لائیکن کی ایک نئی نسل، ایلوگرافا افسوسوریڈیکا، مغربی گھاٹوں میں دریافت ہوئی ہے، جو پھپھوندی اور طحالب یا سائانوبیکٹیریا (فوٹوسنتھیٹک پارٹنرز) کے درمیان قدیم سمبائیوٹک تعلقات کے بارے میں اہم بصیرت فراہم کرتی ہے۔ نئی شناخت شدہ انواع کرسٹوز لائیکن ہے، جس کی خصوصیت افیوز سورڈیا اور نورسٹیکٹک ایسڈ کی موجودگی ہے، جو ایلوگرافا جینس کے اندر ایک نایاب کیمیائی خاصیت ہے۔ یہ ہندوستان کی پہلی ایلوگرافا نسل ہے جس کی تصدیق سالماتی اعداد و شمار کے ساتھ کی گئی ہے، جس میں متعدد جینیاتی مارکرز (ایم ٹی ایس ایس یو، ایل ایس یو، فنگس کے لیے آر پی بی 2، اور طحالب کے لیے آئی ٹی ایس) کے ڈی این اے سیکوئنس کا استعمال کیا گیا ہے۔

محکمہ سائنس و ٹیکنالوجی (ڈی ایس ٹی) کے ایک خود مختار ادارے، اگرکر ریسرچ انسٹی ٹیوٹ پونے کے ہندوستانی سائنس دانوں کی ایک ٹیم نے لائیکن کی اس پہلے سے نامعلوم نوع کو دریافت کیا ہے، جو ہندوستان سے رپورٹ کی گئی ایلوگرافا جینس کی 53ویں اور صرف مغربی گھاٹ سے 22ویں نسل بن گئی ہے۔ اس مطالعے کو انوسندھن نیشنل ریسرچ فاؤنڈیشن (اے این آر ایف) کے سابقہ سائنس اینڈ انجینئرنگ ریسرچ بورڈ (ایس ای آر بی) نے "پولی فیزک ٹیکسونومک اپروچ اور ماحولیاتی مطالعات کے ذریعے مغربی گھاٹوں سے لائیکن فیملی گریفیڈیسی اور پارمیلیاسی میں الگل اور فنگل شراکت داروں کے سمبیوسس کو بے نقاب کرنے" کے منصوبے کے تحت مالی اعانت فراہم کی تھی۔

ایلوگرافا افسوسوریڈیکا اپنے ماحولیاتی نظام میں ایک اہم کردار ادا کرتا ہے، جو مٹی کی تشکیل میں معاون ہے، کیڑوں کے لیے خوراک فراہم کرتا ہے، اور ہوا کے معیار و آب و ہوا کی تبدیلیوں کے لیے حساسیت کی وجہ سے ماحولیاتی صحت کے بایوانڈیکیٹر کے طور پر کام کرتا ہے۔ ٹرینٹپوہلیا طحالب کے ساتھ اس کا سمبائیوٹک تعلق ٹراپیکل فوٹوبیونٹ تنوع اور مقامی طور پر ڈھالے گئے سمبائیوٹک تعاملات کی تفہیم کو بڑھاتا ہے۔ نورسٹیکٹک ایسڈ کی موجودگی اور اس کی منفرد مورفولوجیکل خصوصیات اس کی ماحولیاتی امتیازی حیثیت کی نشاندہی کرتی ہیں۔ مغربی گھاٹ کے حیاتیاتی تنوع کے حصے کے طور پر، یہ لائیکن ماحولیاتی نظام کے استحکام کی حمایت کرتا ہے اور عالمی حیاتیاتی تنوع کے ہاٹ اسپاٹ کے طور پر اس خطے کے کردار کو اجاگر کرتا ہے۔ یہ دریافت لائیکن کے چھپے ہوئے تنوع اور ان کی ماحولیاتی شراکت کو بے نقاب کرنے کے لیے مزید سالماتی مطالعات کی ضرورت پر زور دیتی ہے۔

حکومت مختلف پالیسیوں، اقدامات اور فنڈنگ میکانزمز کے ذریعے مغربی گھاٹ جیسے حیاتیاتی تنوع کے ہاٹ سپاٹس میں تحقیق اور تحفظ کی کوششوں کو فعال طور پر فروغ دے رہی ہے۔ نایاب یا قدیم انواع پر تحقیق اکثر انواع کی شناخت اور درجہ بندی، ان کی ارتقائی تاریخ اور تحفظ کی حیثیت کو سمجھنے کے لیے روایتی درجہ بندی کے طریقوں کے ساتھ ساتھ جدید سالماتی تکنیکوں کا بھی استعمال کرتی ہے۔ محکمہ سائنس و ٹیکنالوجی (ڈی ایس ٹی)، محکمہ بایوٹیکنالوجی (ڈی بی ٹی)، کونسل آف سائنٹیفک اینڈ انڈسٹریل ریسرچ (سی ایس آئی آر)، انوسندھن نیشنل ریسرچ فاؤنڈیشن (اے این آر ایف)، اور وزارت ماحولیات، جنگلات و موسمیاتی تبدیلی (ایم او ای ایف اینڈ سی سی) وغیرہ ماحولیاتی نظام، ارتقائی تاریخ، قدیم نسلوں، تحفظ، انسان و جنگلی حیات کے تعاملات، بحالی وغیرہ پر توجہ مرکوز کرنے والے کلیدی تحقیقی شعبوں کی حمایت کرتے ہیں۔

حکومت پہلے ہی حیاتیاتی تنوع کے نئے مقامات کی نشاندہی اور ان کی تسلیم کاری میں مصروف ہے، خاص طور پر حیاتیاتی تنوع کے ورثے کے مقامات (بی ایچ ایس) کے اعلان اور دیگر مؤثر علاقے پر مبنی تحفظ کے اقدامات (او ای سی ایم) کی توسیع کے ذریعے۔ نیشنل بایو ڈائیورسٹی اتھارٹی (این بی اے) اور اسٹیٹ بایو ڈائیورسٹی بورڈز کی فعال شمولیت کے ساتھ حیاتیاتی تنوع کے نئے مقامات کی شناخت ایک مسلسل عمل ہے۔ مختلف تحقیقی تنظیمیں، تعلیمی ادارے اور سرکاری ایجنسیاں جیسے اگرکر ریسرچ انسٹی ٹیوٹ (اے آر آئی)، بوٹینیکل سروے آف انڈیا (بی ایس آئی)، نیشنل بوٹینیکل ریسرچ انسٹی ٹیوٹ (این بی آر آئی)، گووند بلبھ پنت نیشنل انسٹی ٹیوٹ فار ہمالین انوائرمنٹ (جی بی پی این آئی ایچ ای) وغیرہ، ملک کے دیگر حیاتیاتی تنوع کے مقامات کی مسلسل تلاش کے لیے ایکسپلوریٹری ریسرچ اور فیلڈ اسٹڈیز کر رہے ہیں۔

یہ معلومات آج راجیہ سبھا میں ایک تحریری جواب میں سائنس اور ٹیکنالوجی، ارضیاتی سائنس کے مرکزی وزیر مملکت (آزادانہ چارج)، وزیر اعظم کے دفتر کے وزیر مملکت، عملہ، عوامی شکایات اور پنشن کے وزیر مملکت، ایٹمی توانائی کے محکمے اور خلائی محکمے کے وزیر مملکت ڈاکٹر جتیندر سنگھ نے فراہم کیں۔

***

 

UR-4358

(ش ح۔اس ک ۔ م   ر

(Release ID: 2153872)