دہلی میں دودھ اور ڈیری مصنوعات کا استعمال بڑی مقدار میں ہوتا ہے۔ میٹرو شہر میں مدر ڈیری اور امول جیسی کوآپریٹو ڈیریوں کے وسیع تقسیم نیٹ ورک کے ذریعے روزانہ ان مصنوعات کی فراہمی کی جاتی ہے۔ پٹپڑ گنج میں واقع مدر ڈیری پلانٹ کی طرح دہلی کے دودھ پروسیسنگ پلانٹس میں کام کرنے والے مزدور، ڈلیوری ایجنٹ اور محلوں کے بازاروں میں مقامی دکاندار سبھی ہزاروں کی تعداد میں اس شعبے سے روزگار حاصل کر رہے ہیں۔

حکومت نے متعدد ڈیری مصنوعات پر جی ایس ٹی ختم کر کے ان اشیاء کی قیمتوں میں براہِ راست کمی کی ہے۔ مثال کے طور پر، پہلے 200 گرام پنیر کا پیک  90 روپے کا تھا، لیکن 0 فیصد جی ایس ٹی کے بعد اس کی قیمت گھٹ کر 85.7 ر وپے رہ گئی ہے۔ اسی طرح، نسبتاً دیر تک خراب نہ ہونے والا یو ایچ ٹی دودھ جو شہری صارفین میں خاصا مقبول ہے اب مزید سستا ہو گیا ہے۔ گھی اور مکھن جیسی روزمرہ گھریلو استعمال کی اشیاء پر بھی جی ایس ٹی کی شرح 12 فیصد سے گھٹا کر 5 فیصد کر دی گئی ہے، جس سے یہ مصنوعات عام صارف کے لیے زیادہ سستی ہو گئی ہیں۔ اس طرح روزمرہ استعمال کے خوراکی اجناس کی قیمتوں میں کمی سے براہِ راست کھپت میں اضافہ ہوگا۔

پنیر جیسے پروٹین سے بھرپور غذائی اجناس کے سستے ہونے سے ان کے استعمال میں اضافے کا امکان ہے، جو غذائی معیار کو بہتر بنائے گا اور طویل مدت میں صحت کے لیے مفید ثابت ہوگا۔

ڈیری مصنوعات کی بڑھتی ہوئی مانگ سے دہلی میں سرگرم ڈیری کمپنیوں اور کوآپریٹو اداروں کو بھی فائدہ ہوگا، جبکہ فروخت میں اضافے کا نفع بالآخر دودھ پیدا کرنے والے کسانوں تک پہنچے گا، جس سے ان کی آمدنی اور روزی میں اضافہ ہوگا۔

دہلی بیمہ کمپنیوں کے لیے بھی ایک بہت بڑی منڈی ہے، کیونکہ یہاں کے متوسط اور تنخواہ دار طبقے کے زیادہ تر افراد اپنی فیملی کے لیے بیمہ پالیسی خریدتے ہیں۔ مالی سال 2025 میں بھارت کی بیمہ کمپنیوں نے مجموعی طور پر تقریباً 7.05 لاکھ کروڑ روپے بیمہ پریمیم کے طور پر حاصل کیے۔ اسی دوران، اسی مالی سال میں بیمہ صنعت نے ملک بھر میں 11 لاکھ نئے بیمہ ایجنٹ اپنے نیٹ ورک میں شامل کیے۔کناٹ پلیس اور نہرو پلیس میں بیمہ کمپنیوں کے مرکزی دفاتر (ہیڈکوارٹرز) اور شاخوں کے ساتھ دہلی ایک اہم مالیاتی مرکز ہے، جو اس صنعت سے وابستہ بڑی تعداد میں افراد کو روزگار کے مواقع فراہم کرتا ہے۔

