U Myntri Khynnah jong ka Sorkar Pdeng ba dei khmih ia ka Tnat kam pohiing, u Nityanand Rai un plie ia ka Land Port ha Dawki lashai ka sngi ha ka jingdonlang u Symbud Myntri Rangbah ka jylla Meghalaya, u Bah Preston Tynsong bad High Commissioner jong ka India sha Bangladesh.

Ka Land Port ha Dawki kadei ka projek kaba kongsan bha jong ka Sorkar India, kaba thmu ban kyntiew ia ki kam khaii pateng hapdeng ka India bad Bangladesh. 

Ka Land Port ha Dawki kadei kaba don ha West Jaintia Hills ha Meghalaya, kaba jngai 55 km na ka distrik headquarter, Jowai bad kumba 84 km na Shillong, ka nongbah jong ka jylla Meghalaya bad kalong kawei na ki jaka jngoh kai ba pawnam bha jong ka ri. Ka Land Port kaba kum kane jong ka Bangladesh kadei ka Tamabil, kaba don ha Sylhet Distrik.

Ka Land Port ha Dawki kalong ka jaka pdeng na ka bynta ki kam khaii pateng hapdeng ka India bad Bangladesh, bad ka pynsuk ia ka jingpynkit ia ki mar, ka iaid ka ieng ki briew bad ki kali na shiliang sha shiliang u pud u sam jong kine artylli ki ri. 

Nalor ba kalong ka jaka pdeng jong ki kam khaii pateng hapdeng ka India bad Bangladesh, ka Land Port ha Dawki ka pynsuk ruh ia ka leit ka wan ki briew na shiliang sha shiliang u pud u sam hapdeng kine ki ri.

Ka jingshna ia ka Land Port ha Dawki kadei kaba la ioh jingmynjur na ka High Level Empowered Committee (HLEC) jong ka Tnat Kam Pohiing jong ka Sorkar Pdeng ha ka 4 tarik Rymphang 2016. Kane ka Land Port kalong kaba heh haduh 23.0 acre.

(Release ID: 1921728) visitor counter : 34