ਸੂਚਨਾ ਅਤੇ ਪ੍ਰਸਾਰਣ ਮੰਤਰਾਲੇ ਨੇ 5 ਅਗਸਤ, 2025 ਨੂੰ ਵਿਗਿਆਨ ਭਵਨ, ਨਵੀਂ ਦਿੱਲੀ ਵਿਖੇ ਰਾਜ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਸੂਚਨਾ ਅਤੇ ਲੋਕ ਸੰਪਰਕ (ਆਈ ਅਤੇ ਪੀਆਰ) ਸਕੱਤਰਾਂ ਨਾਲ ਇੱਕ ਉੱਚ-ਪੱਧਰੀ ਕਾਨਫਰੰਸ ਦੀ ਮੇਜ਼ਬਾਨੀ ਕੀਤੀ। ਕੇਂਦਰੀ ਸੂਚਨਾ ਅਤੇ ਪ੍ਰਸਾਰਣ ਰਾਜ ਮੰਤਰੀ ਡਾ. ਐੱਲ. ਮੁਰੂਗਨ; ਸਕੱਤਰ, ਸੂਚਨਾ ਅਤੇ ਪ੍ਰਸਾਰਣ ਸ਼੍ਰੀ ਸੰਜੈ ਜਾਜੂ, ਅਤੇ ਹੋਰ ਸੀਨੀਅਰ ਅਧਿਕਾਰੀਆਂ ਨੇ ਕਾਨਫਰੰਸ ਨੂੰ ਸੰਬੋਧਨ ਕੀਤਾ। ਕਾਨਫਰੰਸ ਦਾ ਮੰਤਵ ਲੋਕ ਸੰਚਾਰ ਵਿੱਚ ਕੇਂਦਰ-ਰਾਜ ਤਾਲਮੇਲ ਨੂੰ ਮਜ਼ਬੂਤ ਕਰਨਾ, ਪ੍ਰੈੱਸ ਸੇਵਾ ਪੋਰਟਲ ਅਤੇ ਇੰਡੀਆ ਸਿਨੇ ਹੱਬ ਦੇ ਸੰਪੂਰਨ ਪੈਮਾਨੇ 'ਤੇ ਅਮਲ ਅਤੇ ਕਾਰਜਸ਼ੀਲਤਾ ਨੂੰ ਯਕੀਨੀ ਬਣਾਉਣਾ, ਅਤੇ ਫਿਲਮ ਬੁਨਿਆਦੀ ਢਾਂਚੇ ਨੂੰ ਵਿਕਸਿਤ ਕਰਨ ਅਤੇ ਖੇਤਰਾਂ ਵਿੱਚ ਭਾਰਤ ਦੀ ਰਚਨਾਤਮਕ ਅਰਥਵਿਵਸਥਾ ਨੂੰ ਉਤਸ਼ਾਹਿਤ ਕਰਨ ਲਈ ਸਹਿਯੋਗੀ ਮੌਕਿਆਂ ਦੀ ਪੜਚੋਲ ਕਰਨਾ ਸੀ।

