ہندوستانی بحریہ کا جدید ترین اسٹیلتھ فریگیٹ آئی این ایس  تمل  یکم جولائی-2025 کو روس میں کمیشننگ کے بعد ہندوستان واپس آئے ہوئے 13 اگست 2025 کو نیپلز، اٹلی پہنچا ۔ یہ دورہ 2023 میں‘اسٹریٹیجک پارٹنرشپ’ کے طور پر ہندوستان اور اٹلی کے درمیان دوطرفہ تعلقات کو مزید گہرا کرنے کی طرف اشارہ کرتا ہے۔ یہ دفاع، توانائی اور ٹیکنالوجی میں توسیعی تعاون پر توجہ مرکوز کرتا ہے  اور اس کا مقصد دونوں بحری افواج کے درمیان باہمی تعاون اور مشترکہ مہارت کو بڑھانا ہے۔

آئی این ایس تمل نے اٹلی کی بحریہ کے لینڈنگ پلیٹ فارم ڈاک  آئی ٹی ایس ٹرائسٹے  کے ساتھ نیپلز کی بندرگاہ میں داخل ہونے سے قبل ایک پیسج ایکسرسائز (پاسیکس) میں حصہ لیا۔ اس مشترکہ مشق میں مواصلاتی مشقیں، بحری تحرکات اور فضائی آپریشنز شامل تھے۔

جہاز کے بندرگاہ پر قیام کے دوران سرگرمیوں میں پیشہ ورانہ اور دوطرفہ سرگرمیاں شامل ہیں جن میں نیپلز کے سول معززین سے ملاقات، ایک دوسرے کے جہازوں کا دورہ، اطالوی بحریہ کے اعلیٰ  افسران  سے بات چیت اور ہند-اٹلی تعلقات کے اعزاز میں ثقافتی تقریبات شامل ہیں۔

آئی این ایس تمل نے آج 15 اگست 2025 کو نیپلز میں ہندوستان کا 79واں یوم آزادی  بھی منایا۔

آئی این ایس تمل کا یہ دورہ اس بات  کی عکاسی کرتا ہے کہ ہندوستان اٹلی کے ساتھ اپنے تعلقات کو کس قدر اہمیت دیتا ہے اور دونوں ممالک کے درمیان بڑھتے ہوئے دفاعی تعاون کو مزید  مستحکم کرنے کی کوشش کر رہا ہے۔ یہ موقع دونوں ممالک کی بحریہ کو بہترین عملی تجربات کے تبادلہ اور تعاون کے نئے مواقع تلاش کرنے کا بھی موقع فراہم کرتا ہے۔

******

ش ح۔‎ظ ا۔ ن م۔

UR-4800

(Release ID: 2157396)