मुंबई, 15 ऑगस्ट 2024

 

भारताच्या 78 व्या स्वातंत्र्यदिनानिमित्त राष्ट्रीय चित्रपट विकास महामंडळ (एनएफडीसी) आणि केंद्रीय चित्रपट प्रमाणन मंडळ (सीबीएफसी) यांनी राष्ट्रीय भारतीय चित्रपट संग्रहालय (एनएमआयसी) येथे एका विशेष कार्यक्रमाचे आयोजन केले होते. प्रसिध्द अभिनेत्री छाया कदम आणि आरजे दिव्य सोलगामा या मान्यवर अतिथींसह सीबीएफसीचे मुख्य कार्यकारी अधिकारी (सीईओ) राजेंद्र सिंह, एनएफडीसीचे महाव्यवस्थापक (जीएम) डी. रामकृष्णन आणि एनएफडीसीचे उप-महाव्यवस्थापक महेश यादव यांच्या हस्ते ध्वजारोहण करून कार्यक्रमाला सुरुवात झाली. एनएफडीसी आणि सीबीएफसी यांच्या कर्मचारी वर्गासह संग्रहालयाला भेट देण्यासाठी आलेले अनेक अभ्यागत यावेळी उपस्थित होते.

सीबीएफसीचे सीईओ आणि एनएफडीसीचे जीएम या दोघांच्या हस्ते अतिथींचा सन्मान करण्यात आला. त्यानंतर आरजे दिव्य सोलगामा आणि अभिनेत्री छाया कदम यांचा समावेश असलेला विचारप्रवर्तक चर्चात्मक कार्यक्रम सादर झाला. महिलांच्या आर्थिक स्वावलंबनाचे महत्त्व आणि दैनंदिन जीवनात स्वातंत्र्याचे व्यापक महत्त्व यासंदर्भात या कार्यक्रमात चर्चा झाली. एनएमआयसीच्या व्यवस्थापक जयिता घोष यांनी या कार्यक्रमाचे संचालन केले.

या सोहोळ्याला उत्सवी स्वरूप देण्याच्या उद्देशाने या कार्यक्रमात सर्वोत्तम पद्धतीने पोशाख घातलेल्या प्रेक्षकाला विशेष पारितोषिक देण्यात आले. उपस्थितांनी यावेळी, लापता लेडीज या  गाजलेल्या चित्रपटाच्या प्रदर्शनाचा देखील आनंद घेतला. 

केंद्रीय मंत्रालयाच्या “एक पेड मां के नाम” या उपक्रमाच्या अनुषंगाने, उपस्थित अतिथी  तसेच एनएफडीसी आणि सीबीएफसी मधील ज्येष्ठ अधिकाऱ्यांनी, वृद्धी आणि टिकाऊपणा यांचे प्रतीक असलेल्या वृक्षारोपण समारंभात भाग घेतला. पाहुण्यांसाठी आयोजित केलेल्या एनएमआयसीच्या मार्गदर्शित दौऱ्याने या कार्यक्रमाची सांगता झाली. यावेळी उपस्थित अतिथींनी एनएमआयसीला “चित्रपटांचे मंदिर” संबोधत प्रशंसा केली.

स्वातंत्र्य आणि सक्षमीकरणाचे महत्त्व अधोरेखित करणारा हा कार्यक्रम म्हणजे भारताच्या स्वातंत्र्याला दिलेली एक संस्मरणीय मानवंदना होती.

   

 

* * *

PIB Mumbai | S.Patil/S.Chitnis/D.Rane

 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

(Release ID: 2045734) Visitor Counter : 30