एक भारत श्रेष्ठ भारत (ईबीएसबी) उपक्रमाचा एक महत्त्वाचा घटक असलेल्या भारत सरकारच्या युवा संगम कार्यक्रमाच्या अंमलबजावणीवर देखरेख ठेवण्यासाठी राष्टीय तंत्रज्ञान संस्था (एनआयटी) , गोवा या संस्थेला  गोव्यातील नोडल संस्था म्हणून नियुक्त करण्यात आले आहे.

युवा संगम हा एक युवा -केंद्रित उपक्रम असून  सांस्कृतिक देवाणघेवाण आणि राष्ट्रीय एकात्मतेला प्रोत्साहन देण्याच्या दृष्टीने त्याची रचना करण्यात आलेली आहे. या कार्यक्रमाचा एक भाग म्हणून, एनआयटी  गोवा नोव्हेंबर ते डिसेंबर 2023 दरम्यान  गोव्यातून छत्तीसगडच्या सहलीचे  आयोजन करणार आहे. 

या उपक्रमांतर्गत, गोव्यातील विविध उच्च शैक्षणिक संस्थांमधील विद्यार्थ्यांना, तसेच संस्था -बाह्य पार्श्वभूमी असलेल्या तरुण व्यक्तींना सहभागी होण्याची संधी मिळेल. पात्र होण्यासाठी, इच्छुक विद्यार्थी 18-30 वयोगटातील असावेत.

या उपक्रमासाठी नोंदणी सुरु  आहे, आणि पात्र सहभागींना 28 ऑक्टोबर 2023 च्या अंतिम मुदतीपूर्वी   https://ebsb.aicte-india.org/  पोर्टलवर नोंदणी करण्यास प्रोत्साहित केले जात आहे. हा उपक्रम भारताची समृद्ध सांस्कृतिक विविधतेचा  उत्सव  साजरा  करण्याच्या आणि देशभरात एकात्मतेला प्रोत्साहन देण्याच्या एक भारत श्रेष्ठ भारत कार्यक्रमाच्या उद्दिष्टाशी संरेखित आहे.सांस्कृतिक दरी  भरून काढण्यासाठी, परस्पर सामंजस्य  वाढवण्यासाठी आणि अधिक एकात्मिक आणि सौहार्दपूर्ण  भारताच्या निर्मितीच्या दिशेने  हे एक महत्त्वपूर्ण पाऊल आहे.

***

S.Kane/S.Chavan/P.Kor

*** 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

(Release ID: 1968536) Visitor Counter : 89