ਮੀਡੀਆ ਸੁਧਾਰ ਅਤੇ ਭਾਰਤ ਦੀ ਰਚਨਾਤਮਕ ਅਰਥਵਿਵਸਥਾ ਦਾ ਵਿਸਥਾਰ

ਕਾਨਫਰੰਸ ਨੂੰ ਸੰਬੋਧਨ ਕਰਦੇ ਹੋਏ, ਕੇਂਦਰੀ ਸੂਚਨਾ ਅਤੇ ਪ੍ਰਸਾਰਣ ਰਾਜ ਮੰਤਰੀ ਡਾ. ਐੱਲ. ਮੁਰੂਗਨ ਨੇ ਕਿਹਾ ਕਿ ਭਾਰਤੀ ਸਿਨੇਮਾ ਹੱਬ ਪੋਰਟਲ ਨੂੰ ਇੱਕ ਏਕੀਕ੍ਰਿਤ ਸਿੰਗਲ-ਵਿੰਡੋ ਸਿਸਟਮ ਵਿੱਚ ਮੁੜ ਸੁਰਜੀਤ ਕੀਤਾ ਗਿਆ ਹੈ, ਜੋ ਸਮੁੱਚੇ ਭਾਰਤ ਵਿੱਚ ਫਿਲਮ ਨਿਰਮਾਣ ਪ੍ਰਵਾਨਗੀਆਂ ਅਤੇ ਸੇਵਾਵਾਂ ਤੱਕ ਸੁਚਾਰੂ ਪਹੁੰਚ ਦੀ ਪੇਸ਼ਕਸ਼ ਕਰਦਾ ਹੈ। ਜੀਆਈਐੱਸ ਵਿਸ਼ੇਸ਼ਤਾਵਾਂ ਅਤੇ ਆਮ ਰੂਪਾਂ ਨਾਲ, ਇਹ ਈਜ਼ ਆਫ ਡੂਇੰਗ ਬਿਜ਼ਨਿਸ ਦਾ ਸਮਰਥਨ ਕਰਦਾ ਹੈ ਅਤੇ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਦੀ ਅਗਵਾਈ ਹੇਠ ਭਾਰਤ ਦੀਆਂ ਫਿਲਮ-ਅਨੁਕੂਲ ਨੀਤੀਆਂ ਨੂੰ ਪ੍ਰਦਰਸ਼ਿਤ ਕਰਦਾ ਹੈ।

ਮੰਤਰੀ ਨੇ ਘੱਟ ਲਾਗਤ ਵਾਲੇ ਥੀਏਟਰਾਂ ਰਾਹੀਂ ਮਹਿਲਾਵਾਂ ਅਤੇ ਸਥਾਨਕ ਭਾਈਚਾਰਿਆਂ ਨੂੰ ਸਸ਼ਕਤ ਬਣਾਉਣ ਵਾਲੀਆਂ ਜ਼ਮੀਨੀ ਪੱਧਰੀ ਦੀਆਂ ਸਿਨੇਮਾ ਪਹਿਲਕਦਮੀਆਂ ਨੂੰ ਵੀ ਉਜਾਗਰ ਕੀਤਾ। ਉਨ੍ਹਾਂ ਨੇ ਵੇਵਸ 2025 ਅਤੇ ਇਫ਼ੀ ਗੋਆ ਵਰਗੇ ਪ੍ਰਮੁੱਖ ਆਲਮੀ ਸਮਾਗਮਾਂ 'ਤੇ ਜ਼ੋਰ ਦਿੱਤਾ, ਜੋ ਦੁਨੀਆ ਭਰ ਦੀ ਪ੍ਰਤਿਭਾ ਨੂੰ ਆਕਰਸ਼ਿਤ ਕਰਨ, ਭਾਰਤ ਦੀ ਰਚਨਾਤਮਕ ਅਰਥਵਿਵਸਥਾ ਨੂੰ ਹੁਲਾਰਾ ਦੇਣ, ਵਿਸ਼ਵ ਵਿੱਚ ਸੱਭਿਆਚਾਰਕ ਕੂਟਨੀਤੀ ਨੂੰ ਉਤਸ਼ਾਹਿਤ ਕਰਨ ਅਤੇ ਕੱਲ੍ਹ ਦੇ ਰਚਨਾਤਮਕ ਦਿਮਾਗਾਂ ਨੂੰ ਸਸ਼ਕਤ ਬਣਾਉਣ 'ਤੇ ਜ਼ੋਰ ਦਿੰਦੇ ਹਨ।

ਉਨ੍ਹਾਂ ਨੇ ਹਾਲ ਹੀ ਵਿੱਚ ਸ਼ੁਰੂ ਕੀਤੇ ਗਏ ਇੰਡੀਅਨ ਇੰਸਟੀਟਿਊਟ ਆਫ਼ ਕ੍ਰਿਏਟਿਵ ਟੈਕਨੋਲੋਜੀ (ਆਈਆਈਸੀਟੀ) 'ਤੇ ਵਿਸ਼ੇਸ਼ ਜ਼ੋਰ ਦਿੱਤਾ, ਜਿਸ ਦਾ ਮੰਤਵ ਐਨੀਮੇਸ਼ਨ, ਗੇਮਿੰਗ, ਮਿਊਜ਼ਿਕ ਅਤੇ ਹੋਰ ਰਚਨਾਤਮਕ ਖੇਤਰਾਂ ਵਿੱਚ ਨੌਜਵਾਨਾਂ ਨੂੰ ਹੁਨਰਮੰਦ ਬਣਾਉਣਾ ਹੈ, ਜਿਸ ਨਾਲ ਦੇਸ਼ ਵਿੱਚ ਰਚਨਾਤਮਕ ਅਰਥਵਿਵਸਥਾ ਨੂੰ ਹੁਲਾਰਾ ਦੇਣ ਲਈ ਭਾਰਤ ਸਰਕਾਰ ਦੇ ਯਤਨਾਂ ਨੂੰ ਉਜਾਗਰ ਕੀਤਾ ਗਿਆ।

