തൊടുപുഴ: കേന്ദ്ര ഗവണ്‍മെന്റിന്റെ വികസന പദ്ധതികളും ജനക്ഷേമ പദ്ധതികളും സമൂഹത്തിന്റെ എല്ലാ  തലങ്ങളിലും എത്തിക്കുക എന്ന ലക്ഷ്യത്തോടെ ആവിഷ്‌കരിച്ച് നടപ്പാക്കുന്ന വികസിത് ഭാരത് സങ്കല്‍പ്പ യാത്ര ഇന്ന് മുതല്‍ ഇടുക്കി ജില്ലയില്‍ പര്യടനം തുടങ്ങും. ആദ്യ ദിനം കോടിക്കുളം പഞ്ചായത്തിലാണ് യാത്ര എത്തിച്ചേരുക.

കേന്ദ്ര ഗവണ്‍മെന്റിന്റെ ജനക്ഷേമ പദ്ധതികളെക്കുറിച്ചുള്ള പൂര്‍ണ വിവരങ്ങള്‍ ജനങ്ങളിലെത്തിക്കുകയാണ് പരിപാടിയുടെ മുഖ്യ ലക്ഷ്യം. ഇതോടൊപ്പം അര്‍ഹരായ ഗുണഭോക്താക്കള്‍ക്ക് പദ്ധതികളുടെ ആനുകൂല്യങ്ങള്‍ നേടാനുള്ള സൗകര്യവും യാത്രയില്‍ ലഭ്യമാക്കും. വിവിധ കേന്ദ്ര പദ്ധതികളില്‍ ഗുണഭോക്താക്കളെ ചേര്‍ക്കുന്നതിന് യാത്ര എത്തിച്ചേരുന്ന കേന്ദ്രങ്ങളില്‍ ക്യാമ്പുകള്‍ സംഘടിപ്പിക്കും. ഇതിനായി ബാങ്ക്, നബാര്‍ഡ്, ഇന്ത്യന്‍ ഓയില്‍ കോര്‍പ്പറേഷന്‍, കൃഷി വിഗ്യാന്‍ കേന്ദ്ര, ഇന്ത്യ പോസ്റ്റ് തുടങ്ങി വിവിധ വകുപ്പുകളില്‍ നിന്നുള്ള ഉദ്യോഗസ്ഥര്‍ എല്ലാ പഞ്ചായത്തുകളിലും എത്തുന്നുണ്ട്. കിസാന്‍ ക്രെഡിറ്റ് കാര്‍ഡ്, മുദ്ര, സ്റ്റാന്‍ഡ് അപ് ഇന്ത്യ മുതലായ സ്‌കീമുകളില്‍ അര്‍ഹതയുള്ളവര്‍ക്ക് ക്യാമ്പില്‍ വച്ചു തന്നെ തത്വത്തില്‍ അംഗീകാരം നല്‍കും. പ്രധാനമന്ത്രി ഉജ്വല യോജന മുഖേന അര്‍ഹരായവര്‍ക്ക് ഗ്യാസ് കണക്ഷന്‍ എടുക്കുന്നതിന് രജിസ്റ്റര്‍ ചെയ്യുന്നതിനുള്ള സൗകര്യവും ആധാര്‍ സേവനങ്ങളും യാത്രയില്‍ ലഭ്യമാക്കിയിട്ടുണ്ട്.

