وزارت دفاع نے 30 مارچ 2023 کو بھارتی  شپ یارڈز کے ساتھ 11 نیکسٹ جنریشن میری ٹائم پیٹرول ویسل بحری جہازوں اور 6 میزائل کیریئرز کے حصول کے لیے ایک معاہدے پر دستخط کیے، جس سے دفاعی شعبے میں 'خود انحصاری' حاصل کرنے کے لیے بھارتی بحریہ کی ضرورت کی جانب ایک اہم قدم اٹھایا گیا ہے۔ دستخط شدہ اس سودے کی کل لاگت تقریباً 19,600 کروڑ روپے بتائی گئی ہے۔

اگلی نسل کا ہائی سیز گشت کرنے والا جہاز

اگلی نسل کے 11 سمندری گشتی جنگی جہازوں کے حصول کے لیے 9,781 کروڑ روپے کی کل لاگت سے بھارتی –آئی ڈی ڈی ایم زمرے کے تحت تعمیر کیے جانے کے لیے خریداری کی جا رہی ہے۔ گوا شپ یارڈ لمیٹڈ (جی ایس ایل) اور کولکتہ کے گارڈن ریچ شپ بلڈرز اینڈ انجینئرز (جی آر ایس ای) کے ساتھ معاہدہ کیا گیا ہے۔ ان 11 بحری جہازوں میں سے سات کو گوا شپ یارڈ لمیٹڈ اور چار گارڈن ریچ شپ بلڈرز اور انجینئرز کے ذریعہ مقامی طور پر ڈیزائن، تیار اور تعمیر کیا جائے گا۔ یہ جنگی جہاز ستمبر 2026 سے استعمال کے لیے بھارتی  بحریہ کے حوالے کر دیے جائیں گے۔

ان بحری جہازوں کے حصول سے بھارتی  بحریہ کو اپنی جنگی صلاحیت کو بڑھانے اور مختلف آپریشنل ضروریات کو پورا کرنے میں مدد ملے گی۔ ان میں بحری قزاقی کا مقابلہ کرنا، غیر قانونی تجارت کو کنٹرول کرنا، دراندازی کو روکنا، غیر قانونی ماہی گیری، غیر جنگی انخلاء کی سرگرمیوں کا انعقاد، تلاش اور بچاؤ  (ایس اے آر) آپریشنز، اور بلند سمندروں پر اثاثوں کی حفاظت شامل ہیں۔ ان جہازوں کی تعمیر سے ساڑھے سات سال کے عرصے میں مجموعی طور پر 110 لاکھ افرادی دن کا روزگار پیدا ہوگا۔

اگلی نسل کا میزائل کیریئر

کوچین شپ یارڈ لمیٹڈ (سی ایس ایل) کے ساتھ 9,805 کروڑ روپے کی لاگت سے 6 نیکسٹ جنریشن میزائل کیریئر جہازوں (این جی ایم ویز) کے حصول کے لیے ایک معاہدہ کیا گیا ہے۔ یہ جنگی جہاز مارچ 2027 سے بھارتی  بحریہ کے حوالے کیے جانے لگیں گے۔ یہ اگلی نسل کے میزائل بردار جہاز چپکے، تیز اور بھاری ہتھیاروں سے لیس جہاز ہوں گے جن میں کافی جارحانہ صلاحیت ہے۔ موٹے طور پر دیکھا جائے تو ان جہازوں کا بنیادی کردار دشمن کے جنگی جہازوں، غیر قانونی تجارتی جہازوں اور سطحی اہداف کے خلاف اپنی دفاعی جارحانہ صلاحیت کا مظاہرہ کرنا ہوگا۔

یہ بحری جہاز بحری حملوں کی کارروائیوں کو انجام دینے کے قابل ہوں گے اور سمندر میں سطح پر بڑے حملے کرنے میں بھی اہم کردار ادا کریں گے۔ ان جنگی جہازوں کو دشمن کے بحری جہازوں سے نمٹنے کے لیے خاص طور پر چوک پوائنٹس پر سمندر میں رکاوٹ کے ایک طاقتور ہتھیار کے طور پر تعینات کیا جائے گا۔ دفاعی کردار میں یہ بحری جہاز مقامی بحری دفاعی آپریشنز اور آف شور ڈویلپمنٹ سیکٹر کے لیے میری ٹائم ڈیفنس کے دیگر مقاصد کے لیے بھی استعمال کیے جائیں گے۔ ان جہازوں کی تعمیر سے نو سال کی مدت میں کل 45 لاکھ افرادی دن کا روزگار پیدا ہوگا۔

ان جنگی جہازوں کی مقامی تعمیر سے بھارتی  جہاز سازی اور اس سے منسلک صنعتوں بشمول مائیکرو، چھوٹے اور درمیانے درجے کے اداروں کی فعال شرکت کی حوصلہ افزائی ہوگی۔ مقامی مینوفیکچررز سے حاصل کردہ زیادہ تر آلات اور نظام کے ساتھ، یہ جنگی جہاز 'آتم نربھر بھارت' کے فخریہ پرچم بردار بن جائیں گے۔

۔۔۔

 

ش ح۔ا س۔  ت ح ۔                                              

U–3535

(Release ID: 1912412) Visitor Counter : 187