गोंय/मुंबई, 23 नोव्‍हेंबर 2023

इफ्फी सारकिल्या सिनेमा महोत्सवांची सोबीतकाय म्हळ्यार, देशांतल्या वेगवेगळ्या कोनशांतल्यान वेगवेगळ्या भाशांनी सांगिल्ल्या कणियांक एकठांय हाडून, हो मंच एका जाग्यार सिने मेजवानी दिता. अंदूं वर्सा लेगीत इफ्फी, गोंयच्या चित्रपटांचें खाशेलें क्युरेट केल्लें पॅकेज घेवन येता, जें फाल्यां सावन इफ्फीच्या वेगवेगळ्या सुवातींनी पळोवपाक उक्तें आसतलें. गोंयच्या फिल्म पॅकेजीची सुरवात फाल्यां (24.11.2023) पणजेच्या आयनॉक्स स्क्रीन-4 हांगा दिनेश पी. भोंसले दिग्दर्शीत ‘गाथन’ ह्या चित्रपटान जातली.

गोंय फिल्म्स पॅकेजीचो भाग आशिल्ल्या फिल्मांचेर आनी तांचे नियोजीत वेळेचेर एक नदर मारुया :

1. ‘गाथन’

दिग्दर्शक: दिनेश पी. भोंसले

सारांश : कमलाकर उर्फ तातू ह्या एक 63 वर्सांच्या मनीशाचो, आपल्या धाकल्या भाव बाबुलगो  (58) कडेन खूब बरे संबंद आसता. तातू नुस्तेंमारी वेवसायांत आसता जाल्यार, बाबुलगो मुंबयंत बरो स्थायिक आसा. तातूचो पूत सदा (26) थळाव्या बिल्डरा वांगडा काम करता जाल्यार, बाबुलगोची धूव वेदिका (25) अमेरिकेंत काम करता आनी तिचें लग्न तिच्या अमेरिकन इश्टा कडेन जालां. अमेरिकन मनशा कडेन तिचें लग्न, हें तातू आनी गांवच्या लोकांखातीर मोठी उपलब्धी. देवतेचो आशीर्वाद घेवपा खातीर बाबुलगो नव्या जोडप्या वांगडा गोंय भोंवडेची येवजण करता. जोडप्याक घरांत बरे दिसचें म्हणून, तातू गरजेची सगळी वेवस्था करता. पूण ती मात हॉटेलांत रावपाचें थारायतात. तातुक ताचे दुख्ख जाता. बाबुलगो जोडप्या वांगडा जेवणा खातीर ताका भेट दिवपाचें उतर दिता. अर्थीक संकश्टां आसून लेगीत, तातू शेजाऱ्यांक आनी इश्टांक आपोवन त्यांच्या येवकाराची वेवस्था करता. थारायिल्ल्या दिसा बाबुलगो घरा पावना. सदा मोबायलाचेर फोन करपाचो यत्न करता, पूण ताचो फोन बंद आसता. सोयरे जमून बाबुलगो आनी नव्या जोडप्याक मेळपाची आतुरतेन वाट पळयता, म्हणून तातूक हुस्को दिसता.

फिल्म स्क्रिनिंग स्थळ आनी वेळ: आयनॉक्स- स्क्रीन 4, पणजी 24.11.2023: सांजेच्या 7 वरांचेर

2. #मोग 

दिग्दर्शक : निलेश मालकर

सारांश : लायनेल, एक प्रवासी भारतीय शेफ जो आपल्या आवयच्या मरणाक मानसीक जापसालदार धरपी, आपल्या विरक्त बापायच्या मरणा उपरांत मालमत्तेच्यो गजाली सांबाळपाक, परतून गोंयांत येवचो आसता. ताका मोगान पडपाची अपेक्षा नासतना ताका सेलिना मेळटा, जी ताच्या बापायचो ब्रेड डिलिव्हरी वेवसाय पळयत आसता, आनी तो मोगान पडटा. ल्हान पिरायेचेर तांची आवय सोडून गेल्ल्यान, सेलीना आनी तिचे भयणिक तांचो बापूय अँथनी वाडयता. सेलिना आनी लायनेल हांचे मदीं मोग फुलता, पूण सेलिनाचो बापूय तिचे विशीं एक गुपीत दवरता. ताच्या नात्यांतल्या आनी लागींच्या इश्टांनी सेलिनाकडेन ते  गुपीत उक्तें करपाक सांगले, आसतना तो फाटीफुडे करता. सेलिनाक जेन्ना सत्य कळटा तेन्ना, ती लायनेला कडेन ब्रेकअप करता. तांच्या मोगाक, तांच्या काळजान वाट मेळटली, काय लायनेल सगळें सोडून परत कॅनडाक वतलो?

