২১ মে’, ২০২৪ত মাউণ্ট এভাৰেষ্টৰ শিখৰত উপনীত হৈ অৰুণাচল প্ৰদেশৰ এগৰাকী মহিলা পৰ্বতাৰোহী কাবাক ইয়ানোৱে ইতিহাসত নিজৰ নাম খোদিত কৰিছে। এই উল্লেখযোগ্য কৃতিত্বৰ জৰিয়তে তেওঁ অৰুণাচল প্ৰদেশৰ ৫ম গৰাকী মহিলা পৰ্বতাৰোহী আৰু নিচি সম্প্ৰদায়ৰ এনে কৃতিত্ব অৰ্জনকাৰী প্ৰথম গৰাকী মহিলা হিচাপে পৰিগণিত হয়।

কাবাক ইয়ানোৱে ২৭ মাৰ্চত মাউণ্ট এভাৰেষ্টলৈ যাত্ৰাৰ অৰ্থে কাঠমাণ্ডুলৈ ৰাওনা হৈছিল। তেওঁ সম্পূৰ্ণ প্ৰস্তুতিৰ অন্তত ১৭ এপ্ৰিলত বেছ কেম্পত উপস্থিত হৈ ২০২৪ৰ ২১ মে’ত সফলতাৰে ইয়াৰ শিখৰত উপনীত হয়।

১৯৯৯ৰ ৫ ছেপ্টেম্বৰত অৰুণাচল প্ৰদেশত জন্মগ্ৰহণ কৰা কাবাক ইয়ানোৱে একাধিক প্ৰত্যাহ্বান নেওচি এই উল্লেখযোগ্য সাফল্য লাভ কৰিছে। বিশেষকৈ ২০২২ত পিতৃক হেৰুৱাৰ পিছৰেপৰা তেওঁ একাধিক ব্যক্তিগত প্ৰত্যাহ্বানৰে মোকাবিলা কৰিবলগীয়া হৈছিল।

ইয়ানোৰ পিতৃয়ে লোক নিৰ্মাণ বিভাগত (PWD) এগৰাকী কেজুৱেল শ্ৰমিক হিচাপে কাম কৰিছিল। পিতৃৰ মৃত্যুৰ পিছত ইয়ানোৱে পৰিয়ালটো পোহ-পালৰ দায়িত্ব ল’বলগীয়া হয়। পঢ়া-শুনা আৰু ঘৰুৱা খৰচৰ বাবে তেওঁ ভিন্ন কামত নিয়োজিত হৈছিল। তেওঁ বাউন্সাৰ হিচাপে, বিউটি পাৰ্লাৰত কাম কৰিছিল আৰু কাপোৰৰ ব্যৱসায়ো কৰিছিল। জীৱনৰ এনে সংগ্ৰামে তেওঁৰ মনত দৃঢ়তাৰ মনোভাৱ জগাই তোলে, যি গুণে তেওঁৰ পৰ্বতাৰোহণৰ প্ৰচেষ্টাত এটি অতিশয় গুৰুত্বপূৰ্ণ ভূমিকা পালন কৰে। ইয়ানোৱে অৰুণাচল প্ৰদেশৰ প্ৰখ্যাত পৰ্বতাৰোহী আব্ৰাহাম তাগীত সোৰাঙৰপৰা প্ৰেৰণা লাভ কৰে। সোৰাঙৰ উল্লেখযোগ্য কৃতিত্ব আৰু পৰ্বতাৰোহণৰ প্ৰতি দৃঢ়তাই ইয়ানোৰ বাবে প্ৰেৰণা আৰু পথ-প্ৰদৰ্শনৰ উৎস হিচাপে ক্ৰিয়া কৰিছিল।

মাউণ্ট এভাৰেষ্ট আৰোহণৰ সময়ত ইয়ানোৱে প্ৰতিকূল খুম্বু তুষাৰপাতৰ মাজেৰে যাত্ৰা, বিপজ্জনক ফাট এৰাই চলা আৰু অধিক উচ্চতাত ফেৰফেৰীয়া বতাহৰ সৈতে মোকাবিলাকৰণ আদি একাধিক বাধাৰ সন্মুখীন হৈছিল।

কাবাক ইয়ানোৱে অৰুণাচল প্ৰদেশৰ পাছিঘাটস্থিত ৰাষ্ট্ৰীয় সুৰক্ষা বিশ্ববিদ্যালয়ত (RRU) ফিটনেছ মেনেজমেন্টত স্নাতকোত্তৰ ডিপ্লমা পাঠ্যক্ৰম গ্ৰহণ কৰি আছে। ইয়ানোৰ এনে সাফল্যৰ স্বীকৃতিস্বৰূপে ৰাষ্ট্ৰীয় সুৰক্ষা বিশ্ববিদ্যালয়ে উন্নত প্ৰশিক্ষণৰ সুযোগ, শৈক্ষিক সহায় আৰু সম্ভাৱ্য শিক্ষকতাৰ ভূমিকাৰ জৰিয়তে তেওঁৰ ভৱিষ্যতৰ সাধনাক সমৰ্থন জনোৱাৰ সিদ্ধান্ত গ্ৰহণ কৰিছে। বিশ্ববিদ্যালয়খনে তেওঁৰ এই পৰিক্ৰমাক আন ছাত্ৰ-ছাত্ৰীসকলৰ বাবে তেওঁলোকৰ আকাংক্ষা পূৰণৰ ক্ষেত্ৰত প্ৰেৰণা হিচাপে ব্যৱহাৰৰ লক্ষ্য নিৰ্ধাৰণ কৰিছে।

***

PG/BM

(रिलीज़ आईडी: 2021745) आगंतुक पटल : 104