ജില്ലാ ലീഡ് ബാങ്കിന്റെ നേതൃത്വത്തില്‍ വിവിധ സര്‍ക്കാര്‍ വകുപ്പുകളുടെ സഹകരണത്തോടെയാണ് എല്ലാ ഗ്രാമ പഞ്ചായത്തുകളിലും വികസിത് ഭാരത് സങ്കല്‍പ് യാത്ര പ്രയാണം നടത്തുന്നത്. വിവിധ കേന്ദ്ര പദ്ധതികളെക്കുറിച്ച് വിദഗ്ധര്‍ വിശദീകരിക്കും. യാത്രയുടെ ഭാഗമായി ഒരുക്കിയ പ്രത്യേക വാനില്‍ പദ്ധതികളെക്കുറിച്ചുള്ള വീഡിയോ പ്രദര്‍ശനവും ഉണ്ടായിരിക്കും. ഇതോടൊപ്പം പദ്ധതികളുടെ വിവരങ്ങള്‍ അടങ്ങിയ ലഘുലേഖകള്‍ വിതരണം ചെയ്യും. പദ്ധതികളെക്കുറിച്ചുള്ള പരാതികളും സംശയങ്ങളും പരിഹരിക്കാന്‍ യാത്രക്കൊപ്പം വിവിധ വകുപ്പുകളിലെ ഉദ്യോഗസ്ഥരുമുണ്ട്. കാര്‍ഷിക മേഖലയില്‍ സാങ്കേതിക വിദ്യകള്‍ പ്രയോഗിക്കുന്നതിന്റെ ഭാഗമായി വളപ്രയോഗം നടത്തുന്നതിനുള്ള ഡ്രോണ്‍ സാങ്കേതിക വിദ്യ പരിചയപ്പെടുത്തും. കൂടാതെ വിവിധ പദ്ധതികളിലെ ഗുണഭോക്താക്കള്‍ തങ്ങളുടെ അനുഭവങ്ങള്‍ പങ്കുവക്കുന്നതും പദ്ധതികളെക്കുറിച്ച് കൂടുതല്‍ മനസിലാക്കാന്‍ സഹായിക്കുന്നു.

രാവിലെ 10.30ന് കോടിക്കുളം യൂണിയന്‍ ബാങ്ക് ഓഫ് ഇന്ത്യാ ബ്രാഞ്ചിന് മുന്നില്‍ യാത്ര എത്തിച്ചേരും. ഇതോടനുബന്ധിച്ച് നടക്കുന്ന യോഗം കോടിക്കുളം ഗ്രാമപഞ്ചായത്ത് പ്രസിഡന്റ് ടി.വി സുരേഷ് ബാബു ഉദ്ഘാടനം ചെയ്യും. ലീഡ് ബാങ്ക് മാനേജര്‍ ജോസ് ജോര്‍ജ്ജ് വളവി, നബാര്‍ഡ് ഡി.ഡി.എം അജീഷ് ബാബു, എസ്.ബി.ഐ തൊടുപുഴ റീജിയണല്‍ ഹെഡ് എം.ആര്‍ സാബു, കേരളാ ഗ്രാമീണ്‍ ബാങ്ക് കോട്ടയം റീജിയണല്‍ ഹെഡ് സുരേഷ് കുമാര്‍, ഗ്രാമപഞ്ചായത്തംഗം ജേര്‍ളി റോബി, യൂണിയന്‍ ബാങ്ക് ഓഫ് ഇന്ത്യ കോടിക്കുളം ബ്രാഞ്ച് മാനേജര്‍ വി. ബിസ്മി തുടങ്ങിയവര്‍ സംസാരിക്കും. കേന്ദ്ര പദ്ധതികളുടെ ഗുണഫോക്താക്കളായ എ.കെ അജേഷ്, വേണു എന്നിവര്‍ അനുഭവങ്ങള്‍ പങ്കുവക്കും. കൃഷി വിഗ്യാന്‍ കേന്ദ്ര, കൃഷി വകുപ്പ്, നെഹൃ യുവ കേന്ദ്ര, ആരോഗ്യ വകുപ്പ്, ഇന്ത്യന്‍ ഓയില്‍ കോര്‍പ്പറേഷന്‍, ജന്‍ ഔഷധി, ബാങ്ക് എന്നിവയുമായി ബന്ധപ്പെട്ട് അഞ്ച് മിനിട്ട് വീതം വരുന്ന വീഡിയോകളുടെ പ്രദശനവും ഇതോടൊപ്പം ഉണ്ടാകും.

വികസിത് ഭാരത് സങ്കല്‍പ്പ് യാത്ര നാളെ (5/12, ചൊവ്വ) രാവിലെ 10.30ന് കുടയത്തൂര്‍ യൂണിയന്‍ ബാങ്ക് ബ്രാഞ്ചിന് സമീപവും ഉച്ചക്ക് 2.30ന് ഉടുമ്പന്നൂര്‍ സ്റ്റേറ്റ് ബാങ്ക് ഓഫ് ഇന്ത്യ
ബ്രാഞ്ചിന് മുന്നിലും എത്തിച്ചേരും.

--NK--

(Release ID: 1982181) Visitor Counter : 196