قبائلی امور، زراعت اور کسانوں کی بہبود کے مرکزی وزیر جناب ارجن منڈا نے آج نئی دہلی میں اپنی رہائش گاہ پر ملک کے دور دراز علاقوں کے 550 سے زیادہ قبائلی طلباء سے ملاقات کی، جنہیں 75ویں یوم جمہوریہ کے موقع پر خصوصی مہمانوں کے طور پر مدعو کیا گیا تھا۔ کلاس IX اور X کے یہ طلباء وزارت کی طرف سے پیش کردہ پری میٹرک اسکالرشپ اسکیم کے استفادہ کنندگان ہیں۔ اس موقع پر جناب منڈا نے وزیر اعظم جناب نریندر مودی کا شکریہ ادا کیا کہ انہوں نے قومی راجدھانی میں کرتویہ پتھ پر قبائلی بچوں کو یوم جمہوریہ کی تقریبات دیکھنے کے لیے ذاتی طور پر مدعو کیا۔

 

 

 

طلباء سے خطاب کرتے ہوئے جناب منڈا نے مختلف ریاستوں سے دہلی میں جمع ہونے والے طلباء کے تنوع کے پیش نظر اس مجمع کو ’منی انڈیا‘ قرار دیا۔ وزیرموصوف نے انہیں ایک دوسرے سے ملنے اور اپنی ریاستوں، ثقافتوں اور روایات کے بارے میں جاننے کی ترغیب دی۔ انہوں نے کہا کہ یہ وزیر اعظم کے ’ایک بھارت شریشٹھ بھارت‘کے تصور کی بہترین مثال ہے۔

 

 

طلباء کو اپنے مستقبل کی تشکیل میں وزارت کے اسکالرشپ کی اسکیموں کا بہترین استعمال کرنے کی ترغیب دیتے ہوئے جناب منڈا نے کہا کہ آپ مستقبل کے رہنما ہیں اور امرت کال میں وِکست بھارت کے وزیر اعظم کے وژن کو حاصل کرنے کے لیے ہمارے ملک کی تقدیر کو تشکیل دیں گے۔ انہوں نے کہا کہ کوئی بھی قوم اسی وقت ترقی کر سکتی ہے جب اس کے نوجوان ایماندار اور تعلیم یافتہ ہوں۔ تعلیم کامیابی کی کنجی ہے ،کیونکہ یہ بہت سے مواقع کے دروازے کھولتی ہے۔ وزیر موصوف نے طلباء سے کہا کہ وہ یہ عہد کریں کہ انہیں  فائدہ اٹھانے کا جو موقع ملا ہے  وہ   اپنی ترقی کے بعد ملک کو واپس دیں گے۔ انہوں نے کہا کہ آپ کو علم کی مسلسل جستجو کرتے ہوئے اپنی شخصیت کو نکھارتے رہنا چاہیے کیونکہ آپ کی کامیابی ہی ملک کی کامیابی ہے۔

 

 

جناب منڈا نے طلباء کو 24,000 کروڑ روپے کے پی ایم-جن من ​​مشن کے بارے میں بتایا جس کے تحت وزیراعظم جناب نریندر مودی کی قیادت میں اس کے آغاز کے صرف 2 ماہ کے اندرایک لاکھ پکے گھر، 1207 کلومیٹر لنک سڑکیں،1830 خصوصی طور پر کمزور قبائلی گروپ (پی وی ٹی جی) کی بستیوں کو نل کے پانی کی فراہمی ،100 موبائل میڈیکل یونٹس، قبائلی طلباء کے لیے 100 ہاسٹل وغیرہ کی منظوری دی گئی ہے۔ انہوں نے کہا کہ وزیر اعظم-جن من ​​مشن قبائلی برادری کی ہمہ گیر ترقی کو یقینی بنانے کے لیے حکومت ہند کے ’مکمل حکومت‘ کے نقطہ نظر کی ایک بہترین مثال ہے۔

 

 

اس موقع پر قبائلی امور کے سکریٹری جناب ویبھو نائر نے طلباء سے بات چیت کی اور ان سے قومی دارالحکومت کے اپنے پہلے دورے کے دوران ان کے تجربات کے بارے میں پوچھا۔ اپنے خطاب کے دوران سکریٹری نے طلباء کی حوصلہ افزائی کی کہ وہ اپنے تجربات، سیکھنے اور ترغیبات کو اپنے ساتھی طلباء کے ساتھ مشترک کریں اور انہیں قبائلیوں بالخصوص نوجوانوں کی ہمہ جہت ترقی کے لئے حکومت ہند کی طرف سے چلائی جارہی مختلف اسکیموں کے بارے میں آگاہ  کریں۔

 

 

قبائلی امور کے ایڈیشنل سکریٹری جناب نول جیت کپور نے مدعو طلبہ کے لیے صدر جمہوریہ ہندمحترمہ دروپدی مرمو اور وزیر اعظم جناب نریندر مودی سے ملاقات سمیت تاریخی یادگاروں اور دہلی میٹرو کی سواری کے علاوہ منعقد کی جانے والی سرگرمیوں کی تفصیلات دی۔

زندگی میں ایک بارموقع ملنے کے لیے اظہار تشکر کرتے ہوئے طلبہ نے وزیر اعظم اور قبائلی امور کے وزارت سے ان کی تعلیم کے لیے فراہم کی جانے والی حمایت اور کرتویہ پتھ پر 75ویں یوم جمہوریہ پریڈ کا دیدار کرنے کا موقع فراہم کرنے کے لیے شکریہ ادا کیا۔ انہوں نے ہندوستان کے صدر اور وزیر اعظم سے ملاقات کے بڑے  موقع پر خوشی کا اظہار بھی کیا۔

 

 

*************

 

 

ش ح ۔ع ح۔ن ع

U. No.4156

(Release ID: 2000637) Visitor Counter : 90