صحت اور زندگی کے بیمہ پریمیم پر 18 فیصد جی ایس ٹی کی منسوخی گھریلو صارفین کے لیے ایک براہِ راست اور خاطر خواہ مالی ریلیف ہے۔ اب بیمہ پریمیم میں ادا کی جانے والی ہر رقم براہِ راست بیمہ کوریج میں سرمایہ کاری کے طور پر استعمال ہوگی، نہ کہ ٹیکس کی ادائیگی میں۔ اس تبدیلی کے نتیجے میں وہ خاندان جو سالانہ  1,00,000 روپے بیمہ پریمیم ادا کرتے ہیں، انہیں اب ہر سال 18,000 روپے کی  بچت ہوگی۔اگر فیملی اس بچت شدہ رقم کو کھپت یا سرمایہ کاری میں لگاتے ہیں تو یہ بالآخر معیشت کے لیے مددگار ثابت ہوگی۔ طویل مدت میں، دہلی کے شہریوں کو بیمہ کے زیادہ کوریج حاصل ہونے سے ان کی مالی سلامتی اور استحکام میں مزید اضافہ ہوگا۔

مزید برآں، بیمہ کا شعبہ ایجنٹوں، انڈر رائٹروں اور انتظامی عملے پر مشتمل ایک بڑی سفید پوش افرادی قوت کو روزگار فراہم کرتا ہے۔ چنانچہ بیمہ پالیسیوں کی مانگ میں اضافے سے فروخت میں اضافہ ہوگا، جس کے نتیجے میں دہلی کی مالیاتی خدمات کے دائرے میں روزگار کے کئی نئے مواقع پیدا ہوں گے۔

جوتے، فرنیچر، خوبصورتی اور صحت بخش خدمات، نیز پرنٹنگ اور پیپر پیکیجنگ جیسے تمام شعبے دہلی کی صارف ٹوکری کا حصہ ہیں اور اس کے ایم ایس ایم ای انجن کو تقویت دیتے ہیں۔ سستے جوتوں، تیار چمڑے، فرنیچر، پرنٹنگ اور اسٹیشنری اشیاء پر جی ایس ٹی میں کمی سے ان کی آخری قیمتیں کم ہوں گی جس سے چھوٹے تاجروں پر کام کے لیے زیادہ سرمایہ جمع کرنے کا دباؤ کم ہوگا۔

جوتے اور تیار شدہ چمڑے کی مصنوعات

دہلی میں کرول باغ، صدر بازار، نرائنااور اوکھلا جیسے علاقے جوتے، سینڈل اور چپل کی فروخت کے بڑے مراکز ہیں۔ یہ تھوک فروخت اور چھوٹے پیمانے پر پیداوار کو فروغ دیتے ہیں۔ اس شعبے میں ہاتھ سے کام کرنے والے کاریگر اور مزدور کی بڑی تعداد کی مانگ کی وجہ سے کمزور طبقے کے کئی افراد کو روزگار ملتا ہے، جن میں سے 40 فیصد خواتین مزدور ہیں۔ قومی سطح پر اس صنعت میں 40.42 لاکھ افراد کام کرتے ہیں، جبکہ دہلی میں ان کے کاروبار اور فینشنگ کا مرکزی مرکز موجود ہے۔

جوتے اور تیار شدہ چمڑے پر جی ایس ٹی کی شرح کو 12 فیصد سے کم کر کے 5 فیصد کرنے سے بیگوں، بیلٹوں اور دیگر لوازمات کے صنعت کاروں کے لیے خام مال کی لاگت میں براہِ راست کمی ہوئی ہے، جس سے ان کی مسابقتی صلاحیت میں اضافہ ہوا ہے۔ اس کے نتیجے میں صارفین کی مانگ میں بھی اضافہ متوقع ہے۔ مثال کے طور پر، 2,000 روپے کی قیمت کے جوتوں پر اب صرف 100 روپے (5فیصد شرح کے مطابق) جی ایس ٹی لاگو ہوگا، جس سے صارف کے لیے مصنوعات تقریباً 6.25 فیصد سستی ہو گئی ہیں۔