ਮੀਡੀਆ ਤਰੱਕੀ ਲਈ ਸਹਿਯੋਗੀ ਸ਼ਾਸਨ

ਇਸ ਪ੍ਰੋਗਰਾਮ ਦੌਰਾਨ, ਸੂਚਨਾ ਅਤੇ ਪ੍ਰਸਾਰਣ ਸਕੱਤਰ ਸ਼੍ਰੀ ਸੰਜੈ ਜਾਜੂ ਨੇ ਪ੍ਰਭਾਵਸ਼ਾਲੀ ਸੰਚਾਰ ਅਤੇ ਮੀਡੀਆ ਵਿਕਾਸ ਵਿੱਚ ਕੇਂਦਰ-ਰਾਜ ਸਹਿਯੋਗ ਦੀ ਮਹੱਤਵਪੂਰਨ ਭੂਮਿਕਾ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਨੇ ਡਿਜੀਟਲ ਕ੍ਰਿਏਟਰਸ, ਸਥਾਨਕ ਮੀਡੀਆ ਦੇ ਉਭਾਰ ਅਤੇ ਜ਼ਿਲ੍ਹਾ-ਪੱਧਰੀ ਸੂਚਨਾ ਅਤੇ ਜਨਤਕ ਸੰਚਾਰ ਸੈਟਅਪਸ ਨੂੰ ਸਸ਼ਕਤ ਬਣਾਉਣ ਦੀ ਜ਼ਰੂਰਤ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਨੇ ਸਾਰੇ ਰਾਜਾਂ ਨੂੰ ਸੁਚਾਰੂ ਪ੍ਰਕਾਸ਼ਨ ਪ੍ਰਕਿਰਿਆਵਾਂ ਲਈ ਪ੍ਰੈੱਸ ਸੇਵਾ ਪੋਰਟਲ ਨਾਲ ਏਕੀਕ੍ਰਿਤ ਹੋਣ ਦੀ ਅਪੀਲ ਕੀਤੀ ਅਤੇ ਰਾਜਾਂ ਵਿੱਚ ਮੀਡੀਆ ਵਿਭਾਗਾਂ ਵਿੱਚ ਜ਼ਿੰਮੇਵਾਰੀਆਂ ਦੀ ਵੰਡ 'ਤੇ ਚਿੰਤਾ ਪ੍ਰਗਟ ਕੀਤੀ।

