حکومتِ ہند کی صفائی سے متعلق مہم کے تحت، جس کا مقصد کام کی جگہوں اور عوامی مقامات پر صفائی اور حفظانِ صحت کو فروغ دینا ہے، وزارتِ بھاری صنعت نے زیر التواء معاملات کے تصفیے کے لیے خصوصی مہم 5.0 کے تیاری مرحلے کا کامیابی سے آغاز کر دیا ہے۔ انتظامی کارکردگی کو بہتر بنانے، کام کی جگہ پر صفائی کو یقینی بنانے، اور زیر التواء امور میں کمی کے لیے، وزارت کے تحت مرکزی عوامی شعبے کے اداروں اور خود مختار تنظیموں نے مہم کی کامیابی کے لیے جامع اقدامات کا آغاز کیا ہے۔

15 ستمبر سے 30 ستمبر 2025 تک جاری تیاری کی سرگرمیوں کے تحت، وزارت اپنے ماتحت مرکزی عوامی شعبے کے اداروں اور خود مختار تنظیموں کے اشتراک سے ناقابلِ استعمال جسمانی اور برقیاتی فائلوں کا تفصیلی جائزہ لے رہی ہے تاکہ نظام کو مؤثر اور سادہ بنایا جا سکے اور عملی کارکردگی میں بہتری لائی جا سکے۔ ان کوششوں میں ناقابلِ استعمال اشیاء، ناکارہ سامان، اور برقیاتی فضلہ کی نشاندہی اور تلفی بھی شامل ہے، جس کا مقصد قیمتی دفتری جگہ کو خالی کر کے کام کی جگہ کو بہتر طریقے سے منظم کرنا ہے۔

وزارتِ بھاری صنعت کے تحت مختلف مرکزی عوامی شعبے کے اداروں اور خود مختار تنظیموں نے خصوصی مہم 5.0 کے تحت خالی کی جانے والی جگہوں اور تلف کیے جانے والے ناکارہ سامان کی نشاندہی کی ہے

 

دفاتر کے کیمپس اور صنعتی یونٹس میں صفائی کی مہمات کی ایک سلسلہ وار منصوبہ بندی کے لیے تیاریاں بھی جاری ہیں۔ یہ مہمات صرف جسمانی صفائی تک محدود نہیں ہوں گی بلکہ محفوظ، منظم اور پیشہ ورانہ ماحولِ کار کے قیام پر بھی زور دیں گی۔ وزارت اس مہم کو عوامی شعبے کے اداروں میں جوابدہی، صفائی، اور نظم و ضبط کی ثقافت کو فروغ دینے کا ایک مؤثر ذریعہ تصور کرتی ہے۔

تیاری مرحلے کے دوران، جو 20 ستمبر 2025 تک جاری رہا، مرکزی عوامی شعبے کے اداروں اور خود مختار تنظیموں کی جانب سے درج ذیل اہم اہداف کی نشاندہی کی گئی:

• 103 مقامات کو دفاتر کے کیمپس اور صنعتی یونٹس میں بھرپور صفائی کی مہمات کے لیے مختص کیا گیا۔
• 1,58,405 مربع فٹ جگہ کو فضول اور پرانی اشیاء کی تلفی کے ذریعے مؤثر انداز میں استعمال کے لیے نشان زد کیا گیا۔
• 4,905 جسمانی فائلوں کو جانچ اور تلفی کے لیے منتخب کیا گیا، جیسا کہ ریکارڈ رکھنے کی پالیسیوں میں درج ہے۔
• 3,860 برقیاتی فائلوں کو بند کرنے کا ہدف مقرر کیا گیا تاکہ ڈیجیٹل دستاویزات کے نظم و نسق کو بہتر بنایا جا سکے۔

مہم کی رفتار کو برقرار رکھنے اور تمام سرگرمیوں کو ہم آہنگ بنانے کے لیے، وزارت مرکزی عوامی شعبے کے اداروں اور خود مختار تنظیموں کے مہماتی رابطہ افسران اور سینئر حکام کے ساتھ باقاعدہ جائزہ اجلاس منعقد کر رہی ہے۔ ان اجلاسوں کا مقصد تمام متعلقہ فریقوں کو مہم کے اہداف سے آگاہ کرنا ہے، خصوصاً زیر التواء معاملات کے تصفیے اور دفاتر کو صاف ستھرا اور مؤثر بنانے پر زور دینا۔

 

ہاوڑہ میں ٹھکانے لگانے کے لیے اسکریپ کی نشاندہی کی گئی۔

ورکشاپ، بی اینڈ آر، وزارتِ بھاری صنعت کے تحت ایک مرکزی عوامی شعبے کا ادارہ۔ پلانٹ مینٹیننس روم میں تلفی کے لیے شناخت شدہ ناکارہ سامان۔

انسٹرومنٹیشن لمیٹڈ، پلککڑ — وزارتِ بھاری صنعت کے تحت ایک مرکزی عوامی شعبے کا ادارہ۔

 

اس مرحلے کے دوران، تمام مرکزی عوامی شعبے کے ادارے اور خود مختار تنظیمیں اپنی روزانہ کی سرگرمیوں کو منظم طریقے سے دستاویزی شکل دے رہی ہیں جن میں فائلوں کا جائزہ، صفائی کی مہمات، ناکارہ سامان کی تلفی، اور جگہ کے انتظام شامل ہیں۔ وزارت ان کوششوں کی قریبی نگرانی کر رہی ہے تاکہ مہم کے نفاذ کے مرحلے، جو 2 اکتوبر سے 31 اکتوبر 2025 تک جاری رہے گا، کے لیے مکمل تیاری کو یقینی بنایا جا سکے۔

خصوصی مہم 5.0 اندرونی حکمرانی کو نمایاں طور پر بہتر بنانے کے لیے تیار ہے، جس میں فضول سامان کو ختم کرنا، طریقہ کار میں تاخیر کو کم کرنا، اور شفافیت کو فروغ دینا شامل ہے۔ ان مشترکہ اقدامات کے ذریعے، وزارتِ  بھاری صنعت بہترین طریقہ کار قائم کرنے کا ہدف رکھتی ہے جو مؤثر آپریشنز کی حمایت کریں اور بھارت کی وسیع تر انتظامی اصلاحات میں حصہ ڈالیں۔ وزارت دونوں مراحل میں مہم کی کامیاب تکمیل کے لیے رہنمائی اور نگرانی کے عزم کا حامل ہے۔

***

(ش ح۔اس ک ۔ م ذ )

UR-6373

(Release ID: 2169276)