فرنیچر

بانس،گنے اور رتن سے تیار شدہ فرنیچر پر جی ایس ٹی کی شرح اب صرف 5 فیصد ہے۔ اس سے گھروں کے لیے سستے فرنیچر کی خریداری آسان ہو گئی ہے اور کاریگروں اور خوردہ فروخت کنندگان کے لیے تیار شدہ سامان کی طلب میں استحکام بھی یقینی بنایا جا رہا ہے۔ فرنیچر کے شعبے میں دہلی بھر میں پھیلے رسمی شوروم اور غیر رسمی ورکشاپوں میں ہزاروں افراد کام کر رہے ہیں۔ اس کے اہم بازار کیرتی نگر اور پنچکویان روڈ ہیں۔

فرنیچر کی قیمتوں میں کمی کے نتیجے میں اس کی مانگ میں اضافہ یقینی ہے، جس سے روایتی دستکاری یونٹوں کو مسلسل کام ملے گا۔ یہ اقدام سستے اور روایتی ہنر کو فروغ دے رہا ہے، جو ماحولیاتی اور ثقافتی ترقی کے مقاصد کے مطابق ہے۔

خوبصورتی اور صحت افزا خدمات

خوبصورتی اور صحت افزا خدمات پر جی ایس ٹی کی شرح بھی 18 فیصد (آئی ٹی سی سمیت) سے کم کر کے 5 فیصد (بغیر آئی ٹی سی) کر دی گئی ہے۔ اس سے صارفین کے لیے ان خدمات کی لاگت میں براہِ راست کمی ہوئی ہے۔ اس سے ایک ایسی صنعت کو مدد ملے گی جو زیادہ تر خواتین پر  مشتمل ہے۔ بیوٹیشین، تھیراپسٹ اور معاون عملہ ایم ایس ایم ای پالیسی کے تحت آتے ہیں۔ قیمتوں میں کمی کے نتیجے میں آس پاس کے سيلونوں اور آزاد کاروباریوں کے پاس صارفین کی آمد بڑھے گی اور ان کے لیے مستحکم آمدنی کے مواقع بھی بڑھ جائیں گے۔

پرنٹنگ، پیکیجنگ اور اسٹیشنری

کاپیاں، ایکسرسائز بکس اور پنسل اب جی ایس ٹی کے بوجھ سے آزاد ہیں، یعنی ان پر جی ایس ٹی 0 فیصد ہو گیا ہے، جس سے اہل خانہ پر اسکول کے اخراجات کا بوجھ کم ہوگا اور اسٹیشنری مارکیٹ میں مسلسل خوردہ فروخت میں مدد ملے گی۔

کارٹنوں اور بکسوں  پر جی ایس ٹی کی شرح 12 فیصد سے کم کر کے 5 فیصد کر دی گئی ہے، جس سے چھوٹے صنعت کاروں اور آن لائن فروخت کنندگان کے لیے پیکیجنگ کی لاگت میں خاطر خواہ کمی آئے گی۔ اسی طرح پرنٹنگ جاب ورک پر جی ایس ٹی کی شرح بھی 12 فیصد سے کم کر کے 5 فیصد کی گئی ہے، جس سے منظم پرنٹرز کی دکانیں زیادہ مسابقتی ہو گئی ہیں۔

نتیجہ

حالیہ جی ایس ٹی اصلاحات دہلی کی معیشت کو متعدد شعبوں میں فروغ دینے کا موقع فراہم کرتی ہیں۔ اہم صارف اشیاء اور ضروری تجارتی اجزاء پر توجہ مرکوز کرنے سے بڑے اثرات میں شامل ہیں ۔جیسے گھریلو اخراجات میں براہِ راست ریلیف فراہم کرنا اور کاروباروں و تاجروں، خاص طور پر ایم ایس ایم ای شعبے کو، کم لاگت اور بہتر مسابقت سے فائدہ پہنچانا۔

چنانچہ، یہ شرحوں میں کمی دہلی کی معیشت کو فروغ دینے کے لیے نہ صرف فوری ریلیف فراہم کرے گی، خاص طور پر آنے والے تہواروں کے موسم میں، بلکہ طویل مدتی فوائد جیسے زیادہ روزگار کے مواقع اور مضبوط و لچکدار بازار کے لیے بھی راستہ ہموار کرے گی۔

پی ڈی ایف دیکھنے کے لیے یہاں کلک کریں۔