লৌউ-শিংউ, ফুদ প্রোসেসিং, তুরিজম অমসুং ইনফোর্মেসন তেক্নোলোজীদা মিৎয়েং চঙদুনা নাগালেন্দগী কোহিমাদা অৱাং নোংপোক লমদমগী মরিশুবা অমসুং অরোইবা বি.20 কনফরেন্স পাংথোকখ্রে। নাগালেন্দগী মুখ্য মন্ত্রী, শ্রী নৈফিয়ু রাইও; নাগালেন্দগী চীফ সেক্রেতরী, শ্রী জে. আলম; ভারত সরকারগী এক্সতর্নেল এফিয়র্সকী ইকায় খুম্ননিংঙাই ওইরবা রাজ্য মন্ত্রী, দাঃ রাজকুমার রঞ্জন সিংহ; ভারত সরকারগী দি.পি.আই.আই.তি.গী সেনিয়র এদভাইজর, কুমারী রুপা দত্তা অমসুং নাগালেন্দ সরকারগী লৌউ-শিংউগী ইকায় খুম্ননিংঙাই ওইরবা মন্ত্রী, শ্রী হাথুং য়ান্থন্না থৌরম অসিদা শরুক য়াখি।

লৈবাক 27কী দেলিগেত 60না ভারতকী দেলিগেত 100 হেনবনা শরুক য়ারিবা কনফরেন্স অসিগীদমক্তা নাগালেন্দগী কোহিমাদা পুনখি। নাগালেন্দ সরকার অমসুং এক্সতর্নেল এফিয়র্স মন্ত্রালয়গা খুৎশম্নদুনা চৎলিবা কনফেদেরেসন ওফ ইন্দিয়ন ইন্দস্ত্রী (সি.আই.আই.) অমসুং দি.পি.আই.আই.তি.না খোঙথাং অসিদা পার্ত্নর ওইবনি।

নাগালেন্দগী মুখ্য মন্ত্রীনা মহাক্কী ৱারোলদা নাগালেন্দগী অইং-অশা অসি লৌউ-শিংউগী পোত্থোকশিংগা য়াম্না চুনৈ হায়না পল্লদুনা ওর্গানিক ফার্মিংগা মরী লৈননা ইনভেস্তমেন্ত তৌবীয়ু হায়খি। মহৌশাগী ওইবা তিলহাৎ হিদাক শিজিন্নবনা মরম ওইরগা মফমসিগী পোত্থোকশিং অসি ওর্গানিক ওই অমসুং তুংগী মতমদা পোত্থোক হেনগৎহন্নবা রাজ্য অসিনা অফবা খুদোংচাবা কয়াসু পীরি হায়না মহাক্না মখা তাখি। লৈবাক্কী অতোপ্পা মফমশিংগা চাংদম্নবা মতমদা, নাগালেন্দগী পোপ্যুলেসন দেন্সিতী অসি য়াম্না নেম্মি অমসুং মেন-লেন্দ রেসিওগী অফবা ফিভম অমসু রাজ্য অসিদা লৈ। নাগালেন্দ অসি ‘কুহ্মৈ কয়াগী লমদম’ হায়নসু মমিং চৎলি, হোর্নবিল কুহ্মৈ মনুংদা উৎলিবা নাৎকী ফজবা কয়াগী খুত্থাংদা “আউত ওফ দি বোক্স” তুরিজম এক্সপেরিএন্স অমা পীবগা লোয়ননা ত্রেক্কিং অমসুং এদভেঞ্চরগী অতোপ্পা স্পোর্ত কয়া পাংথোকপা য়াবা অনেম-অৱাংনা থল্লবা লম্মিৎ-তুম্মিৎকী ফিভম অমসু পীরি। স্তার্তঅপকী লমদা খোঙদাবা হৌখ্রবা স্কিল লৈরবা মেনপাৱর কয়াসু নাগালেন্দ রাজ্যদা লৈরে। রাজ্য অসিগী ইনফ্রাস্ত্রকচরসু কোহিমা ফাওবগী রেলৱে কন্নেক্তিবিতী লৈদুনা খোঙজেল য়াঙনা হোংলক্লি। নাগালেন্দনা মালেমগী মফমদা হেন্দলুম অমসুং হেন্দিক্রাফকী পোত্থোকশিংদা ইনভেস্তমেন্ত তৌবগী অচৌবা খুদোংচাবা অমসু পীরি। মহাক্না বি.20 অসিদি রাজ্যসিগী শাহৌদা শাফু পীনবা ইনভেস্তমেন্ত তৌবগী খোঙজেল য়াঙখৎহন্নবা অফবা প্লেতফোর্ম অমা ওইরি হায়না মখা তারদুনা মসিগুম্বা খোঙথাং অসিনা নাগালেন্দ অমসুং মালেমগী মরক্তা পার্ত্নরশিপ অমা শোইদনা শাগৎলক্কনি হায়বগী থাজবা ফোংদোকখি।

