কেন্দ্ৰীয় মহিলা আৰু শিশু উন্নয়ন দপ্তৰৰ মন্ত্ৰী শ্ৰীমতী অন্নপূৰ্ণা দেৱীয়ে আজি গুৱাহাটীত অসম চৰকাৰৰ মহিলা আৰু শিশু উন্নয়ন বিভাগৰ উদ্যোগত  আয়োজিত "পোষণ ভি পঢ়াই ভি" কাৰ্যসূচীত অংশগ্ৰহণ কৰে । "পোষণ ভি পঢ়াই ভি" কাৰ্যসূচীত অংশগ্ৰহণ কৰি কেন্দ্ৰীয়  মন্ত্ৰীগৰাকীয়ে ৰাজ্যিক পৰ্যায়ৰ মাষ্টাৰ প্ৰশিক্ষকসকলক প্ৰমাণপত্ৰ বিতৰণ কৰে।

অনুষ্ঠানত  ভাষণ প্ৰদান কৰি শ্ৰীমতী দেৱীয়ে "পোষণ ভি  পঢ়াই ভি" কাৰ্যসূচীৰ জৰিয়তে শৈশৱৰ প্ৰাৰম্ভিক কালছোৱাৰ বিকাশৰ অৰ্থে  মহিলা আৰু শিশু উন্নয়ন মন্ত্ৰালয়ৰ প্ৰতিশ্ৰুতিৰ কথা দোহাৰে ।  উল্লেখ্য "পোষণ ভি  পঢ়াই ভি" কাৰ্যসূচীয়ে ৩-৬ বছৰ বয়সৰ শিশুসকলৰ বাবে মান সম্পন্ন  শিক্ষাৰ  বিষয়ত গুৰুত্ব আৰোপ কৰি আহিছে। মন্ত্ৰী শ্ৰীমতী দেৱীয়ে  লগতে এইবুলিও উল্লেখ কৰে যে এই কাৰ্যসূচীৰ  অধীনত ৩৫ খন ৰাজ্যৰ ২১,৭৭২ গৰাকী  মাষ্টাৰ প্ৰশিক্ষক আৰু ২০ খন ৰাজ্যৰ ৪২,৩০৮ গৰাকী  অংগনৱাড়ী কৰ্মীক প্ৰশিক্ষণ আগবঢ়োৱা হৈছে। তেনেদৰে প্ৰশিক্ষণ লাভ কৰাসকলৰ ভিতৰত   অসমৰ ১,৬০০ গৰাকী  মাষ্টাৰ প্ৰশিক্ষকো আছে বুলি কেন্দ্ৰীয় মন্ত্ৰীগৰাকীয়ে ভাষণ প্ৰসংগত  কয়।

নানান দিশত উত্তৰ-পূব অঞ্চলৰ অগ্ৰগতিৰ কথা উল্লেখ কৰি কেন্দ্ৰীয় মন্ত্ৰীগৰাকীয়ে তেনে অগ্ৰগতিৰ বিষয়ত সন্তোষ প্ৰকাশ কৰে আৰু  কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত যোৱা এটা দশকত উত্তৰ-পূবৰ বহুমাত্ৰিক উন্নয়ন সম্ভৱ হৈ উঠিছে।  তেওঁ উত্তৰ-পূবলৈ পুনৰ  শান্তিৰ পৰিবেশ ঘূৰাই অনা  , আন্তঃগাঁথনিৰ উন্নয়ন,  ৰে'ল, স্থলপথ আৰু আকাশী পথৰ জৰিয়তে সংযোগ বৃদ্ধিৰ লগতে শিক্ষা  তথা  স্বাস্থ্যৰ  দৰে ক্ষেত্ৰসমূহে লাভ কৰা  লক্ষ্যণীয়  উন্নয়ন তথা সাফল্যৰ বিষয়তো  আলোকপাত কৰে।

 

