சென்னையில் உள்ள இந்திய தொழில்நுட்பக் கழகம் (ஐஐடி மெட்ராஸ்), பணிபுரியும் தொழில் வல்லுநர்களுக்காக மின்வாகனப் போக்குவரத்து எனப்படும் இ-மொபிலிட்டியில் (WEMEM) தொழில் சார்ந்த இணையவழி எம்டெக் படிப்பை அறிமுகப்படுத்தியுள்ளது. தொழில் வல்லுநர்களுக்கான உள்ளடக்கங்கள் இடம்பெற்றிருப்பது பாடநெறியின் தனித்துவம் வாய்ந்த அம்சமாகும்.

கல்வி மற்றும் தொழில்துறை நிபுணர்களின் உள்ளீடுகளுடன் உருவாக்கப்பட்ட இந்த எம்டெக் பாடத்திட்டம், தொழில்துறையின் தேவை அடிப்படையில் தொடர்ந்து மேம்படுத்தப்படும்.

செப்டம்பர் 2024-ல் தொடங்கவுள்ள தொகுதிக்கு பதிவுசெய்ய 26 மே 2024 கடைசி நாளாகும். பாடத்திட்டம் குறித்த விவரங்களை கீழ்க்காணும் இணையதளத்தில் பெற்றுக் கொள்ளலாம்:  https://code.iitm.ac.in/emobility

இப்பாடத்திட்டத்தின் அவசியத்தை எடுத்துரைத்த ஐஐடி மெட்ராஸ் இயக்குநர் பேராசிரியர் வி.காமகோடி கூறும்போது, “இ-மொபிலிட்டி களத்தில் பணிபுரியும் தொழில் வல்லுநர்களுக்கு சான்றிதழ் படிப்புகள் மூலம் திறன் மேம்பாட்டுத் திட்டங்களை அளிப்பதில் ஐஐடி மெட்ராஸ் முன்னணியில் இருந்து வருகிறது. இப்பாடத் திட்டத்தின் இயற்கையான பின்தொடர்தலாக எம்டெக் படிப்பை தொடங்க வேண்டும் என பங்கேற்பாளர்களும், மோட்டார் வாகன தொழில்துறையினரும் கோரிக்கை வைத்திருந்தார்கள். தேசத்தின் மனிதவள மேம்பாட்டை இக்களத்தின் மூலம் விரைவுபடுவதற்கான எங்களது பணியை மேலும் ஊக்குவிக்கும் என்பதால் WEMEM-ஐ அறிமுகப்படுத்துவதில் மிகுந்த மகிழ்ச்சியடைகிறோம்” எனக் குறிப்பிட்டார்.

ஐஐடி மெட்ராஸ்-ன் அவுட்ரீச் மற்றும் டிஜிட்டல் எஜுகேஷன் சென்டர் (CODE) மூலம் வழங்கப்படும் இந்த பட்டப்படிப்பு, ஐஐடி மெட்ராஸ்-ல் இருந்து எம்டெக் பட்டம் பெறுவதற்கு எதிர்பார்க்கப்படும் தேவைகளை நிறைவு செய்யும் வகையில் வடிவமைக்கப்பட்டுள்ளது. ஐஐடி மெட்ராஸ்-ன் பொறியியல் வடிவமைப்புத் துறை WEMEM-ஐ ஒருங்கிணைக்கும் பணியில் ஈடுபட்டிருக்கிறது.

ஐஐடி மெட்ராஸ்-ன் கல்விப் பாடப்பிரிவுகளுக்கான டீன் பேராசிரியர் பிரதாப் ஹரிதாஸ் கூறும்போது, “ஐஐடி மெட்ராஸ் மூலம் வழங்கப்படும் எம்டெக் பட்டத்திற்கான அனைத்து கல்வித் தகுதிகளையும் கொண்டதாக WEMEM கவனமாக வடிவமைக்கப்பட்டுள்ளது. முக்கிய மற்றும் விருப்பப்பாட கோட்பாடு படிப்புகள் (core and elective theory courses), ஆய்வகங்கள், ப்ராஜக்ட்கள் ஆகியவை அடங்கும். புதிய கல்விக் கொள்கைக்கு இணங்க, இமொபிலிட்டியில் முதுகலை பட்டயப் படிப்பு வடிவில் பாதியில் வெளியேறுவதற்கான வாய்ப்பையும் இதில் செயல்படுத்தியுள்ளோம்” என்றார்.