ਸ਼੍ਰੀ ਜਾਜੂ ਨੇ ਸਿਨੇਮਾ ਅਤੇ ਸਮੱਗਰੀ ਸਿਰਜਣ ਦੀ ਆਰਥਿਕ ਸੰਭਾਵਨਾ 'ਤੇ ਵੀ ਚਾਨਣਾ ਪਾਇਆ ਅਤੇ ਮਹਾਨਗਰਾਂ ਤੱਕ ਫੈਲਾਉਣ ਅਤੇ ਸਥਾਨਕ ਪ੍ਰਤਿਭਾ ਦਾ ਸਮਰਥਨ ਕਰਨ ਦੀ ਜ਼ਰੂਰਤ 'ਤੇ ਜ਼ੋਰ ਦਿੱਤਾ। ਫਿਲਮ ਨਿਰਮਾਣ ਨੂੰ ਉਤਸ਼ਾਹਿਤ ਕਰਨ ਅਤੇ ਕ੍ਰਿਏਟਰਸ ਨੂੰ ਸਮੱਗਰੀ ਦਾ ਮੁਦਰੀਕਰਣ ਕਰਨ ਦੇ ਯੋਗ ਬਣਾਉਣ ਲਈ ਇੰਡੀਆ ਸਿਨੇ ਹੱਬ ਵਰਗੀਆਂ ਪਹਿਲਕਦਮੀਆਂ ਪੇਸ਼ ਕੀਤੀਆਂ ਗਈਆਂ ਸਨ। ਉਨ੍ਹਾਂ ਨੇ ਵੇਵਸ ਸੰਮੇਲਨ ਨੂੰ ਇੱਕ ਆਲਮੀ ਲਹਿਰ ਕਰਾਰ ਦਿੱਤਾ ਅਤੇ ਗੋਆ ਵਿੱਚ ਇਫ਼ੀ ਦੌਰਾਨ ਇੱਕ ਰੇਡੀਓ ਸੰਮੇਲਨ ਦੀਆਂ ਯੋਜਨਾਵਾਂ ਦਾ ਐਲਾਨ ਕੀਤਾ ਤਾਂ ਜੋ ਮੀਡੀਆ ਈਕੋਸਿਸਟਮ ਵਿੱਚ ਗੱਲਬਾਤ ਅਤੇ ਸਹਿਯੋਗ ਨੂੰ ਮਜ਼ਬੂਤ ਕੀਤਾ ਜਾ ਸਕੇ।

ਧਿਆਨ ਕੇਂਦ੍ਰਿਤ ਮੁੱਖ ਖੇਤਰ:

ਇਸ ਕਾਨਫਰੰਸ ਦੇ ਮੁੱਖ ਫੋਕਸ ਖੇਤਰਾਂ ਵਿੱਚੋਂ ਇੱਕ ਪ੍ਰੈੱਸ ਸੇਵਾ ਪੋਰਟਲ 'ਤੇ ਰਾਜ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਦੇ ਸਬੰਧਿਤ ਅਧਿਕਾਰੀਆਂ ਦੀ ਸੰਵੇਦਨਸ਼ੀਲਤਾ ਔਨਬੋਰਡਿੰਗ ਸੀ। ਪ੍ਰੈੱਸ ਰਜਿਸਟਰਾਰ ਜਨਰਲ ਆਫ਼ ਇੰਡੀਆ ਵਲੋਂ ਪ੍ਰੈੱਸ ਐਂਡ ਰਜਿਸਟ੍ਰੇਸ਼ਨ ਆਫ਼ ਪੀਰਿਓਡੀਕਲਜ਼ ਐਕਟ (ਪੀਆਰਪੀ ਐਕਟ), 2023 ਦੇ ਤਹਿਤ ਵਿਕਸਿਤ ਕੀਤਾ ਗਿਆ, ਇਹ ਪੋਰਟਲ ਇੱਕ ਸਿੰਗਲ-ਵਿੰਡੋ ਡਿਜੀਟਲ ਪਲੈਟਫਾਰਮ ਹੈ ਜੋ ਰਸਾਲਿਆਂ ਨਾਲ ਸਬੰਧਿਤ ਰਜਿਸਟ੍ਰੇਸ਼ਨ ਅਤੇ ਪਾਲਣਾ ਪ੍ਰਕਿਰਿਆਵਾਂ ਦੀ ਸਹੂਲਤ ਦਿੰਦਾ ਹੈ।

