মীয়াম্না মখোয়গী য়ুমশিংদা জাতিগী ফিরাল চিংখৎতুনা মীয়াম মরক্ত অপুনবগী শক্তম অমসুং লৈবাক অসিগী চাউথোকচবা হেনগৎহন্নবা ঙসি য়ুমশকৈশা নুমিৎ,ওগষ্ট ১৩,২০২৫ দা সেন্ত্রেল ব্যুরো ওফ কম্মুনিকেসন, রিজনেল ওফিস, ইম্ফালনা শীন্দুনা ‘হর ঘর তিরঙ্গ’গী মরুওইবা খঙহন্নবা অখন্নবা থৌরম অমা পাংথোকখ্রে।

লৈবাক শীনবা থুংনা মরৈবাক নুংশিবা অমসুং অপুনবগী ৱাখল্লোন অমা চেনহন্নবা পান্দমদা পাংথোকখিবা থৌরম অদুদা সেন্ত্রেল ব্যুরো ওফ কম্মুনিকেসন অমসুং প্রেস ইনফোর্মেসন ব্যুরো ইম্ফালগী দিরেক্তর দোক্তর ইঙম পামে, সেন্ত্রেল ব্যুরো ওফ কম্মুনিকেসন, রিজনেল ওফিস অমসুং প্রেস ইনফোর্মেসন ব্যুরো ইম্ফালগী ওফিসারশিং শরুক য়াখি।

মতৌ করম্না কাংলোন চুম্নবা ফিরাল চিংখৎকনি অমসুং ইকায়খুম্নবগা লোয়ননা কমদৌনা ফিরাল শীজিন্নগনি হায়বগী মতাংদা ৱাখল তাহনবগী অতেনবা থৌরম অমগা লোয়ননা থৌরম অদুদা শরুক য়াখিবশিংদা জাতিগী মচু অহুমগী ফিরালশিং য়েন্থোকখি।

মহাক্কী ৱারোলদা, দোক্তর ইঙম পামেনা হায়খি মীয়াম মরক্ত মরৈবাক নুংশিবা হেনগৎহন্নবা হর ঘর তিরঙ্গ কেম্পেন অসি য়াম্না মরুওই। মখোয়গী ঈশৈগী খুৎথাংদা লৈবাক অসিগীদমক চাউথোকচবা হেনগৎহনবগীদমক সোং অমসুং দ্রামা দিবিজনগী কলাকারশিংগী থবক থাগৎনিঙাইনি। মমা লৈবাক ঙাক্নবা অমসুং মীয়ামগীদমক মখোয়গী থৱায় কৎখ্রবা মরৈবাক নিংবা অথৌবশিংদা দোক্তর পামেনা ইকায়খুম্নবা উৎখি। মহাক্না হায়খি মমা লৈবাক নুংশিবগী খুদম অমা ওইনা জাতিগী ফিরাল ইকায়খুম্নবা অসি য়াম্না মরুওই অমসুং মসি শীজিন্নবা অমসুং চিংখৎপদা চৎন-কাংলোনশিং ফজনা ইনগদবনি।

সেন্ত্রেল ব্যুরো ওফ কম্মুনিকেসন, ফিল্দ ওফিস, চান্দেলগী এসিষ্টেন্ত দিরেক্তর, এম. রুসতমনা ভারত জাতিগী মচু অহুমগী ফিরালগী মচং ওইবা ৱাফমশিং পাউদমখি। মরৈবাক নুংশিবা অমসুং লৈবাক্কীদমক চাউথোকপা লৈহন্নবা মরুওইনা অঙাংশিংগী মরক্ত জাতিগী ফিরালগী মরুওইবা খঙহন্নবা থৌরম শরুক য়াখিবশিংদা মহাক্না তকশিনখি। জাতিগী ফিরাল ইকায়খুম্নবা উৎপগী মরুওইবা অদু মহাক্না পনখি।

সেন্ত্রেল ব্যুরো ওফ কম্মুনিকেসন, রিজনেল ওফিস, ইম্ফালগী ফিল্দ একজিবিসন ওফিসার, ঐচ. দিপকুমার শর্মনা মরৈবাক নুংশিবা অমসুং জাতিগী ফিরালগী মতাংদা ৱা ঙাংখি। লৈবাক অসিগী অপুনবা অমসুং ঙমখৈগী অপুনবগী শক্তম মহুৎশিল্লিবা ফিরালগী মচুশিংগী মরুওইবা অদু মহাক্না পনখি।

প্রেস ইনফোর্মেসন ব্যুরো ইম্ফালগী মেদিয়া অমসুং কম্মুনিকেসন ওফিসার, পুস্পা মাইবমনা হায়খি সরকারগী স্কিমশিং অমসুং থৌরমশিংগী মতাংদা মীয়ামদা খঙহনবদা সরকারগী ইমপ্লোইয়িশিং, মরুওইনা মেদিয়া য়ুনিতশিংদা থবক তৌরিবশিংগী মরুওইবা থৌদাং লৈ। জাতিগী ফিরালগী চৎন-কাংলোনশিং ঙাক্না চৎপা হায়বসি য়াম্না মরুওই অমসুং মীয়াম মরক্ত মরৈবাক নুংশিবগী ৱাখল্লোন হেনগৎহনবা হায়বসি তঙাইফদে। লৈবাক অসিগীদমক চাউথোকচবা অমসুং অপুনবগী শক্তমগী ৱাখল্লোন হেনগৎহনবগা লোয়ননা মীয়াম্না জাতিগী মচু অহুমগী ফিরাল ইকায়খুম্নগদবনি।

সেন্ত্রেল ব্যুরো ওফ কম্মুনিকেসন, ফিল্দ ওফিস, সেনাপতিগী ফিল্দ পব্লিসিতি ওফিসার, দোক্তর দব্লিউ. উর্মিলানা হায়খি হর ঘর তিরঙ্গ কেম্পেনগী মখাদা য়ুম খুদিংমক্ত জাতিগী ফিরালশিং পাইহনবা য়াম্না মরুওই। মীয়াম্না মচু অহুমগী ফিরালশিং চিংখৎপা অমসুং থেৎপা মতমদা তৌগদবা অমসুং তৌরোইদবা থবকশিং ঙাক্না চৎগদবনি। মচু অহুমগী মখল খুদিংমক্কী ফিরালশিং, ফিরালগী ফোতোশিং অমসুং ফিরালগী অয়েকপা লাইশিং ইকায়খুম্নগদবনি। জাতিগী ফিরাল ইকায়বা পীদনবা চেকশিনগদবনি অমসুং মসিগী ইকায়খুম্নবা ঙাকপা তঙাইফদে।

থৌরম অদুদা, লৈবাক অসি ইকায়খুম্নবা উৎপা ওইনা সোং এন্দ দ্রামা দিবিজনগী কলাকারশিংনা খোঞ্জেল অমসুং যন্ত্রগী অপুনবগী ফজরবা থৌরম অমা পাংথোকখি। লৈবাক্কী অপুনবা শক্তম অমসুং চাউথোকচবা হেনগৎহন্নবা অমুক নৌহৌননা মরৈবাক নুংশিবগী ৱাখল অমা পোকহনবগা লোয়ননা থৌরম অদু লোইশিনখি।

***

(রিলিজ আই.দি.: 2156076) ভিজিতর কাউন্তর : 24