থাগৎখিবা:
03 JUL 2024 4:08PM by PIB Imphal
ইনফোর্মেসন অমসুং ব্রোদকাস্তিং মন্ত্রালয়, ভারত সরকারগী মখাদা লৈবা প্রেস ইনফোর্মেসন ব্যুরো, ইম্ফাল রিজনেল ওফিসনা পাউমীশিংদা অনৌবা লোশিং অসিগী মতাংদা ভাপ তাহন্নবা "অনৌবা ক্রিমিনেল লো অহুম"গী মতাংদা ঙসি নোংমগী ওইবা মীদিয়া ৱার্কশোপ "ভর্তলাপ" (মীদিয়া ৱার্কশোপ) অমা মনিপুর প্রেস ক্লব, ইম্ফালদা পাঙথোকখ্রে।
জুলাই ১, ২০২৪দগী চৎনবা হৌখিবা অনৌবা ক্রিমিনেল লো অহুম – ভারতিয়া ন্যায় সনহিতা (বি.এন.এস.), ভারতিয়া নাগৃক সুরক্সা সনহিতা (বি.এন.এস.এস.), অমসুং ভারতিয়া সকশ্যা আধিনিয়ম (বি.এস.এ.) অসিনা লোই-লম শাসনগী মতমদগী লৈরক্লবা ইন্দিয়ন পেনেল কোদ (আই.পি.সি.), কোদ ওব ক্রিমিনেল প্রোসিজ্যুর (সি.আর.পি.সি.) অমসুং ইন্দিয়ন ইভিদেন্স এক্তকী মহুৎ শিনগনি।

এস.পি. (প্রোজিক্যুসন) মনিপুর হাওবম সঙ্ঘমিতা, এম.পি.এস.না অনৌবা আইনশিং অসিগী মতাংদা রিসোর্স পার্সন ওইনা ৱা ঙাংখিবা ৱার্কশোপ অসিদা ইম্ফাল অমসুং মনিপুরগী অতৈ জিলাশিংদা লৈবা তোঙান তোঙানবা মীদিয়া হাউসশিংদগী পাউমী ৫০ রোম্না শরুক য়াখি।
ইদিতর্স গীল্ত মনিপুরগী প্রেজিদেন্ত খোগেন্দ্রো খোমদ্রাম অমসুং ওল মনিপুর ৱার্কিং জর্নেলিস্ত য়ুনিয়ন (অমজু)গী প্রেজিদেন্ত বিজোই ককচিংতাবম্না ৱার্কশোপ অদুগী হৌদোকপগী তাংকক্তা অখন্নবা মীথুংলেন ওইনা সভাগী লৈতেং ওইখি।
রিসোর্স পার্সন অমা ওইনা ৱা ঙাংলদুনা এস.পি. (প্রোজিক্যুসন) মনিপুর হাওবম সঙ্ঘমিতানা হায়খি লোইলম শাসন মতমগী আইনশিং মহুৎ শিল্লিবা অনৌবা আইনশিং অসি অচুম্বা ৱায়েল পুরকপদা মীৎয়েং থম্মি, মসিনা পুলিস ইনভেস্তিগেসন্দা অমসুং কোর্তকী প্রোসিদিংশিংদা তেক্নোলোজীগী খুমাং চাউশিনবশিংবু শীজিন্নগনি।
মহাক্না হায়খি মদুদি অনৌবা আইনশিং অসিদা অনৌবা ওফেন্সশিং হায়বদি তেরোরিজম, মোব লিঞ্চিং, ওর্গানাইজ তৌরবা ক্রাইমশিং য়াওরি অমসুং নুপী অমসুং অঙাংশিংদা চত্থবা ক্রাইমশিংগী অহকপা চৈরাকশিংসু য়াওরি।
হৌজিক্কী ওইনা পুলিস ওফিসরশিংবু বি.এন.এস.কী মখাদা মরী লৈনবা সেক্সনশিং হায়বদি লান্না ফা পুনবা অমসুং হকচাংদা অশোক অপন নংহনবা অসি করিগুম্বা লাক্লবদি হায়রিবা অশোইবসি চুমথোক্নবা এমেন্দমেন্ত অমা তৌদ্রিবা ফাওবা চৎননবা তাক্লি।
আই.পি.সি. অমসুং সি.আর.পি.সি. অসি কোর্ততা কেস কয়া অমা লোইশিন্দনা লৈবনা মরম ওইদুনা অমসুং ক্রাইম খরদি জুলাই ১, ২০২৪ গী মমাংদা থোকপা অমসুং কোন্না পাউদম্বনা মরম ওইদুনা আই.পি.সি.গী মখাদা রেজিস্তর তৌখিবনা অনৌবা আইনশিং অসিগা মতম অমত্তদা চৎমিন্নগনি হায়না এস.পি. অসিনা হায়খি।
মহাক্না ফোংদোকখি মদুদি ফার্স্ত ইনফোর্মেসন রিপোর্ত (এফ.আই.আর.) অসিসু হোজিক্তি ওনলাইনদা ক্রাইম অমসুং ক্রিমিনেল ত্রেক্কিং নেৎৱার্ক সিস্তেম (সি.সি.তি.এন.এস.)কী খুত্থাংদা, তোঙান তোঙানবা লোলদা পুলিস স্তেসন চৎপগী মথৌ তাদনা ই-এফ.আই.আর. অমসুং জিরো এফ.আই.আর. ওইনা ফাইল তৌবা য়াহল্লে।
