مرکزی وزیر ڈاکٹر جتیندر سنگھ نے آج یہاں گاندھی میموریل کیمپ کالج میں ’’ماتا سرسوتی آڈیٹوریم‘‘ کا افتتاح کیا۔ مرکزی وزیر نے کہا کہ حکومت نے معاصر ہندوستان کے تقاضوں کے مطابق ہندوستان کے تعلیمی شعبے کے احیائے نو کے ایک عظیم مشن کا آغاز کیا ہے۔

قومی تعلیمی پالیسی (این ای پی) 2020 کی بنیادی خصوصیات کا ذکر کرتے ہوئے، انہوں نے اس بات پر زور دیا کہ اس تعلیمی پالیسی کے ذریعہ تعلیمی کورسز کا انتخاب کرتے وقت طلبہ وطالبات کو اپنے والدین اور ساتھیوں کے ذریعہ مسلط کردہ پسند کا قیدی بننے سے آزاد رہنے کی بنیاد فراہم ہوئی ہے۔ انہوں نے کہا کہ قومی تعلیمی پالیسی (این ای پی) کے نفاذ سے طلبہ وطالبات اب اپنی صلاحیتوں کے مطابق اعلیٰ تعلیمی کورسز کا انتخاب کرنے کے لیے آزاد ہیں۔

مرکزی وزیر ڈاکٹر جتیندر سنگھ جمعرات کے روز جموں میں گاندھی میموریل کیمپ کالج میں "ماتا سرسوتی آڈیٹوریم" کا افتتاح کرنے کے بعد مجمع سے خطاب کرتے ہوئے

ڈاکٹر جتیندر سنگھ نے اساتذہ سے اپیل کی کہ وہ طلبہ وطالبات کی موروثی صلاحیتوں کی نشاندہی کریں اور اسی کے مطابق ان کی رہنمائی کریں تاکہ وہ ملک کی تعمیر میں اپنا کردار ادا سکیں۔ انہوں نے کہا کہ ملک دیگر ممالک کے برابر ہے، بالخصوص تعلیم، سائنس اور ٹیکنالوجی اور اسٹارٹ اپس کے لحاظ سے ہم دوسروں کی برابری پر ہیں۔ انہوں نے بتایا کہ ہندوستان اسٹارٹ اپس کے معاملے میں نمبر 3 پر ہے۔

ڈاکٹر جتیندر سنگھ نے طلبہ وطالبات کے روشن مستقبل کی راہ ہموار کرنے میں اساتذہ کے تعمیری کردار پر زور دیا۔ انہوں نے ماہرین تعلیم سے اپیل کی کہ وہ اپنے طلبہ کو علم حاصل کرنے کے لیے ٹیکنالوجی سے فائدہ اٹھانے کی ترغیب دیں، انہوں نے مزید کہا کہ ان دنوں کفایتی لٹریچر آسانی سے دستیاب ہے۔ ہمالیہ کے دریافت شدہ حیاتیاتی وسائل کو استعمال کرنے کی اپیل کرتے ہوئے، ڈاکٹر جتیندر سنگھ نے کہا کہ ان میں ہندوستان کی معیشت کی قدر میں اضافہ ہونے کی صلاحیت ہے۔ انہوں نے اساتذہ پر زور دیا کہ وہ طلبہ وطالبات کو اسٹارٹ اپ کی پہل کو اپنانے کی ترغیب دیں جو ذاتی روزگار کے نئے شعبے بن کر ابھرے ہیں۔

وزیر موصوف نے بتایا کہ حکومت نے اسٹارٹ اپس کے بارے میں بیداری پیدا کرنے کے لیے ملک بھر میں اسٹارٹ اپ کی نمائشیں منعقد کرنے کا فیصلہ کیا ہے۔ انہوں نے مزید بتایا کہ ایسی ہی ایک نمائش جلد ہی سری نگر میں منعقد کی جائے گی۔ ڈاکٹر جتیندر سنگھ نے پرپل ریولیوشن کی کامیابی کو اجاگر کیا جس سے جموں و کشمیر کو اسٹارٹ اپس کے عالمی نقشے میں لایا گیا ہے۔

******

ش ح۔م ش ع۔  ول

Uno-1974

(Release ID: 2069946) Visitor Counter : 13