نائب صدرجمہوریہ جناب جگدیپ دھنکھر نے آج ہریانہ کے ترقی پسند کسانوں کو پارلیمنٹ ہاؤس بلا کر مبارکباد پیش کی جیسا کہ انہوں نے وعدہ کیا تھا اور ان کے ساتھ لنچ کیا۔ واضح رہے کہ 8 اکتوبر 2023 کو جناب دھنکھر نے ہریانہ کے ہسار کا دورہ کیا تھا، جہاں انہوں نے چودھری چرن سنگھ زرعی یونیورسٹی میں کرشی وکاس میلے کا افتتاح کیا۔ ہسار میں کسانوں سے خطاب کرتے ہوئے انہوں نے انہیں پارلیمنٹ کی نئی عمارت کا دورہ کرنے کی دعوت دی تھی۔

ان کی باتوں پر عمل کرتے ہوئے آج ہریانہ کے پچاس سے زیادہ ایوارڈ یافتہ کسانوں نے پارلیمنٹ ہاؤس کا دورہ کیا۔ نائب صدر جمہوریہ نے کسانوں سے بات چیت کی اور انہیں سرٹیفکیٹ اور شال سے نوازا۔ قابل ذکر ہے کہ ان کسانوں کو ہریانہ حکومت نے زراعت، باغبانی، ڈیری اور ماہی پروری جیسے مختلف شعبوں میں اختراعی ٹیکنالوجی کا استعمال کرتے ہوئے بہترین کارکردگی کے لیے ایوارڈ سے نوازا تھا۔

کسانوں سے خطاب کرتے ہوئے نائب صدر جمہوریہ نے انہیں ملک کی معیشت کی ریڑھ کی ہڈی قرار دیا اور کہا کہ کسان ہونا فخر کی بات ہے۔

ہماری معیشت میں زراعت کی اہمیت کو اجاگر کرتے ہوئے، انہوں نے کہا، ”جب کسان خوش ہوتا ہے، تو اس سے پورے ملک میں خوشی ہوتی ہے اور معاشرے کے تمام طبقات خوشحال ہوتے ہیں!“

پارلیمنٹ ہاؤس میں کسانوں کے دورے پر خوشی کا اظہار کرتے ہوئے، انہوں نے کہا، ”آج کا دن ایک خاص دن ہے کیونکہ دنیا بھر سے اور جی-20 ممالک کے اراکین پارلیمنٹ ہمارے ملک میں موجود ہیں۔ آپ کا پارلیمنٹ کا دورہ اس اہم دن کے ساتھ مخصوص ہے۔ یہ پارلیمنٹ ملک کی سب سے بڑی پنچایت کے طور پر کھڑی ہے اور آج یہاں حق پرست لوگ جمع ہیں۔ اس فورم میں کسانوں اور کھیتی باڑی کے بارے میں بات چیت کو مرکزی حیثیت حاصل ہونی چاہیے۔

وزیر اعظم کی طرف سے راجیہ سبھا میں انہیں ’کسان پتر‘ کے طور پر متعارف کرانے پر خوشی کا اظہار کرتے ہوئے نائب صدر نے کہا کہ وہ ان اداروں کا مستعدی سے دورہ کر رہے ہیں جو کسانوں کی بہبود سے متعلق ہیں۔

کسانوں کو حکومت ہریانہ سے ایوارڈ ملنے پر مبارکباد دیتے ہوئے انہوں نے کہا کہ وہ دوسروں کے لیے تحریک کا ذریعہ ہیں اور لوگوں کو ان کی تقلید کرنی چاہیے۔

نائب صدر جمہوریہ نے اس بات پر بھی روشنی ڈالی کہ زرعی مصنوعات اور کھانے پینے کی اشیا میں تجارت کے وسیع مواقع موجود ہیں اور آج کے IIT، IIM سے تعلیم یافتہ نوجوان بھی اس شعبے میں آ رہے ہیں۔ انہوں نے اپیل کی کہ کسانوں اور کسانوں کے بیٹے اور بیٹیاں بھی اس میں آگے آئیں۔

زرعی سامان کی تجارت اور برآمد میں کسانوں کی شمولیت کو بڑھانے کی ضرورت پر زور دیتے ہوئے، جناب دھنکھر نے اس بات پر زور دیا کہ کسانوں کو قیمت میں اضافے اور زرعی مصنوعات کی مارکیٹنگ میں اپنا کردار بڑھانا چاہیے۔ جدید ٹیکنالوجی کی اہمیت اور فارمر پروڈیوسر آرگنائزیشن (ایف پی او) کی تشکیل پر روشنی ڈالتے ہوئے نائب صدر نے کہا کہ کسانوں کو انہیں اپنانے میں ہچکچاہٹ محسوس نہیں کرنی چاہیے۔

حکومت کی طرف سے شروع کیے گئے مختلف کسان دوست اقدامات جیسے کہ پی ایم کسان یوجنا، سوائل ہیلتھ کارڈ، ایف پی او اور مزید کا حوالہ دیتے ہوئے، انہوں نے کہا، ”میں یہ بات انتہائی سنجیدگی کے ساتھ کہتا ہوں کہ ہندوستان کے وزیر اعظم نے کسانوں کی فلاح و بہبود پر بہت زیادہ زور دیا ہے۔ میں آپ سے درخواست کرتا ہوں کہ ان پروگراموں سے فائدہ اٹھائیں۔ اس کے علاوہ، انہوں نے کہا، ”چودھری چرن سنگھ نے جو وژن رکھا، ہمارے موجودہ وزیر اعظم، جناب نریندر مودی اسے ہندوستان کے لوگوں کے لیے زمینی حقیقت میں بدل رہے ہیں۔

روایتی زراعت سے آگے بڑھنے کی اپیل کرتے ہوئے، جناب دھنکھر نے کسانوں کو مشورہ دیا کہ وہ ”نیا سوچیں، اور اپنی کاشتکاری کی سرگرمیوں کو نئے علاقوں میں متنوع بنائیں۔“

نائب صدر نے زور دے کر کہا، ”میں ایک چیز واضح کرنا چاہتا ہوں - آپ کی یہاں موجودگی کسی دعوت کی وجہ سے نہیں ہے۔ یہ آپ کا فطری حق ہے۔ میں نے اس دورے کے لیے محض ایک ذریعہ کے طور پر کام کیا ہے۔

اس موقع پر ہریانہ کے زراعت اور کسانوں کی فلاح و بہبود کی وزیر ڈاکٹر (محترمہ) سدیش دھنکھر، راجیہ سبھا کے رکن جناب جے پی دلال، ہریانہ کے محکمہ زراعت کے ایڈیشنل چیف سکریٹری جناب بپلب کمار دیو، محکمہ کے ڈائریکٹر جنرل جناب وجیندر کمار، ڈاکٹر نرہری سنگھ بنگر، اور کئی دیگر معززین موجود تھے۔

نائب صدر کی تقریر کا متن یہاں دیکھا جا سکتا ہے:

https://pib.gov.in/PressReleasePage.aspx?PRID=1967348

                                           **************

ش ح۔ ف ش ع- م ف

13-10-2023

U: 10797