ਇੱਕ ਹੋਰ ਮੁੱਖ ਗੱਲ ਇਹ ਸੀ ਕਿ ਇੰਡੀਆ ਸਿਨੇ ਹੱਬ ਪੋਰਟਲ ਨੂੰ ਮੁੜ ਸੁਰਜੀਤ ਕੀਤਾ ਗਿਆ ਸੀ, ਜੋ 28 ਜੂਨ 2024 ਨੂੰ ਸ਼ੁਰੂ ਹੋਇਆ ਸੀ। ਇਹ ਪੋਰਟਲ ਹੁਣ ਪੂਰੇ ਭਾਰਤ ਵਿੱਚ ਫਿਲਮ ਨਾਲ ਸਬੰਧਿਤ ਸਹੂਲਤ ਲਈ ਇੱਕ ਸਿੰਗਲ-ਵਿੰਡੋ ਸਿਸਟਮ ਵਜੋਂ ਕੰਮ ਕਰਦਾ ਹੈ, ਜੋ ਕਿ ਕੇਂਦਰ, ਰਾਜ ਅਤੇ ਸਥਾਨਕ ਪੱਧਰ 'ਤੇ ਫਿਲਮਾਂਕਣ ਪ੍ਰਵਾਨਗੀਆਂ, ਪ੍ਰੋਤਸਾਹਨ ਅਤੇ ਸਰੋਤ ਮੈਪਿੰਗ ਤੱਕ ਏਕੀਕ੍ਰਿਤ ਪਹੁੰਚ ਦੀ ਪੇਸ਼ਕਸ਼ ਕਰਦਾ ਹੈ। 7 ਰਾਜਾਂ ਅਤੇ 2 ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਨੇ ਪਹਿਲਾਂ ਹੀ ਸਮੁੱਚਾ ਏਕੀਕਰਣ ਪੂਰਾ ਕਰ ਲਿਆ ਹੈ, ਜਦਕਿ 21 ਰਾਜਾਂ ਅਤੇ 6 ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਨੂੰ ਇੱਕ ਸਾਂਝੇ ਐਪਲੀਕੇਸ਼ਨ ਫਾਰਮ ਰਾਹੀਂ ਸ਼ਾਮਲ ਕੀਤਾ ਗਿਆ।

ਇੰਡੀਆ ਸਿਨੇ ਹੱਬ ਪੋਰਟਲ ਨੇ ਜੀਆਈਐੱਸ-ਅਧਾਰਿਤ ਸਥਾਨ ਮੈਪਿੰਗ, ਉਦਯੋਗ ਪੇਸ਼ੇਵਰਾਂ ਤੋਂ ਕ੍ਰਾਊਡ-ਸੋਰਸ ਕੀਤੀ ਸਮੱਗਰੀ ਅਤੇ ਫਿਲਮਾਂਕਣ, ਗੈਰ-ਫਿਲਮਾਂਕਣ ਅਤੇ ਪ੍ਰੋਤਸਾਹਨ ਲਈ ਵੱਖ-ਵੱਖ ਕਾਰਜ ਪ੍ਰਵਾਹਾਂ ਦਾ ਸਮਰਥਨ ਕੀਤਾ। ਕਾਨਫਰੰਸ ਨੇ ਇੱਕ ਆਲਮੀ ਫਿਲਮਿੰਗ ਟਿਕਾਣੇ ਵਜੋਂ ਭਾਰਤ ਦੀ ਅਪੀਲ ਨੂੰ ਬਿਹਤਰ ਬਣਾਉਣ ਲਈ ਐਪਲੀਕੇਸ਼ਨਾਂ ਦੀ ਪ੍ਰਕਿਰਿਆ ਅਤੇ ਪ੍ਰਮਾਣਿਤ ਡੇਟਾ ਦਾ ਯੋਗਦਾਨ ਪਾਉਣ 'ਤੇ ਚਰਚਾ ਕੀਤੀ।

ਕਾਨਫਰੰਸ ਵਿੱਚ ਘੱਟ ਸੇਵਾ ਵਾਲੇ ਖੇਤਰਾਂ ਵਿੱਚ ਘੱਟ ਲਾਗਤ ਵਾਲੇ ਸਿਨੇਮਾ ਹਾਲਾਂ ਦੇ ਪ੍ਰਚਾਰ 'ਤੇ ਵੀ ਚਰਚਾ ਕੀਤੀ ਗਈ। ਭਾਰਤ ਵਿਸ਼ਵ ਪੱਧਰ 'ਤੇ ਫਿਲਮਾਂ ਦੇ ਸਭ ਤੋਂ ਵੱਡੇ ਨਿਰਮਾਤਾਵਾਂ ਵਿੱਚੋਂ ਇੱਕ ਹੋਣ ਦੇ ਬਾਵਜੂਦ, ਸਿਨੇਮਾ ਬੁਨਿਆਦੀ ਢਾਂਚੇ ਤੱਕ ਪਹੁੰਚ ਗੈਰ ਬਰਾਬਰ ਰਹੀ ਹੈ। ਮੰਤਰਾਲੇ ਨੇ ਟੀਅਰ-3 ਅਤੇ ਟੀਅਰ-4 ਕਸਬਿਆਂ, ਪੇਂਡੂ ਖੇਤਰਾਂ ਅਤੇ ਖਾਹਿਸ਼ੀ ਜ਼ਿਲ੍ਹਿਆਂ ਦੀ ਸੇਵਾ ਲਈ ਮੌਡਿਊਲਰ ਅਤੇ ਮੋਬਾਈਲ ਸਿਨੇਮਾ ਮਾਡਲਾਂ ਦੇ ਵਿਕਾਸ ਦਾ ਪ੍ਰਸਤਾਵ ਰੱਖਿਆ।

