देशव्यापी डिजिटल जीवन प्रमाणपत्र  (डीएलसी ) मोहिमेचा एक भाग म्हणून, निवृत्तिवेतनधारकांना चेहरा प्रमाणीकरण तंत्रज्ञानाद्वारे डिजिटल जीवन प्रमाणपत्र सादर करण्यासाठी  मदत करण्याच्या अनुषंगाने गोव्यात विशेष शिबिरे आयोजित केली जात आहेत. गोव्यात स्टेट बँक ऑफ इंडियाच्या सहकार्याने  डिजिटल जीवन प्रमाणपत्र  सादर करण्यासाठी   1 ते 30 नोव्हेंबर 2023 दरम्यान ही शिबीरे आयोजित करण्यात आली आहेत.    

केंद्र सरकारच्या निवृत्तीवेतनधारकांची   ‘जीवनमान  सुलभता ’ वाढवण्यासाठी, निवृत्तीवेतन आणि निवृत्ती वेतनधारक कल्याण विभाग डिजिटल जीवन प्रमाणपत्र   म्हणजेच 'जीवन प्रमाण' चा  व्यापक  प्रचार करत आहे. बायोमेट्रिक उपकरणांचा वापर करून डिजिटल जीवन प्रमाणपत्र  सादर करायला  2014 मध्ये सुरुवात झाली .  त्यानंतर, विभागाने  इलेक्ट्रॉनिक्स आणि माहिती तंत्रज्ञान मंत्रालय आणि भारतीय विशिष्ट ओळख प्राधिकरण (यूआयडीएआय) यांच्या सहकार्याने आधार डेटाबेसवर आधारित चेहरा प्रमाणीकरण  तंत्रज्ञान प्रणाली विकसित केली. यामुळे   कोणत्याही अँड्रॉईड  आधारित स्मार्ट फोनवरून जीवन प्रमाणपत्र सादर करणे शक्य झाले आहे. या सुविधेअंतर्गत , चेहरा प्रमाणीकरण  तंत्राद्वारे व्यक्तीची ओळख पटवली जाते आणि डिजिटल जीवन प्रमाणपत्र  तयार केले जाते. नोव्हेंबर 2021 मध्ये सुरु  करण्यात आलेल्या या यशस्वी तंत्रज्ञानाने निवृत्तीवेतनधारकांचे बाह्य बायोमेट्रिक उपकरणांवरील अवलंबित्व कमी केले आणि स्मार्टफोन-आधारित तंत्रज्ञानाचा लाभ घेऊन ही प्रक्रिया अधिक सुलभ आणि किफायतशीर  बनवली.
 
1 ते 30 नोव्हेंबर 2023 या कालावधीत देशभरातील 100 शहरांमधील 500 ठिकाणी ही राष्ट्रव्यापी मोहीम राबवण्यात येत आहे. यामध्ये  17 निवृत्तीवेतन   वितरण बँका, मंत्रालये/विभाग, निवृत्तीवेतनधारक कल्याण संघटना , यूआयडीएआय, इलेक्ट्रॉनिक्स आणि माहिती तंत्रज्ञान मंत्रालय यांच्या सहकार्याने 50 लाख निवृत्तीवेतनधारकांच्या डिजिटल जीवन प्रमाणपत्र सादरीकरणाचे उद्दिष्ट ठेवले आहे. .गोव्यात, भारतीय स्टेट बँकेने उत्तर गोव्यातील म्हापसा, पणजी मुख्य , पणजी सचिवालय, कोषागार  शाखा पणजी,  पीबीबी मिरामार आणि दक्षिण गोव्यातील वास्को द गामा, मडगाव मुख्य , फोंडा , कानकोन, सानवरडेम येथे शिबिरे सुरू केली आहेत.

जीवन प्रमाणपत्र  सादरीकरणाच्या  डिजिटल पद्धतींचा लाभ देशाच्या कानाकोपऱ्यातील निवृत्तीवेतनधारकांपर्यंत  आणि वृद्ध  /आजारी/अशक्त निवृत्तीवेतनधारकांपर्यंत पोहोचणे  सुनिश्चित करण्यासाठी,  तपशीलवार मार्गदर्शक तत्त्वांसह एक व्यापक परिपत्रक जारी करण्यात आले आहे, यात  सर्व हितसंबंधीतांच्या  भूमिका आणि जबाबदाऱ्या परिभाषित केल्या आहेत यामध्ये भारत सरकारची मंत्रालये/विभाग, निवृत्तीवेतन  वितरण बँका आणि निवृत्तीवेतनधारक संघटना  यांचा समावेश आहे. या मार्गदर्शक तत्त्वांमध्ये  या मोहिमेसाठी हितसंबंधितांद्वारे नोडल अधिकाऱ्यांची नियुक्ती, कार्यालये आणि बँक शाखा/एटीएममध्ये नियोजनबद्ध लावलेल्या फलक /पोस्टरद्वारे डिजिटल जीवन प्रमाणपत्र -चेहरा प्रमाणीकरण  तंत्राची जनजागृती/प्रसिद्धी करणे ,  शक्य तितक्या प्रमाणात जिथे  घरोघरी जाऊन  बँकिंग सेवा उपलब्ध आहेत तिथे डिजिटल जीवन प्रमाणपत्र /चेहरा प्रमाणीकरण  तंत्राचा वापर, निवृत्तीवेतनधारक  जीवन प्रमाणपत्र सादर करण्यासाठी जेव्हा शाखेला भेट देतात तेव्हा हे तंत्रज्ञान वापरण्यासाठी बँक शाखांमधील समर्पित कर्मचार्‍यांना अँड्रॉइड फोनसह सुसज्ज करणे, निवृत्तिवेतनधारकांना  विलंब न करता त्यांचे डिजिटल जीवन प्रमाणपत्र  जमा करता यावे यासाठी शिबिरांचे आयोजन ,अंथरुणाला खिळलेल्या निवृत्ती वेतनधारकांना जीवन प्रमाणपत्र सादर करता यावे यासाठी त्यांच्या घरी  भेट देणे या गोष्टींचा या मार्गदर्शक तत्वांमध्ये समावेश आहे.

निवृत्तिवेतनधारक कल्याण संघटनांना  देखील डिजिटल जीवन प्रमाणपत्र सादर करण्याच्या अनुषंगाने  निवृत्तीवेतनधारकांसाठी शिबिरे आयोजित करण्यासाठी जागरूक  करण्यात आले आहे. निवृत्तीवेतन आणि निवृत्तिवेतनधारक कल्याण विभागाचे अधिकारी निवृत्तीवेतनधारकांना त्यांचे जीवन प्रमाणपत्र सादर करण्यासाठी विविध डिजिटल पद्धतींचा वापर करण्यास मदत करण्यासाठी देशभरातील प्रमुख ठिकाणांना भेटी देतील.

स्रोत: निवृत्तीवेतन आणि निवृत्तीवेतनधारक कल्याण विभाग

***

NM/SonalC/DY

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

(Release ID: 1975808) Visitor Counter : 84