وزارت تعلیم کے اسکولی تعلیم اور خواندگی کے محکمے (ڈی او ایس ای ایل) کے سکریٹری جناب سنجے کمار نے پُر ولولہ اور پرجوش 20اسکولی بچوں کے ایک گروپ کو جھنڈی دکھا کر روانہ کیا، جنہیں ہندوستان سے سکورا پروگرام 2025 میں حصہ لینے کے لیے مدعو کیا گیا ہے۔ ڈی او ایس ای ایل کی جوائنٹ سکریٹری محترمہ ارچنا شرما اوستھی؛ این سی ای آر ٹی کے جوائنٹ ڈائریکٹرپروفیسر پرکاش چندر اگروال اور وزارت تعلیم کے دیگر عہدیدار بھی اس تقریب میں موجود تھے ۔

جناب سنجے کمار نے تقریب سے خطاب کرتے ہوئے اس بات پر زور دیا کہ یہ پروگرام جاپان جیسے ترقی یافتہ ملک دیکھنے کا ایک سنہری موقع پیش کرتا ہے ۔ انہوں نے مزید زور دے کر کہا کہ تمام طلباء اور ان کے ساتھ آنے والے اساتذہ کے لیے یہ ضروری ہے کہ وہ مستقبل کے اختراع کاروں کو تیار کرنے اور دو طرفہ تعلقات کو مستحکم کرنے پر اس کے گہرے اثرات کو تسلیم کرتے ہوئے اس سکورا سائنس کے سفر کی بے پناہ اہمیت کو پوری طرح سے سمجھیں ۔

اس گروپ میں، جاپان سائنس اینڈ ٹیکنالوجی ایجنسی (جے ایس ٹی) نے 15 سے 21 جون 2025 کے درمیان کی مدت کے لیے تین دیگر ممالک (ملیشیا، تائیوان اور یوکرین) کے شرکاء کے ساتھ ساتھ ہندوستان سے 20 اسکولی طلباء اور 2 سپروائزرز کو مدعو کیا ہے ۔ یہ 20 طلباء (7 لڑکے اور 13 لڑکیاں) جواہر نوودیہ ودیالیہ اور انڈمان و نکوبار جزائر، لداخ، میزورم، ناگالینڈ اور تریپورہ کے سرکاری اسکولوں سے ہیں۔

دانشورانہ افق کو وسیع کرنے اور نوجوان سیکھنے والوں میں سائنسی جستجو کو فروغ دینے کے لیے، جاپان سائنس اینڈ ٹیکنالوجی ایجنسی (جے ایس ٹی) 2014 سے 'جاپان-ایشیا یوتھ ایکسچینج پروگرام ان سائنس' کو نافذ کر رہی ہے ، جسے 'سکورا سائنس پروگرام' بھی کہا جاتا ہے۔ ہندوستان کو 2016 میں سکورا پروگرام میں شامل کیا گیا تھا۔ اس پروگرام کے تحت ، طلباء کو جاپان کے قلیل مدتی دوروں کے لیے مدعو کیا جاتا ہے، جو انہیں جاپان کی جدید ترین سائنس اور ٹیکنالوجی کے ساتھ ساتھ اس کی متمول ثقافت کا تجربہ کرنے کا موقع فراہم کرتا ہے۔

قومی تعلیمی پالیسی (این ای پی) 2020، اسکولوں میں نصاب اور تدریس کی اہمیت پر زور دیتے ہوئے اس بات کی توثیق کرتی ہے کہ ’’سیکھنے کا تجربہ مجموعی، مربوط، خوشگوار اور اپنے آپ میں مشغول کرنے والا ہونا چاہیے۔ مزید برآں، این ای پی-2020 میں کہا گیا ہے کہ تمام مراحل میں، تجرباتی تعلیم کو ہر مضمون کے اندر معیاری تدریس کے طور پر اپنایا جائے گا اور مختلف مضامین کے درمیان تعلقات کا بغور جائزہ لیا جائے گا۔ اس تناظر میں تاریخی، ثقافتی، سماجی، سائنسی اور تکنیکی اہمیت کے حامل مقامات کے تعلیمی دورے اور سیر بہت اہمیت کے حامل ہیں۔ جاپان، ایک ترقی یافتہ اور دوستانہ ملک کے طور پر جو اپنی تکنیکی ترقی کے لیے جانا جاتا ہے، تعلیمی تجربے کے لیے بھی ایک ترجیحی مقام ہے ۔ لہذا ، جاپان جیسے ملک کا دورہ کرنے سے ہمیشہ معلومات افزا ہوتا ہے اور اختراعی طریقوں کے جائزے کا موقع فراہم کرتا ہے ۔

ہندوستان نے پہلی بار اپریل 2016 میں اس پروگرام میں حصہ لیا۔ اس پروگرام کے تحت اب تک 91 سپروائزرز کے ساتھ 619 طلباء جاپان کا دورہ کر چکے ہیں ۔ حال ہی میں ایک گروپ نے نومبر 2024 میں جاپان کا دورہ کیا ۔

*****

 ش ح۔ ک ح۔ ج ا

U.No. 1768

(Release ID: 2136567)