زراعت اور کسانوں کی بہبود اور دیہی ترقی کے مرکزی وزیر، جناب شو راج سنگھ چوہان نے وکست کرشی سنکلپ ابھیان کو ایک انتہائی مؤثر اقدام کے طور پر سراہا جس نے پورے ملک میں وسیع پیمانے پر کامیابی حاصل کی ہے۔ انہوں نے اس بات پر زور دیا کہ یہ مہم ایک بار کی کوشش نہیں ہے، یہ ہندوستانی زراعت کو جدید بنانے اور کسانوں کی خوشحالی کو براہ راست کھیت کی سطح کی مصروفیت کے ذریعے بڑھانے کے لیے ایک مسلسل تحریک کا آغاز ہے۔ مہم کے ایک حصے کے طور پر سائنسدانوں، حکام اور زرعی ماہرین پر مشتمل 2,170 ٹیموں نے 1.42 لاکھ سے زیادہ دیہات کا دورہ کیا، 1.34 کروڑ سے زیادہ کسانوں سے براہ راست بات چیت کی۔ اس پہل میں وزرائے اعلیٰ، مرکزی وزرا، ریاستی وزرا، ارکان پارلیمنٹ، ایم ایل اے اور نچلی سطح کے نمائندوں کی ایک بڑی تعداد کی فعال شرکت دیکھی گئی۔

مرکزی وزیر زراعت نے میڈیا سے خطاب کرتے ہوئے زرعی ترقی اور کسانوں کی بہبود کو بڑھانے کے لیے فوری اقدامات کے سلسلے کا اعلان کیا۔ انھوں نے علم، تحقیق اور ادارہ جاتی صلاحیتوں میں موجودہ خلا کو پُر کرنے کی ضرورت پر زور دیا تاکہ کسانوں کے لیے ٹھوس فوائد کو یقینی بنایا جا سکے۔ کرشی وگیان کیندروں (KVK) کے اہم کردار پر روشنی ڈالتے ہوئے، وزیر نے کہا کہ KVK کو ہر ضلع میں نوڈل ایجنسیوں کے طور پر نامزد کیا جائے گا۔ یہ کسانوں کی ضروریات کو پورا کرنے کے لیے مربوط ٹیموں کے طور پر کام کریں گی۔ پورے ملک میں کے وی کے نظام میں یکسانیت اور ساختی استحکام لانے کی کوششیں بھی کی جائیں گی۔ کاشت کار برادریوں کے ساتھ براہ راست تعلق کو یقینی بنانے کے لیے، کے وی کے کے سائنسدانوں کو اب ہفتے میں کم از کم تین دن کھیت میں گزارنے کا پابند بنایا جائے گا۔ اپنی ذاتی وابستگی کا اعادہ کرتے ہوئے، جناب چوہان نے مزید کہا کہ وہ خود ہفتے میں دو دن کھیتوں کا دورہ کریں گے تاکہ زمین پر موجود کسانوں سے رابطہ قائم کریں اور ان کے مسائل کو پہلے ہی سمجھ سکیں۔

جناب چوہان نے اس بات پر زور دیا کہ زرعی چیلنجوں کی صحیح سمجھ ایئر کنڈیشنڈ دفتر میں بیٹھ کر حاصل نہیں کی جا سکتی ہے۔ لہٰذا، تمام زرعی عملے کے لیے کھیتوں کا دورہ ایک بنیادی آپریشنل ترجیح بن جائے گی۔ قومی سطح پر جناب چوہان نے ترقی پذیر زراعت اور کسانوں کی خوشحالی کے لیے کام کرنے والے تمام اداروں کے درمیان زیادہ سے زیادہ تال میل کی ضرورت پر زور دیا۔ کوششوں کو ہموار کرنے کے لیے انھوں نے کلیدی اسٹیک ہولڈروں کے کام کاج کو ہم آہنگ کرنے کے لیے ایک سنٹرلائزڈ کوآرڈینیشن میکانزم کے قیام کا اعلان کیا۔ اس کے علاوہ، انڈین کونسل آف ایگریکلچرل ریسرچ (آئی سی اے آر) زراعت کے لیے ایک ریاستی نوڈل افسر کا تقرر کرے گی۔ یہ افسر سائنسی تحقیقات کی نگرانی کرنے، ریاست کے مخصوص چیلنجوں کی نشاندہی کرنے، ماہرانہ مشورے کی پیشکش کرنے اور ریاستی حکومتوں کے ساتھ قریبی رابطے کو برقرار رکھنے کے لیے ذمے دار ہوگا۔ اس کا مقصد اس بات کو یقینی بنانا ہے کہ سائنسی بصیرت اور پالیسی کے رد عمل ہر علاقے کی منفرد ضروریات کے مطابق ہوں۔ وزیر نے یہ بھی یقین دہانی کرائی کہ وہ سینیئر عہدیداروں کے ساتھ مل کر حکمت عملیوں کو ہم آہنگ کرنے اور علاقائی طور پر متعلقہ زرعی حل فراہم کرنے کے لیے ریاستی حکومتوں کے ساتھ باقاعدہ مشاورت کریں گے۔

