bad ka Amnesty Scheme 2025 - ha ka prokram ba la pynlong ha Shillong Club mynta ka sngi. Ki artylli ki sienjam ki thmu ban pynkhlain ia ka rukom treikam na ka bynta ka imlang sahlang kaba shngain ha ka thain shatei lammihngi bad ban kyntiew ia ka jingsuk ia ki nongai kam ba kin bud ia ki kyndon bad ai ki jingmyntoi ia ki nongtrei ha ki kam bapher bapher.

Ka SPREE 2025, kaba treikam naduh ka 1tarik Naitung haduh ka 31tarik Nohprah 2025, ka plie lad shisien ia ki nongpyntreikam bad ki nongtrei ki bym pat pynrung kyrteng hapoh ka ESI khlem da don ka jingdain kuna ne ki jingsiew na ka bynta ki por ba la leit. Ka pynsuk ia ka jingpynrung kyrteng lyngba ki rynsan online, ka pynshlur ia ka jingbud ryntih da ka mon sngewbha bad ka thmu ban pyniar ia ka jingiada ha ka imlang sahlang bad ka lad ioh jingsumar na ka bynta ki nongtrei jong ka Meghalaya.

Ka Amnesty Scheme 2025, kaba treikam naduh ka 1 tarik u Risaw 2025 haduh ka 30 tarik u Nailur 2026, ka ailad ïa ki nongpynïaid kam bad ki briew kiba la ïoh insurance ïa ka lad ban pynbeit ïa ki jingïakynad kiba dang sahteng bad ban pynbeit ïa ki jingsiew bym pat siew haduh ka 31 tarik u Lber 2025. Ka thmu ban pynduna ia ki jingshah mudui, ban kyntiew ia ka jingshaniah bad ban pynthikna ia ka jingbud ryntih da kaba ailad ia ki jingpynbeit shabar ka iingbishar bad ban pyllait ia ki jingdain kuna ynda la siew ia ka jingsiew ba dei ban ai.

Ban ioh ia ka Amnesty Scheme, ki nongaplai kiba dei hok ki dei ban pynpoi ia ka phorm ESIC ba la buh, ban ai ia ki jingtip ba donkam bad ban siew ia ki jingsiew kiba dang sahteng ryngkat bad ka sut. Hadien ba la mynjur da u Regional Director lane ka komiti ba la jied, yn niew ia ki jingiakajia kum kaba la pynbeit, kaba iarap ia ki nongpyntreikam bad ki briew kiba la ioh insurance ban pynbeit ia ka jingbud ryntih jong ki katkum ka ESI Act.

Ia ka Dependent Benefit Sanction Memo la ai sha ka Sengmek Marak, lok jong u Pinik A. Sangma (Bam kwai ha dwar u Blei), ha kaba la pynbiang ka bai bam tymmen kaba T 13,578 na ka bynta jong ka bad ki khun jong ka.

Haba ai jingkren ha kane ka sngi, u C. Songate, Principal Secretary ka tnad Labour, Sorkar Meghalaya u la ong, “Ka long kaba kongsan ban wanrah ïa baroh ki nongtrei kiba dei hok ban ïoh hapoh ka jingïada jong ka ESIC ban pynthikna ïa ka bha ka miat jong ki bad ka jingïada ha ka imlang sahlang.  Ka Sorkar Jylla ka kyrshan pura ïa kane ka jingthmu bad ka la ai ka jingmynjur ha ka nongrim ban buh ïa ka ESIC Hospital kaba don 100 jingthiah ha nongbah Shillong.” U la pynskhem biang ba ka Sorkar kan pyniar ïa baroh ki jingïatreilang ha kaba pyniar ïa ki jingmyntoi jong ka ESIC sha man la ki district jong ka Jylla.

U Pranay Sinha, Insurance Commissioner, North-East and Eastern Zone bad u Robert L. Guite, Regional Director, ESIC North Eastern Region, ki la pynpaw ba ki sienjam kin pynkhlain ia ka jingbud ryntih, pynbeit ia ki jingiakynad kiba la sahteng, pynduna ia ki jingshah mudui bad pyniar ia ka jingpynbiang ka jingshngain ia ka imlang sahlang na ka bynta ka jingmyntoi jong ki nongpyntreikam bad kumjuh ruh ki nongtrei.

****

(Release ID: 2189837) visitor counter : 27