মহিলা সবলীকৰণৰ   বিষয়ত  আলোকপাত কৰি শ্ৰীমতী অন্নপূৰ্ণা দেৱীয়ে কয়  যে ৰাষ্ট্ৰীয় গ্ৰাম্য জীৱিকা অভিযানৰ জৰিয়তে প্ৰায় ১০ কোটি মহিলাই আত্মনিৰ্ভৰশীল হব পাৰিছে। ইয়াৰ ভিতৰত আত্মনিৰ্ভৰশীল হৈ নিজৰ ভৰিত নিজে থিয় দিবলৈ সক্ষম হোৱা অসমৰ মহিলাৰ সংখ্যা প্ৰায়  ৪৩ লাখ বুলিও তেওঁ  উল্লেখ কৰে। তেওঁ  লগতে পুষ্টিহীনতাৰ দৰে সমস্যা দূৰ কৰিবলৈ মন্ত্ৰালয়ে গ্ৰহণ কৰা অগীংকাৰৰ কথা প্ৰকাশ  কৰি কয় যে পোষণ পখৱাড়া আৰু পোষণ মাহৰ দৰে পদক্ষেপসমূহৰ  জৰিয়তে পুষ্টিহীনতাৰ বিৰুদ্ধে এখন সবল যুঁজ দিয়াটো এতিয়া সম্ভৱ হৈ উঠিছে   ।   এইক্ষেত্ৰত তেওঁ  অসমে মহিলা আৰু শিশুসকলৰ  স্বাস্থ্যকৰ জীৱনশৈলীৰ  প্ৰচাৰৰ  বাবে গ্ৰহণ কৰা ৩০ লাখতকৈও অধিক প্ৰচাৰ কাৰ্যসূচীৰ  অৱদানৰ  কথাও  উল্লেখ কৰে।

অসমত মহিলা আৰু শিশুৰ  উন্নয়নৰ প্ৰসংগ উল্লেখ কৰি  মন্ত্ৰীগৰাকীয়ে কয়  যে ৰাজ্যখনৰ  ৩৬টা ৱান ষ্টপ চেণ্টাৰে প্ৰায় ২১ হাজাৰ মহিলাক উপকৃত কৰিছে।  তেওঁ লগতে এই বুলিও প্ৰকাশ  কৰে যে  ২০২৪–২৫ চনৰ বাজেটৰ অধীনত অংগনবাড়ী কৰ্মী আৰু সহায়িকাসকলক আয়ুষ্মান ভাৰত-প্ৰধানমন্ত্ৰী জন আৰোগ্য যোজনাত অন্তৰ্ভুক্ত কৰা হৈছে আৰু প্ৰতিটো পৰিয়ালে  ৫ লাখ টকাৰ বাৰ্ষিক স্বাস্থ্য বীমাৰ সুবিধা লাভ কৰিছে।  অসমৰ ৬০,০০০ৰো অধিক অংগনবাড়ী কৰ্মী আৰু সহায়িকাৰ   হাতত এতিয়া আয়ুষ্মান কাৰ্ড আছে বুলি উল্লেখ কৰি মন্ত্ৰীগৰাকীয়ে কয় যে ইয়াৰ  ফলত তেওঁলোকে  স্বাস্থ্যসেৱাৰ উন্নত সুবিধা লাভ কৰাটো  সুনিশ্চিত হৈছে।

 

শ্ৰীমতী অন্নপূৰ্ণা দেৱীয়ে অসমৰ মহিলা আৰু শিশুৰ জীৱনৰ মান  উন্নত কৰাৰ বাবে চৰকাৰৰ দায়বদ্ধতাৰ কথাও  পুনৰবাৰ  দৃঢ়তাৰে দোহাৰে। তেওঁ সকলোৰে বাবে মানসম্পন্ন স্বাস্থ্যসেৱা, নিৰাপত্তা আৰু সুযোগ প্ৰদানৰ বাবে কেন্দ্ৰীয় চৰকাৰক   অসমৰ জনসাধাৰণে আগবঢ়োৱা  সহযোগিতাৰ প্ৰচেষ্টাক প্ৰশংসা কৰে।

 

অনুষ্ঠানত অসম চৰকাৰৰ মহিলা আৰু শিশু উন্নয়ন দপ্তৰৰ  মন্ত্ৰী শ্ৰীমতী অজন্তা নেওগে ৰাজ্যখনৰ সামগ্ৰিক অগ্ৰগতিৰ বাবে মহিলা আৰু শিশুৰ বিকাশৰ  গুৰুত্বৰ বিষয়ত আলোকপাত কৰে। মন্ত্ৰী নেওগে কেন্দ্ৰীয় চৰকাৰৰ আঁচনিসমূহ ফলপ্ৰসূভাৱে ৰূপায়ণ কৰাৰ বাবে মহিলা আৰু শিশু উন্নয়ন দপ্তৰৰ  নিষ্ঠাপূৰ্ণ কামকো  প্ৰশংসা কৰে।

শ্ৰীমতী অন্নপূৰ্ণা দেৱীয়ে  আজি   অসমত মহিলা আৰু শিশু উন্নয়ন দপ্তৰৰ আঁচনিসমূহৰ অগ্ৰগতিৰ বিষয়ে এখন  পৰ্যালোচনা বৈঠকতো  অংশগ্ৰহণ কৰে আৰু  আঁচনিসমূহৰ অগ্ৰগতিৰ বুজ  লয়।

BM/DM

(Release ID: 2079547)