آرٹ کی 64ویں قومی نمائش کی ایوارڈز کی تقریب آج نئی دہلی میں منعقد ہوئی، جس میں صدر جمہوریہ محترمہ دروپدی مرمو نے بطور مہمان خصوصی شرکت کی۔ اس تقریب میں ثقافت اور سیاحت کے وزیر جناب گجیندر سنگھ شیخاوت، ثقافت کی وزارت کے سکریٹری جناب وویک اگروال اور للت کلا اکادمی کے نائب صدر جناب نند لال ٹھاکر بھی موجود تھے۔ صدرجمہوریہ نے 20 نمایاں فنکاروں کو بصری فنون میں ان کی شاندار خدمات کیلئے ایوارڈز سے نوازا۔

اس موقع پر خطاب کرتے ہوئے صدرجمہوریہ دروپدی مرمو نے تمام ایوارڈ یافتگان کو مبارکباد دی اور اس اعتماد کا اظہار کیا کہ ان کا کام دوسرے فنکاروں کیلئے تحریک کا وسیلہ بنے گا۔ انہوں نے کہا  کہ‘‘ہندوستانی روایت میں، فن کو طویل عرصے سے ایک روحانی عمل کے طور پر سمجھا گیا ہے۔ آرٹ نہ صرف جمالیاتی قدردانی کا ایک ذریعہ ہے بلکہ ہمارے ثقافتی ورثے کو فروغ دینے اور ایک زیادہ حساس معاشرہ قائم کرنےکا ایک طاقتور ذریعہ بھی ہے۔’’ انہوں نے اس بات کی بھی تعریف کی کہ فنکار اپنی بصیرت اور تخیل کو استعمال کرتے ہوئے نئے بھارت کی تصویر پیش کر رہے ہیں۔

فنکاروں کی مالی مدد کرنے کی اہمیت کو اجاگر کرتے ہوئے، صدرجمہوریہ نے للت کلا اکادمی کے آرٹ ورکس کو پہلی بار فروخت کے لیے پیش کرنے کے اقدام کا خیرمقدم کیا، جس سے 1 کروڑروپے سے زیادہ کی آمدنی ہوئی۔ انہوں نے کہا، ‘‘اس سے فنکاروں کو مالی مدد ملے گی اور ہماری تخلیقی معیشت کو مضبوطی حاصل ہوگی۔ فن سے محبت کرنے والوں کو نہ صرف فن پاروں کی قدردانی کرنی چاہیے بلکہ انہیں  اپنےگھر لے جانا بھی چاہیے۔ ہم سب کو ایک اقتصادی اور ثقافتی طاقت کے طور پر ہندوستان کی شناخت کو مضبوط کرنے کے لیے مل کر کام کرنا چاہیے۔’’

ثقافت اور سیاحت کے وزیر جناب گجیندر سنگھ شیخاوت نے کہا کہ ‘‘فن کسی ملک کی شناخت کا عکاس ہوتا ہے۔ فن اور فنکاروں کی حمایت ہمارے قومی جذبے اور شعور کو مضبوط کرتی ہے۔’’ انہوں نے مزید کہا کہ ایوارڈ یافتہ فن پاروں کو فروخت کے لئے دستیاب کرانے سے فنکاروں کو تقویت ملتی ہے، انہیں خود انحصار بننے میں مدد ملتی ہے اور ان کی معاشی ترقی میں بھی مدد ملتی ہے۔ انہوں نے اس بات پر زور دیا کہ قومی شعور کو حقیقی معنوں میں تشکیل دینے کے لیے فن کو گھروں، اسکولوں، اداروں اور عوامی مقامات کا لازمی حصہ بنایا جانا چاہیے۔

ثقافت کی وزارت کے سکریٹری جناب وویک اگروال نے 1955 سے بلا تعطل منعقد ہونے والے این ای اے کی اہمیت پر روشنی ڈالی۔ انہوں نے مزید کہا کہ اس سال ملک بھر میں موصول ہونے والی 5,922 اندراجات میں سے 283 فن پاروں کو نمائش کے لیے منتخب کیا گیا، اور 20 غیر معمولی کاموں کو نوازا گیا۔ انہوں نے مزید کہا کہ ‘‘گزشتہ سالوں میں، این ای اے ہندوستان کی ثقافتی گہرائی کو سمجھنے اور بصری فنون کی متنوع شکلوں کو فروغ دینے کے لیے ایک سرکردہ پلیٹ فارم کے طور پر ابھرا ہے، جس میں ہر فاتح کو 2,00,000 روپے کا نقد انعام، ایک یادگار اور ایک سرٹیفکیٹ بھی دیا جاتا ہے۔’’

آرٹ کی قومی نمائش کے بارے میں

64ویں این ای اے کا افتتاح 5 اگست 2025 کو نئی دہلی میں وزیر ثقافت جناب گجیندر سنگھ شیخاوت نے کیا۔ یہ نمائش للت کلا اکادمی، بھارت کی قومی فن اکیڈمی کی جانب سے منعقد کی گئی، جو بھارت کے بھرپور بصری ورثے اور معاصر فن کے منظرنامے کا جشن مناتی ہے اور سینئر و ابھرتے ہوئے فنکاروں کوان کے فن کی نمائش کے لیے ایک پلیٹ فارم مہیا کرتی ہے۔

***

ش ح۔ ک ا۔ ش ہ ب

U.NO.6594

(Release ID: 2171222) Visitor Counter : 5