സമീപ വർഷങ്ങളിൽ ആഗോള തലക്കെട്ടുകൾ നേടിയ ഒരു ഇന്ത്യൻ സംരംഭം ഉണ്ടെങ്കിൽ, അത് നിസ്സംശയമായും യുപിഐ (യൂണിഫൈഡ് പേയ്മെന്റ്സ് ഇന്റർഫേസ്) പണം അടയ്‌ക്കൽ സംവിധാനമാണ്. ഇന്ന്, ഇന്ത്യയിൽ നടക്കുന്ന എല്ലാ പേയ്മെന്റുകളുടെയും 40% ത്തിലധികം ഡിജിറ്റൽ ആണ്.

തെരുവ് കച്ചവടക്കാർ മുതൽ വലിയ ഷോപ്പിംഗ് മാളുകൾ വരെ എല്ലാ തലങ്ങളിലും യുപിഐ ഉപയോഗിക്കുന്നു. ഇന്ന്, ലോകത്തിൽ ഏറ്റവും കൂടുതൽ ഡിജിറ്റൽ ഇടപാടുകളുള്ള രാജ്യമാണ് ഇന്ത്യ - 2022 ലെ ഡാറ്റ അനുസരിച്ച് ഏകദേശം 46% വിഹിതം. ബ്രസീൽ, ചൈന, തായ്ലൻഡ്, ദക്ഷിണ കൊറിയ എന്നിവയാണ് തൊട്ട് പിന്നിലുള്ളത്. 2016 ൽ വെറും ഒരു ദശലക്ഷം ഇടപാടുകളിൽ നിന്ന് യുപിഐ, 10 ബില്യൺ (1,000 കോടി) ഇടപാടുകൾ എന്ന നാഴികക്കല്ലും മറികടന്നു.

യുപിഐ കൊണ്ടുവന്ന ഏറ്റവും വലിയ മാറ്റം ഇന്ത്യക്കാർ ഇടപാട് നടത്തുന്ന രീതിയിലാണ്. ഗ്ലോബൽ ഡാറ്റാ റിസർച്ച് അനുസരിച്ച്, പണമിടപാടുകൾ 2017 ലെ മൊത്തം അളവിന്റെ 90 ശതമാനത്തിൽ നിന്ന് 60 ശതമാനത്തിൽ താഴെയായി കുറഞ്ഞു. 2016 ൽ 500, 1000 രൂപ നോട്ടുകൾ ഘട്ടം ഘട്ടമായി പിൻവലിച്ച് ആറ് മാസത്തിനുള്ളിൽ യുപിഐയിലെ മൊത്തം ഇടപാടിന്റെ അളവ് 2.9 ദശലക്ഷത്തിൽ നിന്ന് 72 ദശലക്ഷമായി ഉയർന്നു. 2017 അവസാനത്തോടെ യുപിഐ ഇടപാടുകൾ മുൻ വർഷത്തെ അപേക്ഷിച്ച് 900 ശതമാനം വർദ്ധിച്ചു.

യുപിഐ അവിശ്വസനീയമാംവിധം ഉപയോക്തൃ സൗഹൃദമാണ്. സെൻസിറ്റീവ് ബാങ്ക് വിശദാംശങ്ങൾ പങ്കിടേണ്ടതിന്റെ ആവശ്യകത ഇല്ലാതാക്കിക്കൊണ്ട് വെർച്വൽ പേയ്മെന്റ് അഡ്രസ് (വിപിഎ) ഉപയോഗിച്ച് പണം അടയ്ക്കാൻ നടത്താൻ ഇത് ഉപയോക്താക്കളെ അനുവദിക്കുന്നു. ഈ പ്രക്രിയ ഒരു സ്മാർട്ട് ഫോണിൽ ഒരു ടെക്സ്റ്റ് സന്ദേശം അയയ്ക്കുന്നതുപോലെ ലളിതമാണ്. അതിന്റെ സ്വാധീനം സൗകര്യത്തിനപ്പുറത്തേക്ക് വ്യാപിക്കുന്നു. ഇത് സാമ്പത്തിക ഉൾച്ചേർക്കൽ, സുതാര്യത, അനൗപചാരിക സമ്പദ്വ്യവസ്ഥ കുറയ്ക്കൽ എന്നിവയ്ക്ക് കാരണമാകുന്നു.

