गोवा, 21 जून 2025

 

गोवा शिपयार्ड लिमिटेड (जीएसएल) या संरक्षण मंत्रालयाच्या अंतर्गत असलेल्या प्रमुख सार्वजनिक क्षेत्रातील उपक्रमाने आंतरराष्ट्रीय योग दिन 2025 उत्साहात साजरा करत समग्र आरोग्य आणि कल्याणासाठी आपली वचनबद्धता पुन्हा अधोरेखित केली. या वर्षीच्या “एक पृथ्वी,एक आरोग्य साठी योग ” या जागतिक संकल्पनेवर आधारित कार्यक्रम चिकाळीम,वास्को-द-गामा येथील जीएसएल ऑफिसर्स एन्क्लेव्हच्या बॅडमिंटन कोर्टावर आयोजित करण्यात आला होता.

या सकाळच्या सत्रामध्ये जीएसएल कर्मचारी, सीआयएसएफ जवान, स्थानिक नागरिक आणि त्यांच्या कुटुंबीयांनी मोठ्या संख्येने सहभाग घेतला. हे सत्र प्रशिक्षित योग प्रशिक्षकांमार्फत आयोजित करण्यात आले होते. कार्यक्रमात पंतप्रधानांच्या योगाभ्यासाचे थेट प्रसारण देखील दाखवण्यात आले.

सत्रामध्ये योगासने, प्राणायाम आणि ध्यानधारणा यांचे शिस्तबद्ध मार्गदर्शन झाले. यामध्ये शारीरिक स्फूर्ती, मानसिक स्पष्टता आणि पर्यावरणीय समतोल वाढविण्यावर भर देण्यात आला.

योगाभ्यासाबरोबरच, जीवनशैली विकार आणि तणाव व्यवस्थापन यावर माहितीपर व्याख्याने घेण्यात आली. त्यामुळे संतुलित शरीर आणि मन हे उत्पादक आणि सक्षम कार्यशक्तीचे आधारस्तंभ आहेत, हे अधोरेखित करण्यात आले.

जीएसएल ही संस्था आरोग्यदायी जीवनशैली आणि योगाभ्यासाला आपल्या कार्यसंस्कृतीचा अविभाज्य भाग मानते आणि नियमितपणे कर्मचाऱ्यांना योगाचा आत्मसात आणि स्वीकार करण्यासाठी प्रोत्साहित करत राहते.

 

* * *

PIB Panaji | M.Pange/G.Deoda/D.Rane

 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

(Release ID: 2138612)