ভারত সরকারগী এক্সতর্নেল এফিয়র্স মন্ত্রালয়গী রাজ্য মন্ত্রী, দাঃ রাজকুমার রঞ্জন সিংহনা মহাক্কী মপুং ওইবা ৱারোলদা নাগালেন্দগী তোপ-তোপ্লবা মফম অমসুং শিংথানিংঙাই ওইরবা মখোয়গী হোস্পিতালিতীগী থৌওংনা রাজ্যসিবু অখন্নবা লমদম অমা ওইহল্লি অমসুং সেন্ত্রেল অমসুং এসিয়ন হাইৱেগী ময়াইদা লৈবনা অৱাং নোংপোক লমদম্বু খা-নোংপোক্কী শেন্মিৎলোনশিংগা য়াম্না নক্নহল্লক্কদবা অসিনা মরম ওইরগা অৱাং নোংপোক লমদমদা অচৌবা অহোংবা অমসু পুরক্লগনি হায়না ফোংদোকখি। লোজিস্তিক্স ইনফ্রাস্ত্রকচরদা পি.এম.-দি.ই.ভি.আই.এন.ই. স্কিম্না অচৌবা অহোংবা অমা পুরক্লে। ফ্লাইত পাইবগী মশিংসু ইং 2014দা ওইরম্বা 900তগী হৌজিক 1900দা হেনগৎলে, হাইৱেগী অশাংবসু শরুক অনি হেনগৎলে, ৱাতরৱেগী কন্নেক্তিবিতীসু ফগৎলে, লমদম অসিগী রাজ্যশিংগী কোনুংশিংদা রেলৱে য়ৌশিল্লক্লি। ইন্দো-বাঙ্গলাদেশ রেলৱে লিঙ্ক অসিসু লোইশিল্লক্লে অমসুং মসিনা লমদম অসিদা অনৌবা খুদোংচাবা কয়াগী থোঙ হাংবগী ওইথোকপা কয়া লৈরে। নহাশিংনা অৱাং নোংপোক লমদমগী য়াংলেন শরু ওইরিবা অসিনা মরম ওইরগা মখোয়গী স্কিল য়োকখৎপা অমসুং মখোয়গী থবকশিংদা শৌগৎপনা অপুনবা লমদম অসিদা, মরু ওইনা রাজ্য অসিদা অচৌবা কান্নবা কয়া পীবা ঙমগনি।

নাগালেন্দগী চীফ সেক্রেতরী, শ্রী জে. আলম্না থমখিবা অতেনবা ৱারোলদা রাজ্যসিদা লৈরিবা লৌউ-শিংউগুম্বা মরাং কায়বা রিসোর্সশিংগী মতাংদা পনখি। হৌজিক ফাওবদা থিদোক্ত্রিবা মিনরেল অমসুং হাইদ্রো-কার্বন কয়াসু রাজ্যসিদা হৌজিক লোত্তুনা লৈরি হায়না মহাক্না মখা তানা ফোংদোকখি। খুন্নাইনা লমগী মপু ওইদুনা লম কনবগী তোপ-তোপ্পা চৎনবী অমা রাজ্যসিগী ওইনা লৈ। তুরিজম, মরু ওইনা কুহ্মৈশিং অসিনা নাগালেন্দদা মালেমগী পুক্নিং চিংশিনবা অচৌবা থৌওং অমনি অমসুং মসিবু মালেমগী থাক্তা মখা তানা খুমাং চাউশিলহনবা য়াগনি হায়না মহাক্না ফোংদোকখি।

