CSIR-સેન્ટ્રલ સોલ્ટ એન્ડ મરીન કેમિકલ્સ રિસર્ચ ઇન્સ્ટિટ્યૂટ (CSMCRI), ભાવનગરે આંતરરાષ્ટ્રીય વૈજ્ઞાનિક સહયોગ તરફ એક સીમાચિહ્નરૂપ પગલામાં તા. 9 જૂન, 2025ના રોજ ફિલિપાઇન્સની પંગાસીનન સ્ટેટ યુનિવર્સિટી (PSU) સાથે સમજૂતી કરાર (MoU) પર હસ્તાક્ષર કર્યા છે. આ ભાગીદારીનો હેતુ મીઠાના ઉત્પાદનમાં અદ્યતન તકનીકોનો સંયુક્ત રીતે વિકાસ અને પ્રોત્સાહન આપવાનો છે.

ફિલિપાઇન્સના પ્રતિષ્ઠિત પ્રતિનિધિઓની હાજરીમાં આ MoU પર હસ્તાક્ષર કરવામાં આવ્યા હતા. જેમાં વિજ્ઞાન અને ટેકનોલોજી વિભાગ (DOST) અને મારિયાનો માર્કોસ સ્ટેટ યુનિવર્સિટીના પ્રતિનિધિઓનો સમાવેશ થાય છે. CSMCRIના ડિરેક્ટર ડૉ. કન્નન શ્રીનિવાસને માહિતી આપી હતી કે ‘આ સહયોગ પરસ્પર સંશોધન અને વિકાસ પહેલ પર, ખાસ કરીને આધુનિક મીઠાના ઉત્પાદન, પટલ ટેકનોલોજી અને દરિયાઈ બાયોટેકનોલોજીના ક્ષેત્રોમાં’ ધ્યાન કેન્દ્રિત કરશે.

પંગાસીનન સ્ટેટ યુનિવર્સિટી દેશના નમક ક્ષેત્રમાં ક્રાંતિ લાવવા માટે રચાયેલ ફિલિપાઇન્સમાં એક મુખ્ય કાર્યક્રમ, એક્સિલરેટિંગ સોલ્ટ રિસર્ચ એન્ડ ઇનોવેશન (ASIN) સેન્ટરની સ્થાપનાનું નેતૃત્વ કરી રહી છે. CSIR-CSMCRI ની દાયકાઓ જૂની કુશળતાનો ઉપયોગ કરીને, ASIN સેન્ટરનો ઉદ્દેશ્ય પરંપરાગત મીઠાની ખેતી પદ્ધતિઓમાં અદ્યતન નવીનતાઓ અને ટકાઉપણું લાવવાનો છે.

આ વધતી જતી દ્વિપક્ષીય ભાગીદારીના ભાગ રૂપે, 10 જૂન, 2025ના રોજ અદ્યતન મીઠું, પાણી અને દરિયાઈ તકનીકો પર દ્વિપક્ષીય ભારત-ફિલિપાઇન્સ આંતરરાષ્ટ્રીય સેમિનારનું પણ આયોજન કરવામાં આવ્યું હતું. આ સેમિનાર બંને દેશોના નિષ્ણાતો, નીતિ નિર્માતાઓ અને સંશોધકોને દરિયાઈ અને પાણી આધારિત તકનીકોમાં જ્ઞાનનું આદાન-પ્રદાન કરવા અને નવી સીમાઓ શોધવા માટે એકસાથે લાવ્યુ હતું.

(Release ID: 2135707)