ਕਾਨਫਰੰਸ ਵਿੱਚ ਜੀਆਈਐੱਸ ਮੈਪਿੰਗ ਦੀ ਵਰਤੋਂ ਕਰਕੇ ਘੱਟ ਸਕ੍ਰੀਨ ਘਣਤਾ ਵਾਲੇ ਖੇਤਰਾਂ ਨੂੰ ਚਿੰਨ੍ਹਿਤ ਕਰਨ, ਮੌਜੂਦਾ ਜਨਤਕ ਬੁਨਿਆਦੀ ਢਾਂਚੇ ਨੂੰ ਮੁੜ ਵਰਤੋਂ ਵਿੱਚ ਲਿਆਉਣ, ਸਿੰਗਲ-ਵਿੰਡੋ ਪ੍ਰਣਾਲੀਆਂ ਰਾਹੀਂ ਲਾਇਸੈਂਸਿੰਗ ਨੂੰ ਸੁਚਾਰੂ ਬਣਾਉਣ ਅਤੇ ਕਿਫਾਇਤੀ ਸਿਨੇਮਾ ਬੁਨਿਆਦੀ ਢਾਂਚੇ ਵਿੱਚ ਨਿਜੀ ਨਿਵੇਸ਼ ਨੂੰ ਆਕਰਸ਼ਿਤ ਕਰਨ ਲਈ ਟੈਕਸ ਅਤੇ ਭੂਮੀ ਨੀਤੀ ਪ੍ਰੋਤਸਾਹਨ ਦੀ ਪੇਸ਼ਕਸ਼ ਕਰਨ ਬਾਰੇ ਚਰਚਾ ਕੀਤੀ ਗਈ।

ਇੰਟਰਨੈਸ਼ਨਲ ਫਿਲਮ ਫੈਸਟੀਵਲ ਆਫ਼ ਇੰਡੀਆ (ਇਫ਼ੀ) ਅਤੇ ਵੇਵਸ ਬਜ਼ਾਰ ਵਰਗੇ ਪ੍ਰਮੁੱਖ ਫਿਲਮ ਅਤੇ ਸਮੱਗਰੀ ਪਲੈਟਫਾਰਮਾਂ ਵਿੱਚ ਭਾਗੀਦਾਰੀ ਵੀ ਵਿਚਾਰ-ਵਟਾਂਦਰੇ ਵਿੱਚ ਸ਼ਾਮਲ ਕੀਤੇ ਗਏ। ਰਾਜਾਂ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਨੂੰ ਆਪਣੇ ਫਿਲਮਾਂਕਣ ਸਥਾਨਾਂ ਨੂੰ ਪ੍ਰਦਰਸ਼ਿਤ ਕਰਨ, ਖੇਤਰੀ ਪ੍ਰੋਤਸਾਹਨ ਨੂੰ ਉਤਸ਼ਾਹਿਤ ਕਰਨ ਅਤੇ ਸਥਾਨਕ ਪ੍ਰਤਿਭਾ ਦਾ ਸਮਰਥਨ ਕਰਨ ਲਈ ਇਨ੍ਹਾਂ ਪਲੈਟਫਾਰਮਾਂ ਦੀ ਵਰਤੋਂ ਕਰਨ ਲਈ ਉਤਸ਼ਾਹਿਤ ਕੀਤਾ ਗਿਆ। 55ਵੇਂ ਇਫ਼ੀ ਵਿੱਚ 114 ਦੇਸ਼ਾਂ ਤੋਂ ਭਾਗੀਦਾਰੀ ਦੇਖਣ ਨੂੰ ਮਿਲੀ ਸੀ ਅਤੇ ਸਬੰਧਿਤ ਵੇਵਸ ਬਜ਼ਾਰ ਨੇ 30 ਦੇਸ਼ਾਂ ਦੇ 2,000 ਤੋਂ ਵੱਧ ਉਦਯੋਗ ਪ੍ਰਤੀਨਿਧੀਆਂ ਦੀ ਮੇਜ਼ਬਾਨੀ ਕੀਤੀ ਸੀ। ਰਾਜਾਂ ਵਲੋਂ ਸਮਰਪਿਤ ਪੈਵੇਲੀਅਨ ਸਥਾਪਿਤ ਕਰਕੇ, ਭਾਰਤੀ ਪੈਨੋਰਮਾ ਵਿੱਚ ਐਂਟਰੀਆਂ ਦੀ ਸਹੂਲਤ ਦੇ ਕੇ ਅਤੇ ਆਲਮੀ ਐਕਸਪੋਜ਼ਰ ਲਈ ਰਚਨਾਤਮਕ ਪ੍ਰਤਿਭਾ ਨੂੰ ਨਾਮਜ਼ਦ ਕਰਕੇ ਇਨ੍ਹਾਂ ਮੌਕਿਆਂ ਦਾ ਲਾਭ ਲਿਆ ਜਾ ਸਕਦਾ ਹੈ।

