मुंबई, 24 मार्च 2025

 

"प्रति एकर उत्पादन वाढवणे आणि प्रक्रिया गुणवत्ता सुधारणे हे आमचे ध्येय आहे जेणेकरून भारतातून मूल्य साखळीच्या कोणत्याही टप्प्यावर कापूस खरेदी करणारे आंतरराष्ट्रीय ब्रँड कायमस्वरूपी खरेदीदार बनतील." भारत सरकारच्या वस्त्रोद्योग मंत्रालयाच्या वस्त्रोद्योग आयुक्त  रूप राशी यांनी आज मुंबईत पत्रकार परिषदेत ही माहिती दिली. त्यांनी कापूस क्षेत्रातील प्रमुख घडामोडींचा उल्लेख केला आणि उत्पादकता व गुणवत्ता वाढवण्याच्या उद्देशाने कापूस उत्पादन, व्यापार आणि उपक्रमांबाबत अभ्यासपूर्ण  माहिती सामायिक केली.

कापूस हंगाम 2024-25 साठी आज वस्त्रोद्योग आयुक्तांच्या अध्यक्षतेखाली कापूस उत्पादन आणि उपभोग समिती (सीओसीपीसी) ची दुसरी बैठक पार पाडली , त्यानंतर पत्रकार परिषद झाली. या बैठकीत केंद्र सरकार, राज्य सरकारे, वस्त्रोद्योग, कापूस व्यापार आणि जिनिंग आणि प्रेसिंग क्षेत्राचे प्रतिनिधी सहभागी झाले होते.

माध्यमांशी संवाद साधताना, वस्त्रोद्योग आयुक्त रूप राशी यांनी वस्त्रोद्योग क्षेत्रावर सरकार सातत्याने देत असलेला भर अधोरेखित केला. त्या म्हणाल्या : "आपल्या सर्वांना माहित आहे की, केंद्र सरकारसाठी विकासाच्या दृष्टीने  वस्त्रोद्योग हे एक प्रमुख क्षेत्र  आहे. या संदर्भात, या क्षेत्रातील वाढ आणि नवोन्मेषाला चालना देण्यासाठी केंद्रीय अर्थसंकल्पात कापूस तंत्रज्ञान अभियानाची घोषणा करण्यात आली आहे."

एक प्रमुख फायबर आणि कापड मूल्य साखळीत महत्त्वाचे योगदान देणारा घटक म्हणून त्यांनी कापसाचे महत्त्व अधोरेखित केले. हितधारकांच्या सहकार्याने क्षेत्रीय कार्यालय स्तरावर सातत्याने  मूल्यांकन केल्याने उद्योगाची ताकद आणि उदयोन्मुख गरजा प्रभावीपणे पूर्ण होतील हे सुनिश्चित होते.

वस्त्रोद्योग आयुक्तांनी विश्वास व्यक्त केला की  उत्पादकता आणि गुणवत्तेवर लक्ष केंद्रित करून सर्व संबंधितांसाठी  कापड मूल्य साखळी यापुढेही मजबूत परतावा देत राहील.  कापसाची गुणवत्ता वाढवण्यासाठी त्यांनी प्रमुख उपक्रम अधोरेखित केले , ते पुढीलप्रमाणे आहेत :

भारतातील कापसाला जागतिक स्तरावरील उच्च गुणवत्तेचे उत्पादन म्हणून स्थापित करण्यासाठी "कस्तुरी" अंतर्गत ब्रँडिंग.

 उत्कृष्ट फायबर गुणवत्ता राखण्यासाठी सुधारित जिनिंग प्रक्रिया.

 एचडीपीएस (उच्च-घनता लागवड प्रणाली) आणि प्रगत शेती तंत्रांद्वारे उत्पादन वाढवण्यासाठी कृषी मंत्रालयाबरोबर सहकार्य.

भारतीय कापूस महामंडळाचे  अध्यक्ष आणि व्यवस्थापकीय संचालक, ललित कुमार गुप्ता यांनी केंद्र सरकारने  उत्पादनवाढीसाठी हाती घेतलेल्या  विविध उपक्रमांबाबत माहिती दिली. त्यांनी 'अकोला मॉडेल' विषयी सांगितले की, हे मॉडेल उच्च उत्पादनासाठी आधुनिक आणि प्रभावी शेती पद्धतींचा अवलंब करण्यास प्रोत्साहन देते.  

 

(Release ID: 2114625)