জি-২০ দাইলোগ ফোরমগী বি-২০ কনফরেন্স মরিগী মনুংদা অহানবা কনফরেন্স ফেব্রুৱারি ১৯,২০২৩দা মনিপুরগী কোনুং ইম্ফালদা লোইনশিনখ্রে।ইম্ফালদা পাংথোকখিবা নুমিৎ হুম্নিগী থৌরম অদুদা লৈবাক ২৩গী দেলিগেদ ১০০ হেনবনা শরুক য়াখি।

নুমিৎ হুম্নিগী থৌরম অদুদা আই.সি.তি, তুরিজম, অনা-লায়য়েং অমসুং হেন্দলুমগী লমদা মালেমগী লৈবাকশিংগা ললোন-ইতিক পাংথোক্নবগী খুদোংচাবশিংগী মতাংদা খন্ন-নৈনখি। থৌরম অসিগী অহানবা নুমিত্তা জি-২০ অমসুং অতোপ্পা লৈবাকশিংগী মীহুৎশিংনা প্লেনারি সেসন্দা ৱা ঙাংখি।

থৌরম অদুদা অস্ত্রেলিয়া, অর্জেন্তিনা, বাংলাদেস, ভুতান, চাদ, কনাদা, চাইনা, ফ্রান্স, গ্রিস, ঘনা, আইসলেন্দ, জপান, নেপাল, রুসিয়া, সিচিলিস, শিঙ্গাপুর, সাউথ অফ্রিকা, সুইজরলেন্দ, তুনিসিয়া, তোগো, উগান্দা অমসুং য়ু.এস.এগী দেলিগেদশিং শরুক য়াখি।

কনফরেন্স অদুদা শরুক য়াখিবা মপান লৈবাকশিংগী ললোন-ইতিক্কী দেলিগেদশিংগী মনুংদা ভুতান চেম্বর ওফ কম্মর্স এন্দ ইন্দস্ত্রি, এসিয়া সপোর্তিং ওর্গনাইজেসন, এ.পি.ও, জপান, ইন্দিয়া-বাংলাদেস চেম্বর ওফ কম্মর্স এন্দ ইন্দস্ত্রি, ইন্দিয়ান এসোসিএসন ওফ জপান, ইন্দো-আইসলেন্দ বিজিনেস এসোসিএসন য়াওখি।

বি-২০ থৌরম অদুদা তুনিসিয়া এম্বেসিগী এম্বেসেদরশিং, বাংলাদেস হায় কম্মিসনগী কম্মিসন্নর, সিচিলিস হায় কম্মিসনগী হায় কম্মিসন্নর, আইসলেন্দ এম্বেসিগী দিপুতি হেদ ওফ মিসন, তোগো হায় কম্মিসনগী মিসন হেদ শরুক য়াখি।

থৌরমগী নিনি চনবা নুমিত্তা, দেলিগেদশিং আই.এন.এ মেমোরিএল কমপ্লেক্স অমসুং খা-নোংপোক এসিয়াগী খ্বাইদগী চাউবা পাৎ অমা ওইরিবা লোক্তাক পাৎ য়াওনা রাজ্য অসিগী পুৱারিগী মফমশিং অমসুং ফজরবা মফমশিং য়েংহনখি।

ঙসি মীফম লোইশিনবা নুমিত্তা, দেলিগেদশিং নুপীশিং খক্তগী ওইবা ইমা কৈথেল য়েংখি অমসুং পুৱারি ওইরবা কংলা য়েংখি।

বিজিনেস-২০(বি-২০) অসি জি-২০ ফোরমগী মনুংচনবা প্রাইভেদ সেক্তরশিংগী কাংলুপ অমনি। মসিগী লুপ অসিনা জি-২০গী মনুংদা ললোন-ইতিক্কী থবক চৎথরিবা মীওইশিংগা থবক তৌমিন্ননবা মফম অমা পীগনি অমসুং মালেমগী ওইনা চাউখৎপা অমসুং শেন-থুমগী ফিবম ফগৎনবা থৌশিল কয়া পুথোক্কনি।

ইম্ফালদা পাংথোকখিবা অহানবা বি-২০ মীফম অসি ভারতনা জি-২০গী প্রসিদেন্ত ওইবগী শরুক্নি অমসুং অনিশুবা বি-২০ মার্চ ১দগী মার্চ ৩ ফাওবা মিজোরমগী আইজোলদা পাংথোক্কনি অমসুং অহুমশুবা মীফম্না মার্চ ১৫দগী মার্চ ১৭ ফাওবা সিক্কিমগী কোনুংদা গেঙতোক্তা পাংথোক্কনি অমসুং মরিশুবা মীফম্না এপ্রিল ৪দগী এপ্রিল ৬ ফাওবা নাগালেন্দগী কোহিমাদা পাংথোক্কনি।

থৌরমশিং অসিগী পান্দমদি অৱাং-নোংপোক লমদা লৈরিবা শেন থাদবা য়াবা থবকশিং মালেমগী অমসুং লৈবাক অসিগী ইনভেস্তরশিংদা উৎপনি অমসুং অৱাং-নোংপোক রাজ্যশিংনা হেন্না খুদোংচাবা লৈবা ইন্দস্ত্রিগী সেক্তরশিংদা মালেমগী লৈবাকশিংগা পুন্না ললোন-ইতিক পাংথোকপা য়ানবা খুদোংচাবশিং খঙহনবনি।

ইম্ফালদা পাংথোকখিবা নুমিৎ হুম্নিগী থৌরম অদুদা আই.সি.তি, তুরিজম, অনা-লায়য়েং অমসুং হেন্দলুমগী লমদা মালেমগী লৈবাকশিংগা ললোন-ইতিক পাংথোক্নবগী খুদোংচাবশিংগী মতাংদা মীৎয়েং থমখি।

*****

(Release ID: 1900577) Visitor Counter : 156