2035 ஆம் ஆண்டில் இந்தியாவுக்கு சொந்தமாக விண்வெளி நிலையம் இருக்கும், இது "பாரதிய விண்வெளி நிலையம்" என்று அழைக்கப்படும்

இந்திய விண்வெளி ஆராய்ச்சி நிறுவனம்  (இஸ்ரோ), உயிரி தொழில் நுட்பத்துறை  இடையே வரலாற்று முக்கியத்துவம் வாய்ந்த புரிந்துணர்வு ஒப்பந்தம் கையெழுத்திடப்படுவதாக அறிவித்த பின்னர் செய்தியாளர் ஒருவரின் கேள்விக்கு பதிலளித்த மத்திய அறிவியல் மற்றும் தொழில்நுட்பம் (தனிப்பொறுப்பு), புவி அறிவியல்துறை (தனிப்பொறுப்பு), விண்வெளி,  பிரதமர் அலுவலகம், பொதுமக்கள் குறைதீர்வு, ஓய்வூதியத்துறை இணையமைச்சர்  டாக்டர் ஜிதேந்திர சிங் இதனைத் தெரிவித்தார்.

ஒரு குறிப்பிடத்தக்க வளர்ச்சியாக, இந்தப் புரிந்துணர்வு ஒப்பந்தம் உயிரி தொழில்நுட்பத்தை விண்வெளி தொழில்நுட்பத்துடன் ஒருங்கிணைப்பதை நோக்கமாகக் கொண்ட ஒரு தனித்துவமான ஒத்துழைப்பைக் குறிக்கிறது, இது இந்தியாவில் அறிவியல் கண்டுபிடிப்புகளின் புதிய சகாப்தத்தை அறிவிக்கிறது.

பாரம்பரியமாக ஆய்வகங்களில் மட்டுமே இருந்த உயிரி தொழில்நுட்பத்தின் மாற்றத்தை ஏற்படுத்தும் பயணத்தை டாக்டர் ஜிதேந்திர சிங் எடுத்துரைத்தார். கோட்பாட்டு ஆராய்ச்சிக்கு அப்பால் உயிரி தொழில்நுட்பத்தின் நடைமுறை பயன்பாடுகளை நோக்கிய ஒரு முக்கிய படியாக இந்த புரிந்துணர்வு ஒப்பந்தம் பிரதிபலிக்கிறது என்று அவர் கூறினார்.

இந்த ஒத்துழைப்பை சாத்தியமாக்குவதில் இஸ்ரோ தலைவர் எஸ். சோம்நாத் மற்றும் உயிரி தொழில்நுட்பத் துறை செயலாளர் டாக்டர் ராஜேஷ் கோகலே ஆகியோரின் முயற்சிகளை அமைச்சர் பாராட்டினார். இரு துறைகளின் வரலாற்றுப் பயணம் மற்றும் தொலைநோக்குப் பார்வை கொண்ட தலைமை ஆகியவை அவற்றின் வெற்றிக்கு உந்துதலாக இருந்தன என்று அவர் குறிப்பிட்டார்.

 

இந்தியாவின் விண்வெளித் துறையின் விரைவான வளர்ச்சிக்கு பொதுத்துறை-தனியார் பங்களிப்பு முக்கியமானதாக இருந்ததை டாக்டர் ஜிதேந்திர சிங் வலியுறுத்தினார். விண்வெளித் துறையை தனியார் நிறுவனங்களுக்குத் திறந்துவிட்டதற்காகவும், புதுமை மற்றும் தொழில்முனைவோரின் எழுச்சிக்கு வழிவகுத்ததற்காகவும் பிரதமர் நரேந்திர மோடியை அவர் பாராட்டினார். விண்வெளி ஸ்டார்ட்அப்களின் எண்ணிக்கை கணிசமாக வளர்ந்துள்ளது என்றும், கிட்டத்தட்ட 300 ஸ்டார்ட்அப்கள் இப்போது விண்வெளி பொருளாதாரத்திற்கு பங்களிக்கின்றன என்றும் அமைச்சர் சுட்டிக்காட்டினார்.