இத்திட்டம் குறித்து விரிவாக எடுத்துரைத்த ஐஐடி மெட்ராஸ் அவுட்ரீச் மற்றும் டிஜிட்டல் எஜுகேஷன் மையத்தின் (CODE) தலைவரான பேராசிரியர் தேவேந்திர ஜலிஹால் கூறும்போது, “ஐஐடி மெட்ராஸ்-ன் வளாகப் படிப்பு அல்லாத மற்றும் அவுட்ரீச் பாடத்திட்டங்களுக்கு ‘கோட்’ ஒருங்கிணைப்பு மையமாக செயல்பட்டு வருகிறது. தொழில் வல்லுநர்களுக்கான பல்வேறு நிர்வாகக் கல்வித் திட்டங்களையும், தொழில் துறையினருக்கான இணையவழி எம்டெக் பாடத்திட்டங்களையும் ஏற்கனவே வழங்கி வருகிறோம். இப்பட்டியலில் WEMEM இணைவது மகிழ்ச்சி அளிக்கிறது” எனக் குறிப்பிட்டார்.

ஐஐடி மெட்ராஸ் அவுட்ரீச் மற்றும் டிஜிட்டல் எஜுகேஷன் (கோட்) மையத்தின் இணைத் தலைவரான பேராசிரியர் ஆண்ட்ரூ தங்கராஜ் மேலும் கூறும்போது, “கோட்பாடுக்கும் நடைமுறைக்கு இடையே நல்லதொரு சமநிலையை உறுதி செய்யும் விதமாக, சில பாடப்பிரிவுகளை வழங்குவதற்கு தொழில்துறையில் இருந்து நிபுணர்களை அழைத்து வந்திருக்கிறோம். ஒவ்வொரு பாடத்திட்டத்திற்கும் வழக்கமான அசைன்மெண்ட்களும், தேர்வுகளும் இருக்கும். இதன் மூலம் வலுமான கல்வி உறுதிசெய்யப்படும்” எனத் தெரிவித்தார்.

ஒரு காலண்டர் ஆண்டில் 3 கல்விப் பருவங்களுடன் மொத்தம் 7 கல்விப் பருவங்களைக் கொண்டதாக இப்பாடத்திட்டம் அமைந்திருக்கும். வரும் செப்டம்பர் மாதம் முதல் தொகுதிக்கான வகுப்புகள் தொடங்கும். அடிப்படைக் கணிதம் மற்றும் இயற்பியல் கோட்பாடுகள் ஆகிய பாடங்களில் நடைபெறும் தேர்வின் அடிப்படையில் பங்கேற்பாளர்கள் தேர்வுசெய்யப்படுவார்கள்.

ஐஐடி மெட்ராஸ்-ன் பயிற்சிப் பேராசிரியரும், WEMEM-ன் ஆலோசகருமான பேராசிரியர் கார்த்திக் ஆத்மநாபன் கூறுகையில், “ஐஐடி மெட்ராஸ் எம்டெக் தரத்தை உறுதி செய்யும் WEMEM பாடத்திட்டம் இருப்பதுடன், தொழில்துறை வல்லுநர்களுக்கு தேவையான நெகிழ்வுத் தன்மையையும் கொண்டதாக அமைக்கப்பட்டுள்ளது. வார நாட்களில் பங்கேற்பாளர்கள் பணியில் இருப்பார்கள் என்பதால், சனிக்கிழமைகளில் ஆசிரியர்களுடன் அவர்கள் நேரடி வகுப்புகளில் அவசியம் கலந்து கொள்ள வேண்டும்” எனத் தெரிவித்தார்.

இப்பாடத்திட்டம் குறித்து விரிவாகப் பேசிய ஐஐடி மெட்ராஸ்-ன் பொறியியல் வடிவமைப்புத் துறை தலைவரான பேராசிரியர் சி.எஸ்.சங்கர்ராம் கூறும்போது, “ஐஐடி மெட்ராஸ்-ல் இ-மொபிலிட்டி முன்முயற்சிகளுக்கான ஒருங்கிணைப்புத் துறையாக இத்துறை விளங்குகிறது. முழுநேர ஆசிரியர்கள், பயிற்சிப் பேராசிரியர்கள், துணை ஆசிரியர்கள், விருந்தினர் ஆசிரியர்கள் ஆகியோரைக் கொண்ட முக்கிய குழுவினர் இப்படிப்பிற்கான உள்ளடக்கங்களை வழங்குவார்கள். எம்டெக்கின் ஒரு பகுதியாக கற்றலை செயல்படுத்தும் பல்வேறு ஆய்வகங்களையும் இத்துறை ஏற்படுத்தியுள்ளது” என்றார்.

***

SRI/KV

(Release ID: 2019516)