ভারত সরকারগী দিপার্তমেন্ত ফোর প্রোমোসন ওফ ইন্দস্ত্রী অমসুং ইন্তর্নেল ত্রেদকী সেনিয়র এদভাইজর, কুমারী রুপা দত্তনা জি.আই. তেগ তৌরবা নাগা উ মোরোক, ত্রী তোমেতো অমসুং থবী অথুম্বগী মতাংদা অখন্ননা পল্লদুনা নাগালেন্দদা এগ্রোদা য়ুম্ফম ওইবা পোত্থোক কয়াগী চাউরবা খুদোংচাবা কয়া লৈ হায়না মিৎয়েং চঙখি। মহাক্কী মন্ত্রালয়গী মিসন ওর্গানিক ফার্মিং স্কিমগী মতাংদা পল্লদুনা নাগালেন্দগুম্বা রাজ্যনা মশাগী ওর্গানিক পোত্থোকশিং খুমাং চাউশিলহনবদা স্কিম অসিগী খুদোংচাবা লৌবা য়াই হায়না মহাক্না ফোংদোকখি। জি.20 সম্মিৎ মনুংদা ও.দি.ও.পি.গী পোত্থোকশিংবু খুদোলপোৎ ওইনা পীবগী থৌওং অসি য়াম্না পাম্নখি হায়না মহাক্না পল্লদুনা নাগালেন্দদা ও.দি.ও.পি.গী মখাদা রাজ্য 11 লৈ অমসুং মসিনা পোত্থোকশিং অসিবু মীরমদা থাদোকপা য়াহন্নবগীদমক্তা পোত্থোকশিং অসি পুথোকপগী চাং অমসুং মগুন হেনগৎহন্নবা খুদোংচাবা কয়া অমসু পীরি হায়না মহাক্না মখা তাখি।

নাগালেন্দ সরকারগী ইকায় খুম্ননিংঙাই ওইরবা লৌউ-শিংউ মন্ত্রী, শ্রী হাথুং য়ান্থন্না ভোৎ ওফ থেঙ্ক পীখি।

সি.আই.আই. নোর্থ ইস্ত কাউন্সিলগী কো-চেয়রমেন, শ্রী প্রদীপ বাগলানা থৌরমগী মীয়াম্বু তরাম্না ওকপগী ৱারোলদা নাগালেন্দদা বি.20 প্রোগ্রাম শীন-লাঙবদা থৱাই য়াওনা শৌগৎপগীদমক্তা নাগালেন্দ সরকারবু থাগৎখি। সি.আই.আই.না অৱাং নোংপোক লমদমগীদমক্তা খোঙফম চেৎলি অমসুং লমদম অসিদা সস্তেনেবল ওইবা পুন্সি মহিং লৈহন্দুনা শেন্মিৎলোন্দা শাহৌ লৌহন্নবগীদমক্তা রাজ্য অমসুং কেন্দ্রগী মন্ত্রালয়শিংগা থবক তৌমিন্নবসু পাম্মি হায়না মহাক্না ফোংদোকখি। মার্কেত্তা ভেল্যু ৱাংবা অখন্নবা মহৈ-মরোংগী মতাংদা রাজ্য অসিবু “ওর্গানিক বাই দিফোল্ত”তগী “ওর্গানিক বাই দিজাইন”দা ওন্থোক্নবগীদমক্তা রাজ্য অসিনা হেক্ত্যার 13,000বু ওর্গানিক কলতিবেসনগী মখাদা পুরক্নবা পান্দম থম্লি হায়না মহাক্না হায়খি। নাগালেন্দ অসি, মরু ওইনা, খুনুং জগোয়, ঈশৈ, হেন্দিক্রাফ অমসুং চিঞ্জাক্কী খুত্থাংদা মশাগী ত্রাইবেলগী য়েলহৌমীগী চৎনবী উত্থোক্লিবা মালেমদা মমিং চৎলবা হোর্নবিল ফেস্তিবেলগী মনুংদা মালেম্না লম-কোয়বা চৎপা য়াম্না পাম্বা মফম অমসু ওইরি। রাজ্য অসিদা ইনভেস্তমেন্তকী পুক্নিং চিংশিন্নবগীদমক্তা সেক্তরগা অখন্নবা পোলিসী পুরক্তুনা রাজ্যসিগা লোয়ননা সি.আই.আই.না থবক তৌমিন্নবা পাম্মি।         

থৌরম হৌদোকপগী সেসন অসিবু মতুংদা লৌউ-শিংউ, ফুদ প্রোসেসিং, তুরিজম অমসুং ইনফোর্মেসন তেক্নোলোজীদা মলতিলেতরেল ব্যুজিনেস পার্ত্নরশিপকী খুদোংচাবা থীদোক্নবা পাংথোকপা প্লেনরী সেসন্না মখা তাখি। মালেমগী দেলিগেসনশিং অসিবু অপীকপা হোর্নবিল ফেস্তিবেল অমা অখন্ননা শীন-লাঙলিবা অসি মিৎয়েং তাহন্নবগীদমক্তা কিসামা হেরিতেজ ভিলেজতা অমসুং রাজ্যসিগী কলচরগী ইনাক খুল্লবা হেরিতেজ উৎনবগীদমক্তা কোহিমা ৱার সিমিত্রীদা পুগনি।

***

(Release ID: 1913901)