ഡിജിറ്റൽ പണം അടയ്‌ക്കൽ സംവിധാനത്തിന്റെ വിജയം, ഡിജിറ്റൽ പണം അടയ്‌ക്കൽ അടിസ്ഥാന സൗകര്യം വർധിപ്പിക്കുന്നതിൽ മാത്രമല്ല, പണത്തിൽ നിന്ന് ഡിജിറ്റലിലേക്ക് മാറാൻ ആളുകളെ പ്രോത്സാഹിപ്പിച്ച പെരുമാറ്റത്തിലും അടങ്ങിയിരിക്കുന്നു.

റുപേ ക്രെഡിറ്റ് കാർഡുകൾ യുപിഐയുമായുള്ള സംയോജനം ഡിജിറ്റൽ പേയ്‌മെന്റ് വ്യവസ്ഥയിലെ ഒരു വിപ്ലവകരമായ ചുവടുവെപ്പിനെ അടയാളപ്പെടുത്തുന്നു. ഇതിലൂടെ ക്രെഡിറ്റ് കാർഡുകളുടെയും യുപിഐയുടെയും ഗുണങ്ങൾ ഉപഭോക്താക്കൾക്ക് ലഭിക്കുന്നു.

യുപിഐ ഇടപാടുകൾക്കായി ക്രെഡിറ്റ് കാർഡുകൾ വാഗ്ദാനം ചെയ്യുന്ന ഹ്രസ്വകാല ക്രെഡിറ്റ് സൗകര്യം പ്രയോജനപ്പെടുത്തുന്നതിലൂടെ കാർഡ് ഉടമകൾക്ക് അവരുടെ സേവിംഗ്സ് അക്കൗണ്ടുകളിൽ നിന്ന് എടുക്കുന്നതിനുപകരം ക്രെഡിറ്റ് ലൈനുകൾ ഉപയോഗിച്ച് പേയ്മെന്റുകൾ ആരംഭിക്കാൻ കഴിയും.

യുപിഐയുടെ പ്രാദേശിക വിജയത്തെത്തുടർന്ന്, രാജ്യത്തിന് പുറത്ത് ഈ സംവിധാനം വിപുലീകരിക്കുന്നതിനായി നാഷണൽ പേയ്മെന്റ്സ് കോർപ്പറേഷൻ ഓഫ് ഇന്ത്യ (എൻപിസിഐ) 2020 ൽ എൻഐപിഎൽ (എൻപിസിഐ ഇന്റർനാഷണൽ പേയ്മെന്റ്സ് ലിമിറ്റഡ്) എന്ന പേരിൽ ഒരു വിഭാഗം രൂപീകരിച്ചു. അതിനുശേഷം, എൻഐപിഎല്ലും റിസർവ് ബാങ്കും 30 ലധികം രാജ്യങ്ങളിലെ ധനകാര്യ സ്ഥാപനങ്ങളുമായി യുപിഐ അധിഷ്ഠിത ഇടപാടുകൾ ഇന്ത്യയുടെ അതിർത്തിക്കപ്പുറത്തേക്ക് വ്യാപിപ്പിക്കുന്നതിന് കരാറുകളിൽ ഏർപ്പെട്ടു. സമീപകാലത്ത് ഫ്രാൻസ്, യുഎഇ, ശ്രീലങ്ക എന്നീ രാജ്യങ്ങൾ യുപിഐയിൽ ചേർന്നിട്ടുണ്ട്. ഫ്രാൻസിലേക്കുള്ള യുപിഐയുടെ പ്രവേശനം പ്രാധാന്യമർഹിക്കുന്നു. ഇത് ആദ്യമായി യൂറോപ്പിൽ ചുവടുറപ്പിക്കാൻ സഹായിക്കുന്നു. ആറ് പുതിയ അംഗരാജ്യങ്ങളുള്ള ബ്രിക്സ് ഗ്രൂപ്പിലേക്ക് യുപിഐ വിപുലീകരിക്കണമെന്ന് പ്രധാനമന്ത്രി മോദി ആവശ്യപ്പെട്ടു.

2016 ലെ ചെറിയ തുടക്കം മുതൽ, യുപിഐയുടെ അസാധാരണമായ സ്വീകാര്യത ഇന്ന് അതിന്റെ വ്യാപ്തിയിലും സ്വാധീനത്തിലും സമാനതകളില്ലാത്ത ഒരു കഥയാണ്.

(Release ID: 1973080) Visitor Counter : 186