زراعت اور کسانوں کی بہبود اور قبائلی امور کے مرکزی وزیر جناب ارجن منڈا نے آج نئی دہلی کے پوسا میں زراعت اور کسانوں کی بہبود کی وزارت کے زیر اہتمام کسان کانفرنس کا افتتاح کیا۔ اس کانفرنس میں سینکڑوں کسانوں اور فارمر پروڈیوسر آرگنائزیشنز (ایف پی اوز) کے اراکین، جنہیں مرکزی حکومت نے یوم جمہوریہ کے لیے ملک بھر سے خصوصی طور پر مدعو کیا تھا، اس کانفرنس میں حصہ لیا۔ انڈین کونسل آف ایگریکلچرل ریسرچ (آئی سی اے آر) اور انڈین ایگریکلچرل ریسرچ انسٹی ٹیوٹ (آئی اے آر آئی) کے سائنسدانوں نے انہیں کاشتکاری کے جدید طریقوں اور اختراعات کے بارے میں بتایا، جبکہ زراعت کی مرکزی وزارت کے افسران نے انہیں اسکیموں کے بارے میں بتایا۔

کانفرنس میں مرکزی وزیر جناب ارجن منڈا نے کہا کہ ہندوستان کے کسان یوم جمہوریہ پر قومی پرچم لہرانے کے موقع پر راجدھانی آئے ہیں۔ یہ ہماری جمہوریت کی طاقت ہے، جو ملک کو طاقت دیتی ہے۔ جناب منڈا نے کہا کہ جب ہمارے شہری 100 واں یوم جمہوریہ منائیں گے تو یہ یاد رکھا جائے گا کہ ملک کے لوگوں نے 75 واں یوم جمہوریہ کیسے منایا، کیونکہ یہ یوم جمہوریہ صرف ایک تقریب نہیں ہے، یہ ملک میں امرت مہوتسو سے امرت کال میں داخل ہونے کا دروازہ کھولنے والا ہے۔ یہ ملک کی روحانی سوچ اور روحانی طاقت کے بہاؤ میں ایک نئے ہندوستان کی تعمیر کا عہد ہوگا۔ یہ یوم جمہوریہ ہمارے لیے نہ صرف فخر اور عزت نفس کا احساس کرنے کا، بلکہ نئے ہندوستان کی تشکیل میں ایک تاریخی پس منظر تیار کرنے کا ایک خاص موقع ہوگا۔

مرکزی وزیر جناب ارجن منڈا نے کہا کہ یوم جمہوریہ پریڈ اب کرتویہ پتھ پر منعقد کی جا رہی ہے جس کا نام پہلے راج پتھ تھا۔ ہم نے آزادی سے پہلے کئی حکمران دیکھے ہیں، مغلیہ دور ہو یا انگریزوں کا دور، ان سے گزر کر ہم نے ہندوستان کو دنیا کی سب سے بڑی جمہوری قوم بنا دیا ہے۔ وزیر اعظم جناب نریندر مودی جی چاہتے تھے کہ ہم یوم جمہوریہ ان لوگوں کے ساتھ منائیں جو دراصل گاؤں اور کھیتوں میں اپنی محنت سے ملک کو سیراب کرتے ہیں، اسی لیے معزز کسانوں کو یہاں مدعو کیا گیا ہے۔ جناب منڈا نے کہا کہ ہمارا کسان خاندان سب سے اہم ہے کیونکہ یہ خوراک فراہم کرنے والا ہے۔ کسانوں کی ترقی میں ہی ملک کی ترقی مضمر ہے۔ بدلتے وقت میں کاشتکاری کے نئے طریقے سیکھنا کسانوں کے لیے فائدہ مند ثابت ہوگا۔ اس کا مقصد اپنے کسانوں، اپنے گاؤں اور اپنے ملک کو نئے تجربات سے بااختیار بنانا ہے۔ جناب منڈا نے مرکزی وزارت زراعت اور کسانوں کی بہبود کی جانب سے کانفرنس میں سبھی کسانوں کا خیرمقدم کیا اور انہیں مبارکباد دی۔

اس موقع پر مرکزی وزیر مملکت محترمہ شوبھا کرندلاجے نے کہا کہ وزیر اعظم جناب مودی نے عوامی شرکت کے جذبے کے ساتھ سماج کے مختلف طبقوں کے عام لوگوں کو یوم جمہوریہ کی تقریب میں مدعو کیا ہے۔ مرکزی وزارت زراعت کے سکریٹری جناب منوج آہوجہ، ایڈیشنل سکریٹری محترمہ منندر کور اور جوائنٹ سکریٹری محترمہ شوبھا ٹھاکر اور دیگر افسران بھی کانفرنس میں موجود تھے۔ مدعو کسانوں کو تربیت کے ساتھ فیلڈ وزٹ بھی کروایا گیا۔

*****

ش ح – ق ت – ق ر

U: 4027

 

(Release ID: 1999772) Visitor Counter : 40