ভারতকী রাস্ত্রপতি, শ্রীমতি দ্রৌপদি মুর্মুনা ঙসি (জুলাই 26, 2023) কত্তক্তা পাংথোকপা ওরিসাগী হাই কোর্তকী চহি 75 মপুং ফারকপগী ভেলেদিক্তরী থৌরমদা শরুক য়াখ্রে অমসুং ৱা ঙাঙখ্রে।

রাস্ত্রপতিনা কার্গিল লান্দা পুন্সি কত্থোকখ্রবা ভারতকী থৌনা ফরবা লান্মীশিংগী মফমদা ইকায় খুম্নবা উৎপগা লোয়ননা মহাক্কী ৱারোল হৌদোকখি। ভারত ইমাগীদমক্তা থৱাই থাখিবা লান্মী কয়াগী মনুংদা ওরিশাদগী লান্মী কয়াসু য়াওখি হায়না মহাক্না হায়খি। মেজর পদ্মাপানী অচার্য়বু মহা বীর চক্রা পীদুনা মহাক্কী সেবাগীদমক্তা ইকায় খুম্নখি। লান্মীশিং অসিগী মথৌনা ফবগী মতৌনা ঐখোয়গী লৈবাক মীয়ামগী মফমদা মতম পুম্বদা ইথিল পীগনি হায়না মহাক্না মখা তাখি।

ওরিসা হাই কোর্তকী চহি 75 মপুং ফাবগী থৌরমগী মতাংদা ঙাংলদুনা, রাস্ত্রপতিনা ওরিসাগী হাই কোর্তনা মহাক্কী চহি 75কী খোঙচৎ অসিদা অৱাংবা স্তেন্দর্দ কয়া থমম্লে হায়খি। হাই কোর্ত অসিগী লুমিনারীশিংগী মনুংদা বাবু জগন্নাথ দাস, রঙ্গনাথ মিশ্রা, রাধা চরন পত্নাইক, দেব প্রিয়া মহাপাত্রা, গোপালা বল্লব পত্নাইক, অরিজিত পসায়ত, অনঙ্গা কুমার পত্নাইক অমসুং দিপক মিশ্রাগুম্বা জস্তিস কয়া য়াওরি অমসুং মখোয়না সুপ্রীম কোর্তকী জজসু ওইখি অমসুং খরদি ভারতকী চীফ জস্তিসকী ফম ফাওবা পায়খি হায়না মহাক্না হায়খি। কোর্ত অসিগী মমিংগী মরুমদা হান্নগী অমসুং হৌজিক্কী চীফ জস্তিস, জজ, উকিল অমসুং হাই কোর্ত অসিগী স্তাফশিংগী মথৌ খঙবা, লুনা খনবা, খোঙফম চেৎপগী থৌওং লৈরি হায়না মহাক্না মখা তাখি।

মতমগী অহোংবগা লোয়ননা অহোংবা লাক্তবা ইন্সতিত্যুসন খুদিংনা তুংদা অদুমক লৈহৌগনি হায়না রাস্ত্রপতিনা হায়খি। ওরিসা হাই কোর্তনা অচুম্বা ৱায়েল পীবগী থৌওংদা তেক্নোলোজীনা চাউখৎলক্লিবা অসিগী কান্নবা লৌনবা হোৎনদুনা লাকখি হায়না মহাক্না পনখি। মতমগা চুনবা, ইন্নোভেতিব ওইবা অমসুং তেক্নোলোজীনা শাফু পীদুনা অহোংবা পুরকপগী থৌওং কয়াগী খুত্থাংদা অচুম্বা ৱায়েল পীবগী থৌওং হেন্না ফগৎহন্নবা হোৎনবগীদমক্তা মহাক্না ওরিসা হাই কোর্তপু থাগৎপা ফোংদোকখি।

লিগেলগী থবকশিং অসিনা ভারত্তা মীয়ামগী থাজবা ফংবা ঙম্লে হায়না রাস্ত্রপতিনা হায়খি। মসিনা মালেমগী খ্বাইদগী মপাঙ্গল লৈবা গনতন্ত্রগী মপাঙ্গল লৈবা য়ুম্বী অমা ওইনা লেপ্তুনা লৈরিবনি। লিগেল প্রোফেস্নেলশিংনা ত্রাইএল নীংথিনা পাংথোক্তুনা অচুম্বা ৱায়েল পীনবা হোৎনসি হায়না মহাক্না হায়খি। অরানবা মরালদগী জেলদা লৈরিবা মরাল লৈতবা ফাদোকশিংবু মসিনা মনিং তমহনবা ঙমগনি হায়না মহাক্না হায়খি।

ৱাইয়েল পীরবা মরালগী মখা পোনবা ফাদোক্কী মতমদগী য়াম্না হেন্দোক্না ফাদোক তাদুনা লৈবগী থৌওং কয়া লৈ হায়না রাস্ত্রপতিনা হায়খি। মসিনা মরম ওইরগা, মরাল লৈজদবা মীওই কয়ানা পুন্সিগী তাঙলবা মতম কয়া মাঙলি। নাকল অমদনা, মরাল লৈবশিংনা আইনগী চৈরাক ফংদবা মরম্না অৱাবা তারবশিংনা থাজবা মাঙবগী থৌদোক কয়াসু লৈ। মসিগুম্বা থৌওং অসি মিৎয়েং চঙফম থোকই। ওরিসা হাই কোর্তকা মরী লৈনরিবা মীপুম খুদিংনা অচুম্বা ৱায়েল অথুবা মতমদা পীনবা হোৎনদুনা লৈবাক মীয়াম মাঙদা খুদম অমা থম্নবা মহাক্না হায়খি।

ঐখোয়গী সংবিধান শেম্বশিংনা খুন্নাইগী সোসিএল অমসুং ইকোনোমিক্কী হীরমদা শোত্থরবা মীওইশিংদা অচুম্বা ৱায়েল পীবদা অহেনবা প্রাইওরিতী পীনবা হায়রম্মি হায়না রাস্ত্রপতিনা হায়খি। অচুম্বা ৱায়েল তান্নবগীদমক্তা মতিক চাবা লৌশিং নত্ত্রগা রিসোর্স অসি শোত্থরবা খুন্নাইশিংগী মীওইশিংগী মফমদা লৈতে। মরম অদুনা ‘মখোয়না মতৌ করম্না অচুম্বা ৱায়েল ফংগনি’ হায়বসি ৱাহং অমা ওইরি। ৱাহং অসিগী মতাংদা কুপ্না খন্ন-নৈনবগী মথৌ তারি।

মহৌশাগী অমাঙ-অতা থোকপগী থৌদোক্না মীওইবা খুন্নাইদা অচৌবা শিংনবা অমা পীরি হায়না রাস্ত্রপতিনা হায়খি। মহৌশাগী চুননা লৈমিন্নবা হায়বসি হৌজিক মতমগী খ্বাইদগী তঙাই ফদবনি। একজেক্যুতিব অমসুং লেজিসলেচরগা লোয়ননা, জুদিসিএরীনসু অকোয়বগী ফিভম ঙাক শেনবা অমসুং লম্লক্কী শা-উচেক ঙাক শেনবদা অহেনবা মিৎয়েং চঙফম থোকই হায়না মহাক্না হায়খি।

*****