বি.এন.এস. হৌদোকপা অসিনা মশাগী ৱাহন্থোক লৈবা অমসুং হন্না য়েংবা মথৌ তাবা অনৌবা আইনগী প্রোভিজনশিং লাক্লে। হায়রিবশিং অসিগী মরক্তা ক্লোস ৬৯ অসিসু অমনি, মসিনা হক্তিন্নবগী থবকসু "দিসিতফুল মিন্স"কী মখাদা ক্রিমিনেলাইজ তৌরি হায়না মহাক্না ফোংদোকখি।
প্রোভিজন অসিগী মখাদা, লৌনম তৌদুনা হক্তিন্নবগী থবক হায়বদি থবক পীগনি নৎত্রগা লুহোংগনি হায়রগা মদুমক্তি ফংহন্দনা চত্থরিবা মীওই অদুসু ফাইনগা লোইননা চহি তরা মীয়াৎ তাবা য়াই হায়না মহাক্না মখা তাখি।
হৌজিক লৈরিবা লিগেল ফ্রেমৱার্ক অসিদগী মশক থোক্না খেন্নরিবা অসি পুলিস কস্তদীগী মতম অসি সি.আর.পি.সি.গী মখাদা হাননা নুমিৎ ১৫ নি ওইরম্বা অদু বি.এন.এস.এস.কী ক্লোস ১৮৭ (৩)গী মখাদা নুমিৎ ৯০ নি ফাওবা ওইরে।
হায়রিবা অহোংবা অসিনা ভিক্তিমগী হেন্না খনবা অমসুং ত্রাইএল অদু লোইশিনবদা মতেং পাংনবা হোৎনরি অদুবু অখঙ অহৈশিংনা মসিবু লান্না শীজিন্নরকপা য়াবা অমসুং কস্তদিএল রাইৎশিংদা শোকপা লাকপা য়াবগী নুংনাংবা ফোংদোক্লি হায়না মহাক্না ফোঙদোকখি।
হায়রিবা অহোংবশিং অসিগী মরক্তা, বি.এন.এস.এস. অসিনা কম্ম্যুনিতী সর্ভিসপু হুরান চীন্থি নৎত্রগা দিফেমেসনগুম্বা ওফেন্স মচাশিংদা কৈশুম শঙদা থম্বগী মহুৎ শিল্লগনি, মসিনা কৈশুমশঙদা মী মশীং য়াম্মনবদগী হন্থরগনি।
অদুম ওইনমক, আইন অসিদা কম্ম্যুনিতী সর্ভিস হায়বসিগী মতাংদা মরীক চুম্বা ৱাহন্থোক্তি পীদ্রি, মসিনা মসিবু চলাইবা হায়বসি জজশিংগী মখুৎতা শিন্নরি হায়না মহাক্কী ৱাখল্লোন থমখি।
মাইনর ওইবা লোইনবীশিংদা লুহোংলবা মতুংদা রেপ চত্থববু রেপ লোদা হাপচিনবা হায়বসিনা হান্না মতম শাংনা লৈরকপা অহোবা অমা মেনশিনলে, মসিনা সুপ্রিম কোর্তকী দিরেক্তিবকা চুন্ননা চৎমিন্নরে অমসুং আই.পি.সি.গী প্রোভিজনশিংদা লৈবা অহোববু মশক খঙলে হায়না তাক্লে হায়না মহাক্না ফোঙদোকখি।

অঙনবদা, ৱার্কশোপ অদুবু শরুক য়াখিবশিংবু ওক্লদুনা, পি.আই.বি. ইম্ফালগী দিরেক্তর দা. এঙম পামে, আই.আই.এস.না মীয়াম্বু লৈবাক অসিদা জুলাই ১, ২০২৪ দগী চৎনবা হৌরিবা ক্রিমিনেল লো অহুম অসি ভাপ তাহন্নবা হোৎনবদা মীদিয়াগী থৌদাংগী মতাংদা ফোংদোকখি।
মহাক্না হায়খি, লৈঙাক্কী থৌশিল নৎত্রগা থৌরাং অমহেক্তনা মায় পাকপা হায়বসি মীয়াম্না চাউনা শরুক য়াবা অমসুং শৌগৎপগী মখা পোল্লি। মহাক্না মখা তারদুনা হায়খি মদুদি অসিগুম্বা ৱার্কশোপ অমা শীনবগী পান্দম অসি লৈঙাক্কী পার্তনর, স্তেকহোল্দর অমসুং মীদিয়াগী মীওইশিংগী মরক্তা ফম্বাক অমা শেম্নবগীদমক্তনি।
অখন্নবা মীথুংলেন ওইনা শরুক য়াখিবা খোগেন্দ্রো খোমদ্রামগী ৱারোলদা মীদিয়াগী মীওইশিংবু হায়রিবা অনৌবা আইন অহুম অসিগী মতাংদা মমুত তানা খঙদুনা মীয়ামদা ভাপ তাহন্নবা হোৎনবগী তঙাইফদবা থমখি।
বিজোই ককচিংতাবম্না হায়খি, মীয়াম্না গ্রাউন্দ লেভেলদা মরীক চুম্বা পাউ ফংহন্নবগীদমক মতীক চাবা ঈ পাউ থাদোকপা হায়বসি য়াম্না মরুওই। লৈঙাক্না অসিগুম্বা অনৌবা আইনশিং অসিবু পাউমীশিংদা অখন্ননা ভাপ তাহন্নবা হোৎনবীরিবা অসিগীদমক থাগৎপা ফোংদোকখি।
পি.আই.বি., ইম্ফালগী আই.এ. পুস্পা মাইবম্না দাইসতা লেঙখৎপীখিবা, রিসোর্স পার্সন অমসুং ৱার্কশোপ অসিদা শরুক য়াখিবা পাউমীশিংবু থাগৎপা ফোঙদোকখি।
*****