मुंबई, 15 ऑगस्ट 2024

 

भारतीय तंत्रज्ञान संस्था आयआयटी,मुंबईने आज 15 ऑगस्ट 2024 रोजी नंदन निलेकणी मुख्य इमारतीसमोरील प्रतिष्ठित कमानीजवळ भारताचा 78 वा स्वातंत्र्य दिन साजरा केला.

कार्यक्रमाची सुरुवात सकाळी 9 वाजता आयआयटी मुंबईचे संचालक प्रा. शिरीष केदारे यांच्या हस्ते राष्ट्रध्वज फडकावून झाली. त्यानंतर प्रमुख पाहुणे आणि संस्थेचे माजी विद्यार्थी दीपक सत्वलेकर [बी.टेक ऑनर्स, मेकॅनिकल इंजिनिअरिंग, 1971] यांच्या उपस्थितीत प्रा. केदारे यांनी उपस्थितांना संबोधित केले.

   

प्रा. केदारे यांनी आपल्या भाषणात आयआयटी मुंबईच्या विद्यार्थ्यांना स्वातंत्र्यदिनाच्या शुभेच्छा दिल्या आणि संस्थेची अलीकडच्या काळातील कामगिरी आणि इतर महत्त्वपूर्ण टप्प्यांबाबत चर्चा केली. यावेळी त्यांनी ‘आझादी का अमृत महोत्सव’ साजरा करण्याचे महत्त्व सुद्धा अधोरेखित केले.

या प्रसंगी संचालकांनी आणि प्रमुख पाहुण्यांनी संस्थेच्या स्थापत्य अभियांत्रिकी विभागात 40 वर्षांची सेवा पूर्ण केलेल्या प्रेम बहादुर गंगाबीर पुन यांचा सत्कार केला.

या समारंभास प्राध्यापक, कर्मचारी आणि विद्यार्थी मोठ्या संख्येने उपस्थित होते. संस्थेच्या यूट्यूब वाहिनीवर या कार्यक्रमाचे थेट प्रसारण सुद्धा करण्यात आले.

   

कार्यक्रमात विद्यार्थ्यांनी सादर केलेल्या आणि प्रतीकात्मकरित्या विकास आणि राष्ट्रीय एकात्मता दर्शविणाऱ्या  सांस्कृतिक कार्यक्रमाचा आणि वृक्षारोपण मोहिमेचाही समावेश होता.

याशिवाय, ‘हर घर तिरंगा’ अभियानाला प्रोत्साहन देण्यात आले, ज्यामध्ये स्थानिक रहिवाशांनी त्यांच्या घरांवर राष्ट्रध्वज फडकावला आणि ध्वजवंदन कमानीजवळ तयार करण्यात आलेल्या सेल्फी बूथवर जाऊन स्वतःची सेल्फी छायाचित्रे काढली. संस्थेच्या आवारात तिरंग्याच्या दिव्यांनी सजावट करण्यात आली होती, त्यामुळे उत्सवाचे वातावरण अधिक आनंददायी झाले.

 

* * *

PIB Mumbai | S.Patil/G.Deoda/D.Rane

 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

(Release ID: 2045679) Visitor Counter : 57