ভারত সরকারগী এক ভারত শ্রেস্থা ভারতকী মখাদা চয়োল অমা চুপ্না মনিপুর য়েংনবা মহারাস্ত্রাগী নাগপুরদগী লাকপা মহৈরোয় ৫০ অমসুং ওজা ৩ ঙসি নিংথৌকাবা নুমিত্তা আই.আই.আই.তি মনিপুরনা তরাম্না ওকখ্রে।

ঙসি ফ্লাইত্তা মনিপুরদা থুংলখিবা কাংবু অদু মার্চ ৩ ফাওবা লৈগনি অমসুং তুরিজম, চৎনবীশিং, তেক্নোলোজি, অমসুং মীগা মীগা উনবা য়াওনা হিরম কয়াদা রাজ্য অসিগী মফম কয়াদা চৎকনি।

কাংবু অদু ইম্ফালগী মন্ত্রীপুখ্রিদা লৈবা আই.আই.আই.তি মনিপুরদা পাংথোকপা থৌরম অমদা তরাম্না ওকখি। থৌরম অদুদা চীফ গেস্ত ওইনা শরুক য়াখিবা লোক্তাক দিবলপমেন্ত ওথোরিতি মনিপুরগী চিয়ারমেন এম.অশ্বনিকুমারনা হায়খি মসি মরৈবাক নুংশিবা অমসুং লৈবাক্কী অপুনবগী শক্তম চাউখৎনবা প্রধান মন্ত্রী শ্রী নরেন্দ্র মোদীগী অফবা থবক অমনি।

মহাক্না হায়খি প্রধান মন্ত্রীনা হৌদোকপা অনৌবা থৌরম অসিনা মীগা মীগা উন্দুনা অমসুং ৱারি শানদুনা লৈবাক অসিগী তোঙান-তোঙানবা রাজ্যশিংগী কলচর, চৎনবী অমসুং পুৱারি খংনবা নহারোলশিং মতেং পাংগনি। মহাক্না মনিপুরদা লাকখিবা মহৈরোয়শিং অদুদা চহি ২০০০ হেল্লবা মনিপুরগী পুৱারিগী মতাংদা খঙহনখি।

তরাম্না ওকপগীদমক থাগৎপা ফোঙদোক্লদুনা আই.আই.তি নাগপুরগী নোদেল ওফিসার, দোক্তর কৃতি এস.দোরসেতৱারনা হায়খি অদোমগী মরুপ-মপাং ওইনবা ঐখোয় মহারাস্ত্রাগী কাংবু ইম্ফালদা লাকখিবনি। হকথেংন্না উনদুনা অমসুং ৱারি শানদুনা লৈবাক অসিগী নহারোলশিং অমগা অমগা খঙন্নবা মফম অমা পীবগীদমক মহাক্না প্রধান মন্ত্রী শ্রী নরেন্দ্র মোদীবুশু থাগৎখি।

মহারাস্ত্রাগী কাংবু অদু তরাম্না ওক্লদুনা আই.আই.আই মনিপুরগী দিরেক্তর প্রোফেসার কৃষ্ণন বাস্কারনা হায়খি অৱাং-নোংপোক লমদম অসি মমাঙদা ওইরম্বা ফিবম অদু হৌজিক ওইদ্রে। হৌজিক পাল্লিবা সরকার অসিগী মখাদা হৌখিবা চহি ৯দা লমদম অসি য়াম্না চাউখৎলে। অৱাং-নোংপোক লমদম চাউখৎনবা কেন্দ্রনা থৱায় য়াওনা থবক পায়খৎলি। কেন্দ্রনা অৱাং-নোংপোক্তা য়েংবা খক নত্তনা থবকশু পায়খৎলি।

মীগা মীগা শম্নবা অমসুং অৱাং-নোংপোক রাজ্যশিংগী নহারোলশিংদা লৈবাক অসিগী অতোপ্পা রাজ্যশিংগী নহারোলশিংগী মরক্তা নুংশিনবা পুরক্নবা এক ভারত শ্রেস্থা ভারতকী মখাদা ভারত সরকারনা ‘য়ুব সঙ্গম’ কৌবা থৌরম অমা পায়খৎলকপনি।

থৌরম অসি ইজুকেসন মিনিস্ত্রিনা তোঙান-তোঙানবা মিনিস্ত্রিশিং অমসুং দিপার্তমেন্তশিং হায়বদি তুরিজম, রেলৱেজ, ইনফোর্মেসন অমসুং ব্রোদকাস্তিং, য়ুথ এফেয়ার্স অমসুং স্পোর্তস, হোম এফেয়ার্স, দোনর অমসুং আই.আর.সি.তি.সিগা খুৎশম্নদুনা পায়খৎপনি।

ভারত সরকারনা অচংবা শেনফম পুম্নমক পুথোক্তুনা য়ুব সঙ্গম অসিদা লৈবাক অসিগী নহারোল ১০০০ রোম শরুক য়ারবা য়ারি। হন্দক মনিপুরগী মহৈরোয়শিং মহারাস্ত্রাদা চৎলুবা অদুগী শরুক অমা ওইনা মহারাস্ত্রাগী কাংবু মনিপুরদা লাকপনি।

লৈবাক অসিদা অহানবা ওইনা, এক ভারত শ্রেস্থা ভারতকী য়ুব সঙ্গমগী মখাদা চয়োল অমা মহারাস্ত্রাগী নাগপুর য়েংনবা মনিপুরগী মহৈরোয় ৩০ অমসুং ওজা অহুম ফেব্রুৱারি ২০দা ইম্ফাল থাদোকখি। খোঙচৎ অদু মনিপুরগী চীফ মিনিস্তর শ্রী এন বিরেন সিংহ, ভারত সরকারগী ইজুকেসন অমসুং মপান থৌরমগী রাজ্য মন্ত্রী দোক্তর আর কে রঞ্জন সিংহ, মনিপুর সরকারগী ইজুকেসন মিনিস্তর শ্রী থৌনাওজম বসন্ত কুমার সিংহ অমসুং আই.আই.আই.তি মনিপুরগী দিরেক্তর প্রোফেসার কৃষ্ণন বাস্কারনা লমথাখিবনি।

মহারাস্ত্রাগী কাংবু মনিপুরদা মতেং পাংবগী থৌদাং ইম্ফালদা লৈবা ভারত সরকারগী ইন্দিয়ান ইন্সতিতুৎ ওফ ইনফোর্মেসন তেক্নোলোজিনা লৌরি।

*****

(রিলিজ আই.দি.: 1902871) ভিজিতর কাউন্তর : 44