फिल्म स्क्रिनिंग स्थळ आनी वेळ: मॅकनेझ पॅलेस-I, पणजी 26.11.2023: दनपारां 2.20 वरांचेर  

3. क्रेझी मोगी

दिग्दर्शक: क्रिस्ट सिल्वा

सारांश : अर्जुन आनी जोकीम हांचे जीवित आनी तांणी आपल्या मोगाच्या वेगवेगळ्या आडमेळ्यांचेर रॉयच्या आदारान कशे तरेन मात, केली  हांचेर चित्रपट आदारीत आसा. हो चित्रपट विनोदी आसलो तरी तातूंत नात्यांची परिपक्वताय आसा. चित्रपटाच्या पुराय प्रवासांत पात्रांक मोग आनी जिणे विशीं एक नवी नदर मेळटा.

फिल्म स्क्रिनिंग स्थळ आनी वेळ: मॅकनेझ पॅलेस-I, पणजी 27.11.2023: दनपारां 2.20 वरांचेर 

4. मारवट 

दिग्दर्शक: राजाराम गोपाळ तुरी

सारांश : मारवट हो आंतरजातीय लग्न ह्या विशयाचेर आदारिल्लो लघुपट आसा. वेगवेगळ्या जातींतल्या दोन मनशांच्या मोगाची ही काणी. चली म्हार ह्या सकयल्या जातीची. बांबूचे हस्तकला तयार करपाचे कलेखातीर म्हार लोकांची नामना आसा. दर एका लग्नांत ह्या हस्तकलेची म्हत्वाची भुमिका आसता. आमच्या समाजांत चालू आशिल्ल्या पूर्वग्रहांचेर हे फिल्म उजवाड घालता.

फिल्म स्क्रिनिंग स्थळ आनी वेळ: आयनॉक्स- स्क्रीन 3, पणजी 27.11.2023: सकाळीं 9.15 वरांचेर 

5. पीस लिली सेंड कॅसल

दिग्दर्शक: हिमांशु सिंग

सारांश : जानकी, तिचो घोव जॉय हाची आदली बायल मानवीक मेळटा. फ्लॅटाची मालकी हस्तांतरित करपा संबंदीं कागदपत्रांचेर सय करपा विशीं तांच्या संवादां वेळार, मानवी आपल्या घराच्या झलकांनी भावुक जाता. जंय दोगांकय जिणेचे नवे धडे शिकपाक मेळटात.

फिल्म स्क्रिनिंग स्थळ आनी वेळ: आयनॉक्स - स्क्रीन 3, पणजी 25.11.2023 : सकाळीं 9.15 वरांचेर 

6. द विटनेस

दिग्दर्शक: ट्रॉय रिबेरो

सारांश : गोंयात पावसाच्या वेळार घडिल्लें हें मानसशास्त्रीय नाटक. सत्तर वर्सांचो जोकीम आपल्या भूतकाळाक परतून नदर मारता आनी एक गुपीत उक्तें करपाक लायता, तेन्ना सत्य कशें भायर सरता तें हातूंत आसा. निमाणें ह्या खुलाश्या उपरांत, ताच्या नात्यात बदल जातलो काय कितें, असो प्रस्न प्रेक्षकांक पडटा. 

फिल्म स्क्रिनिंग स्थळ आनी वेळ: आयनॉक्स - स्क्रीन 3, पणजी 27.11.2023: सकाळीं 9.15 वरांचेर 

7. यशोदा 

दिग्दर्शक: प्रवीण चौगुले

सारांश : लेखिका माधुरी अशिर्गडे, ईश्वरी विशीं काणी सांगता. एकदां लेखकान ईश्वरी हांकां सना आनी  शिखा ह्या दोन धुवां वांगडा पळयली. चवकशी करतना माधुरीक कळटा, की ईश्वरीन आपली घरगडी हंसाच्या मरणा उपरांत, तांचेमदल्या एकल्याक कायदेशीर रितीन दत्तक घेतला.  यशोदा हो लघुपट मनीसपणाची   आनी आवयपणाची काणी आसा. 

फिल्म स्क्रिनिंग स्थळ आनी वेळ: आयनॉक्स - स्क्रीन 3, पणजी 25.11.2023: सकाळीं 9.15 वरांचेर 

अदिक म्हायतीखातीर: https://filmguide.iffigoa.org/?&section=263

* * *

PIB Mumbai | S.Jan/M.Prabhugaonkar/D.Rane