ਚਰਚਾ ਦਾ ਇੱਕ ਹੋਰ ਪ੍ਰਮੁੱਖ ਖੇਤਰ ਭਾਰਤ ਦੀ ਲਾਈਵ ਮਨੋਰੰਜਨ ਅਰਥਵਿਵਸਥਾ ਦਾ ਵਿਕਾਸ ਸੀ। ਕਾਨਫਰੰਸ ਵਿੱਚ ਰਾਜਾਂ ਨਾਲ ਸਮਾਗਮਾਂ ਲਈ ਮੌਜੂਦਾ ਖੇਡਾਂ ਅਤੇ ਸੱਭਿਆਚਾਰਕ ਬੁਨਿਆਦੀ ਢਾਂਚੇ ਦੀ ਵਰਤੋਂ ਕਰਨ, ਇੰਡੀਆ ਸਿਨੇ ਹੱਬ ਵਿੱਚ ਪ੍ਰਵਾਨਗੀ ਕੰਮਾਂ ਨੂੰ ਏਕੀਕ੍ਰਿਤ ਕਰਨ, ਨੋਡਲ ਅਫਸਰਾਂ ਦੀ ਨਿਯੁਕਤੀ ਅਤੇ ਲਾਈਵ ਮਨੋਰੰਜਨ ਬੁਨਿਆਦੀ ਢਾਂਚੇ ਵਿੱਚ ਨਿਵੇਸ਼ ਲਈ ਨੀਤੀ ਅਤੇ ਵਿੱਤੀ ਸਹਾਇਤਾ ਸਥਾਪਿਤ ਕਰਨ ਬਾਰੇ ਵਿਚਾਰ-ਵਟਾਂਦਰਾ ਕੀਤਾ ਗਿਆ।

ਇਸ ਉੱਚ-ਪੱਧਰੀ ਗੱਲਬਾਤ ਦਾ ਮੰਤਵ ਮੀਡੀਆ, ਸੰਚਾਰ ਅਤੇ ਰਚਨਾਤਮਕ ਅਰਥਵਿਵਸਥਾ ਦੇ ਵਿਕਾਸ ਵਿੱਚ ਸਹਿਯੋਗ ਨੂੰ ਮਜ਼ਬੂਤ ਕਰਨਾ ਸੀ, ਜਿਸ ਨਾਲ ਇੱਕ ਡਿਜੀਟਲ ਤੌਰ 'ਤੇ ਸਸ਼ਕਤ ਅਤੇ ਸੱਭਿਆਚਾਰਕ ਤੌਰ 'ਤੇ ਜੀਵੰਤ ਸਮਾਜ ਵਜੋਂ ਭਾਰਤ ਦੇ ਵਿਕਾਸ ਵਿੱਚ ਯੋਗਦਾਨ ਪਾਇਆ ਜਾ ਸਕੇ।

****

ਧਰਮੇਂਦਰ ਤਿਵਾਰੀ/ ਨਵੀਨ ਸ਼੍ਰੀਜਿਤ