ملٹری نرسنگ سروس (ایم این ایس) نے 30 ستمبر 2025 کو مانک شا سینٹر میں ایک با وقار تقریب کے ذریعے اپنی صد سالہ تقریبات منائیں، جس میں بھارتی مسلح افواج اور قوم کے لیے 100 سال کی بھرپور خدمت، ہمدردی اور عزم کا جشن منایا گیا۔ چیف آف ڈیفنس اسٹاف (سی ڈی ایس) جنرل انیل چوھان اس موقع پر موجود تھے اور انہوں نے سائنسی اجلاس کا افتتاح کیا۔

اپنے خطاب میں سی ڈی ایس نے جنگوں، امن مشن، انسانی امدادی سرگرمیوں اور موجودہ طبی چیلنجوں میں ایم این ایس کے لازمی کردار کو اجاگر کیا۔ انہوں نے سابق ایڈیشنل ڈائریکٹر جنرل اور سینیئر سابق افسران کو ان کی دہائیوں پر محیط پُرخلوص اور ہمدردانہ خدمات پر خراجِ تحسین پیش کیا۔

سی ڈی ایس نے آل ویمن ماؤنٹینئرنگ ایکسپیڈیشن "دی آروہینی" کو بھی روانہ کیا، جس نے حال ہی میں لداخ کی یابت ٹوپو وادی میں 6120 میٹر بلند چوٹی سر کر کے تاریخی کامیابی حاصل کی۔ مقامی روایت کے مطابق اس چوٹی کا نام "ماؤنٹ لامو" رکھا گیا جو طاقت اور استقامت کی علامت ہے۔ 11 ایم این ایس افسران کی زیر قیادت مہم نے اس چوٹی کو فتح کیا جو صدیوں سے غیر مسخرہ تھی۔

صد سالہ سائنسی پروگرام کا موضوع "خود پر ہمدردی: معالجین کی نگہداشت" تھا، جو وزیر اعظم جناب نریندر مودی کے وژن سوستھ ناری – سشکت پریوار ابھیان سے ہم آہنگ ہے۔ اس اجلاس میں حاضر سروس افسران، سابقین اور ماہرین تعلیم نے جدت، ایرگونومکس، ٹیکنالوجی اور ہمدردانہ نگہداشت کے ذریعے فوجی نرسنگ کے طریقوں کو بہتر بنانے پر غور کیا۔

تقریبات کی ایک خاص جھلک ایم این ایس کے سرکاری گیت کا اجرا تھا، جو سروس کی روایات، جذبے اور پیشہ ورانہ وقار کی عکاسی کرتا ہے۔ یہ گیت آئندہ سرکاری اور تقاریبی موقعوں پر پیش کیا جائے گا اور ایم این ایس افسران کے لیے اپنی دوسری صدی میں داخل ہوتے وقت اتحاد کی علامت بنے گا۔

تقریب کا اختتام سائنسی مقالات اور پوسٹروں کے جائزے کے ساتھ ہوا، جس نے تحقیق، تجسس اور جدت کے اس جذبے کو مزید تقویت بخشی جو فوجی نرسنگ سروس کی پہچان ہے۔ اس موقع پر ڈائریکٹر جنرل آرمڈ فورسز میڈیکل سروسز سرج وائس ایڈمرل آرتی سرین اور فوج، بحریہ اور فضائیہ کے ڈائریکٹر جنرل میڈیکل سروسز سمیت دیگر معززین موجود تھے۔

*********

ش ح۔ ف ش ع

                                                                                                                                       U: 6862

 

(Release ID: 2173356) Visitor Counter : 12