جناب چوہان نے مہم کے دوران مہم کے دوران اجاگر کیے گئے دو اہم خدشات، غیر معیاری بیجوں اور کیڑے مار ادویات پر روشنی ڈالی۔ انھوں نے کہا کہ وزارت سیڈ ایکٹ کو مضبوط بنانے اور کوالٹی کنٹرول کے سخت طریقہ کار کو یقینی بنانے کے لیے سخت اقدامات کرے گی تاکہ صرف تصدیق شدہ، اعلیٰ معیار کی معلومات ہی کسانوں تک پہنچیں۔ انھوں نے کہا، ”اس مہم کا مقصد ریسرچ لیب اور زرعی شعبوں کے درمیان خلا کو پُر کرنا ہے۔ ہم نے قابل ذکر کام ہوتے دیکھا ہے، لیکن چیلنج برقرار ہیں۔ ہماری توجہ اب پیداواری صلاحیت کو بڑھانے، ان پٹ لاگت کو کم کرنے اور اس بات کو یقینی بنانے پر ہونی چاہیے کہ زراعت ہر کسان کے لیے منافع بخش اور پائیدار ذریعہ معاش بن جائے۔“

جناب چوہان نے کہا کہ وزیر اعظم جناب نریندر مودی کی قیادت میں گزشتہ 11 برسوں میں غذائی اجناس کی پیداوار میں 40 فیصد اضافہ ہوا ہے، جو کہ مسلسل اور حکمت عملی سے متعلق پالیسی کے نفاذ کا نتیجہ ہے۔ ”ہمارا مشن مستقبل کی نسلوں کے لیے مٹی کی صحت کو محفوظ رکھتے ہوئے غذائی تحفظ، غذائیت کی دستیابی، اور منافع بخش کاشت کاری کو یقینی بنانا ہے۔ ہندوستان کو ایک عالمی فوڈ باسکٹ کے طور پر ابھرنا چاہیے“، انھوں نے کہا۔

جناب چوہان نے ”ایک ملک - ایک زراعت - ایک ٹیم“ کے وژن کا خاکہ پیش کیا اور ایک ایسے مربوط پلیٹ فارم کی ضرورت پر زور دیا جہاں کسان، سائنس دان، ادارے اور پالیسی ساز ترقی یافتہ زراعت اور کسانوں کی خوش حالی کے مشترکہ مقصد کو حاصل کرنے کے لیے تعاون کریں۔

مہم نے درج ذیل غیر محفوظ علاقوں پر خصوصی توجہ کے ساتھ، جامع رسائی پر زور دیا:

• 177 قبائلی اضلاع کے 1,024 بلاک میں 8,000 سے زیادہ پروگرام منعقد کیے گئے، جو تقریباً 18 لاکھ کسانوں تک پہنچے۔
• 112 پرامید اضلاع میں، ٹیموں نے تقریباً 6,800 گاؤں کا دورہ کیا اور 15 لاکھ کسانوں کے ساتھ کام کیا۔
• دور دراز اور اسٹریٹجک علاقوں تک رسائی کو یقینی بنانے کے لیے تقریباً 100 سرحدی اضلاع اور متحرک دیہاتوں کا احاطہ کیا گیا۔

مہم کی ایک اہم خصوصیت کسان چوپال تھی، جس میں سائنسدانوں اور کسانوں کے درمیان براہ راست اور بامعنی مکالمے کی سہولت فراہم کی گئی۔ بات چیت میں فصلوں کی زرعی موسمی موافقت، بیج کی اقسام، مٹی کی صحت اور کیڑوں کا انتظام شامل تھا۔ دو اہم بصیرتیں سامنے آئیں:

1. مقامی تحقیق اہم ہے — تحقیق کی ترجیحات کو زمینی حقائق سے آگاہ کیا جانا چاہیے، نہ کہ صرف مرکزی ہدایات سے۔
2. اختراع کرنے والے کے طور پر کسان — بہت سے کسانوں نے مقامی ضروریات کے مطابق دیسی اختراعات کا مظاہرہ کیا، یہاں تک کہ تجربہ کار سائنسدانوں کو بھی حیران کر دیا۔

کئی کسانوں نے پالیسی سے متعلق خدشات بھی اٹھائے، جیسے:

• موسمیاتی تبدیلی کے لیے مربوط ایکشن پلان کی ضرورت۔
• نامیاتی کاشتکاری سرٹیفیکیشن کو آسان بنانا۔
• ایک جامع چارہ پالیسی تشکیل دینا۔
• فارمر پروڈیوسر آرگنائزیشن (ایف پی او) کو زیادہ عملی اور مؤثر بنانا۔

کسانوں پر مبنی پالیسی سازی اور مانگ پر مبنی تحقیق کی اہمیت کو اجاگر کرتے ہوئے جناب چوہان نے کہا کہ یہ سفارشات مستقبل کی پالیسی کی ترقی کے لیے لازمی ہوں گی۔ انھوں نے یہ بھی کہا کہ ’کھیت سب سے مستند تجربہ گاہ ہے، اور کسان کی آواز کو ہماری رہنمائی کرنی چاہیے۔‘ پریس کانفرنس میں جناب دیوش چترویدی، سکریٹری (ایم او اے اینڈ ایف ڈبلیو) اور ڈاکٹر ایم ایل جاٹ، سکریٹری (ڈی اے آر ای) اور ڈائریکٹر جنرل (آئی سی اے آر) نے بھی شرکت کی۔

**********

ش ح۔ ف ش ع

U: 1875