ڈیجیٹل انڈیا پہل کے تحت مالی شمولیت کی سمت ایک تاریخی قدم میں، سی ایس سی ای-گورننس سروسز انڈیا لمیٹڈ نے جولائی 2023 سے اب تک 3,000 کروڑ روپے کے قرضوں کی تقسیم کا سنگ میل عبور کر لیا ہے۔

یہ پروگرام تیز رفتار ترقی دکھا رہا ہے، جس میں مالی سال 2023-24 میں 86 کروڑ روپے، مالی سال 2024-25 میں 1,631 کروڑ روپے اور مالی سال 2025-26 میں اگست 2025 تک 1,300 کروڑ روپے کے قرض تقسیم کیے گئے۔ اب تک تقریباً 70,000 افراد مستفید ہو چکے ہیں، جن میں سے کئی پہلی بار قرض لینے والے، چھوٹے قرضوں کے متلاشی اور غیر بینکاری طبقے سے تعلق رکھنے والے ہیں۔ دیہی گھرانوں اور چھوٹے کاروباروں کو سہارا دے کر، اس پہل نے کاروبار کو فروغ دیا، خاندانوں کو مضبوط کیا اور مقامی معیشتوں کو تقویت بخشی ہے۔

اپنے 5.8 لاکھ سے زائد ولیج لیول انٹرپرینیور (وی ایل ای) کے وسیع نیٹ ورک اور پیرامل فنانس کے اشتراک سے، سی ایس سی نے دور دراز دیہی علاقوں میں محروم اور پسماندہ برادریوں کے لیے بروقت اور سستی مالی سہولت فراہم کی ہے۔ یہ قرضے مقامی ساہوکاروں کے مقابلے میں زیادہ سستے اور قابل رسائی ہیں، جس سے استحصالی قرض پر انحصار کم ہوا ہے۔ اس اقدام نے جڑ سطح پر قرض کے خلا کو پُر کیا، روزگار کو مستحکم کیا اور شہریوں کو وقار اور اعتماد کے ساتھ خود انحصاری کی طرف گامزن کیا۔

اس سنگ میل پر اظہار خیال کرتے ہوئے جناب سنجے کمار راکیش، منیجنگ ڈائریکٹر و سی ای او، سی ایس سی ایس پی وی نے کہا ”یہ سنگ میل ایک ڈیجیٹل طور پر بااختیار معاشرے کے قیام کے ہمارے مشترکہ وژن کی عکاسی کرتا ہے۔ دیہی شہریوں کو قابل رسائی مالی خدمات سے جوڑ کر، سی ایس سی اور پیرامل فنانس نے بھارت کے محروم علاقوں میں قرض کے خلا کو پُر کیا ہے۔“

جناب جگدیپ ملاریڈی، چیف بزنس آفیسر، پیرامل فنانس نے کہا، ”سی ایس سی کے ساتھ ہماری شراکت داری آخری سرے تک قرض فراہم کرنے میں بنیادی حیثیت رکھتی ہے۔ 3,000 کروڑ روپے کے قرضوں کی تقسیم کا سنگ میل اس اعتماد کا ثبوت ہے جو دیہی بھارت نے ہم پر کیا ہے، اور ہم مالی شمولیت کو مزید گہرا کرنے کے لیے پرعزم ہیں۔“

سی ایس سی – پیرامل فنانس کا اشتراک نہ صرف قرض تک رسائی کو آسان بناتا ہے بلکہ دیہی ترقی کے نئے مواقع بھی پیدا کرتا ہے۔ سی ایس سی کی بے مثال ڈیجیٹل رسائی کو پیرامل فنانس کے اختراعی مالیاتی حل کے ساتھ ملا کر، یہ پہل پورے بھارت میں لاکھوں افراد کے لیے قرض کو زیادہ قابل رسائی، سستا اور اثر انگیز بنا رہی ہے۔

سی ایس سی ای-گورننس سروسز انڈیا لمیٹڈ کے بارے میں:

سی ایس سی ایس پی وی وزارت الیکٹرانکس و انفارمیشن ٹیکنالوجی، حکومت ہند کے تحت ایک اسپیشل پرپز وہیکل ہے، جو دنیا کے سب سے بڑے ڈیجیٹل سروس ڈیلیوری نیٹ ورکس میں سے ایک کا انتظام کرتا ہے۔ 5.8 لاکھ سے زائد ولیج لیول انٹرپرینیور کے ذریعے، سی ایس سی شہریوں کو دیہی اور دور دراز علاقوں میں اہم سرکاری اور مالی خدمات فراہم کرتا ہے اور ڈیجیٹل و مالی شمولیت کو فروغ دیتا ہے۔

پیرامل فنانس کے بارے میں:

پیرامل فنانس، جو نیشنل ہاؤسنگ بینک کے ساتھ رجسٹرڈ ایک ہاؤسنگ فنانس کمپنی ہے، ملک بھر میں ریٹیل اور ہول سیل قرض کی سہولت فراہم کرتی ہے۔ سستے ہاؤسنگ لون، ایم ایس ایم ای فنانسنگ اور اختراعی قرض ماڈل پر توجہ مرکوز کرنے کے باعث، یہ کمپنی بالخصوص محروم بازاروں میں جامع ترقی کا ایک اہم محرک بن گئی ہے۔

                                               **************

ش ح۔ ف ش ع

15-09-2025

                                                                                                                                       U: 6054

 

(रिलीज़ आईडी: 2166959) आगंतुक पटल : 28