டாக்டர் ஜிதேந்திர சிங், குறிப்பாக கோவிட்-19 தொற்றுநோயை அடுத்து, உயிரி தொழில்நுட்பத்தின் முக்கியத்துவம் அதிகரித்து வருவது குறித்தும் பேசினார். இந்தியாவின் அறிவியல் திறன்களுக்கு உலகளாவிய அங்கீகாரத்தை கொண்டு வந்த முதல் டி.என்.ஏ தடுப்பூசியை உருவாக்குவதில் உயிரி தொழில்நுட்பத் துறையின் பங்கை அவர் பாராட்டினார்.

பாரதிய விண்வெளி நிலையத்தை நிறுவுதல் மற்றும் பயோ ஈ3 (பொருளாதாரம், சுற்றுச்சூழல் மற்றும் வேலைவாய்ப்புக்கான உயிரி தொழில்நுட்பம்) கொள்கையை வெளியிடுதல் உள்ளிட்ட பல முக்கிய முன்முயற்சிகளை இந்தப் புரிந்துணர்வு ஒப்பந்தம் கோடிட்டுக் காட்டுகிறது. 2030 ஆம் ஆண்டளவில் 300 பில்லியன் டாலர் உயிரி பொருளாதாரத்தை அடையும் இலக்குடன், நாட்டில் உயர் செயல்திறன் கொண்ட உயிரி உற்பத்தியை வளர்ப்பதை இந்தக் கொள்கை நோக்கமாகக் கொண்டுள்ளது. இந்த ஒத்துழைப்பு மைக்ரோ கிராவிட்டி ஆராய்ச்சி, விண்வெளி உயிரி தொழில்நுட்பம், விண்வெளி உயிரி உற்பத்தி, உயிரி விண்வெளி மற்றும் விண்வெளி உயிரியல் போன்ற துறைகளில் கவனம் செலுத்தும்.

இந்தக் கூட்டாண்மை தேசிய மனித விண்வெளி திட்டத்திற்கு பயனளிப்பதுடன், மனித சுகாதார ஆராய்ச்சி, புதிய மருந்துகள், மீளுருவாக்கம் செய்யும் மருத்துவம் மற்றும் திறமையான கழிவு மேலாண்மை மற்றும் மறுசுழற்சிக்கான உயிரி அடிப்படையிலான தொழில்நுட்பங்கள் ஆகியவற்றில் புதுமைகளை ஊக்குவிக்கும் என்று எதிர்பார்க்கப்படுகிறது. விண்வெளி மற்றும் உயிரி தொழில்நுட்பத் துறைகளில் தொடக்க நிலை நிறுவனங்களுக்கு வணிக ரீதியாக கவர்ச்சிகரமான தொழில்நுட்ப தீர்வுகளை உருவாக்குவதற்கான வாய்ப்புகளையும் இது திறக்கும்.

 உயிரி விண்வெளி மற்றும் விண்வெளி உயிரியலில் ஒரு புதிய சகாப்தத்தை கற்பனை செய்த அவர், இந்த ஒத்துழைப்பு இந்தியாவுக்கு மட்டுமின்றி, உலகத்துக்கே  பயனளிக்கும் வகையில் ஆராய்ச்சி மற்றும் புதிய கண்டுபிடிப்புகளுக்கான வாய்ப்புகளை  எடுத்துரைத்தார்.

இஸ்ரோ மற்றும் உயிரி தொழில்நுட்ப துறைக்கு இடையிலான இந்த வரலாற்று கூட்டாண்மை அறிவியல் மற்றும் தொழில்நுட்பத்தில் முன்னெப்போதும் இல்லாத முன்னேற்றங்களுக்கு வழி வகுக்கும், கண்டுபிடிப்புகளில் உலகளாவிய தலைவராக இந்தியாவின் நிலையை வலுப்படுத்தும்.

இந்த நிகழ்ச்சியில் இஸ்ரோ தலைவர் எஸ்.சோம்நாத், உயிரி தொழில்நுட்பத்துறை செயலாளர் டாக்டர் ராஜேஷ் கோகலே, ஐ.சி.ஜி.இ.பி இயக்குனர் டாக்டர் ரமேஷ் வி.சோன்டி, உயிரி தொழில்நுட்பத்துறை தலைமை விஞ்ஞானி டாக்டர் அல்கா சர்மா மற்றும் பிற மூத்த அதிகாரிகள் பங்கேற்றனர்.

*****

PKV/KV

 

 

 

 

(Release ID: 2068530) Visitor Counter : 48