নোর্থ ইস্ত ইন্দিয়াগী অহানবা বিজনেস ২০ (বি.২০) কনফরেন্স ঙসি ইম্ফালদা সিতী সিতী কনভেন্সন সেন্তরদা হৌখ্রে। মনিপুরগী মুখ্য মন্ত্রী, শ্রী নোংথোম্বম বিরেন সিংহ, ভারত সরকারগী কমর্স অমসুং ইন্দস্ত্রীজকী রাজ্য মন্ত্রী, শ্রী সোম প্রকাশ, এক্সতর্নেল এফিয়র্সকী রাজ্য মন্ত্রী, দা. আর.কে. রঞ্জন সিংহ অমসুং মনিপুর সরকারগী চীফ সেক্রেতরী দা. রাজেশ কুমারনা অহোবগী সেসন অদুদা শরুক য়াখি।

মনিপুরগী মুখ্য মন্ত্রী শ্রী নোংথোম্বম বিরেন  সিংহনা হায়খি মদুদি মনিপুর অসি স্তেতস ওফ দ স্তেতস সর্ভেদা চহি অহুম চুপ্না থংন-থংননা কেতেগোরী পুম্নমক্তা খ্বাইদগী হেন্না ফগৎলকপা অপিকপা রাজ্য অমা ওইনা মশক খঙবীখ্রে। মসি ওইথোক্লিবা অসি লৈরিবা চেকশিন-থৌরাং সেক্যুরিতীগী ফিভমদা ফগৎলকপা অদুনা মরম ওইরগনি। হৌজিক্তি বন্দ অমসুং ব্লোকেদশিং অসি হৌখ্রবা মতম ওইরে।  রাজ্য অসিদা ইনভেস্তমেন্ত প্রোমোত তৌনবা, মনিপুরগী অনৌবা ইন্দস্ত্রিয়েল অমসুং ইনভেস্তমেন্ত প্রোমোশন পোলিসী অমা পাইখৎলকখ্রে। রাজ্য সরকার অসিনসু ইনভেস্তমেন্তশিং হেনগৎহন্নবা ইনভেস্তমেন্ত প্রোমোশন এজেন্সী অমা থম্নবসু খন্নরি। “ইজ ওফ দুৱিং বিজনেস” প্রোমোত তৌনবা, মনিপুর সিঙ্গল ৱিন্দো ক্লিয়রেন্স এক্ত, ২০২১  অসি চৎনহনখিবনি। মহাক্না মীতিন অদুদা মখাতানা খঙহল্লকখি মদুদি, লোজিস্তিক্স মরু ওইবা অদু য়েংলগা, মনিপুরনা ইন্তিগ্রেতেদ লোজিস্তিক্স পোলিসী, ২০২২ অসি খঙহনখ্রে অমসুং মসি শেমগৎ-শাগৎপগীদমক্তা তঙাইফদনা চংবা লমশিং মরাং কাইনা পীনবগীদমক্তা, সরকার অসিনা মনিপুরদা লেন্দ বেঙ্ক অমসুং ইন্দস্ত্রিয়েল এস্তেত লীজতা লিংখৎনবগী অয়াবা পীখ্রে। প্রোজেক্তশিং অমসুং পার্তনরশিপশিংগীদমক্তা সরকারগী লমশিং শিজিন্নবা য়েংশিন্নবা লীজ রুলশিং শেমখ্রে। মনিপুর পব্লিক প্রোক্যোরমেন্ত পোলিসীগী মখাদা, সরকারগী লৈনবগীদমক্তা মনিপুরদা শাবা পোৎলমশিংদা ওইনা অখন্ননা হেন্না মরু ওইনা থমখ্রে।

ভারত সরকারগী কমর্স অমসুং ইন্দস্ত্রীজকী রাজ্য মন্ত্রী, শ্রী সোম প্রকাশনা হায়খি মদুদি ভারতকী নোর্থ ইস্ত লমদম অসিদা মহৌশাগী ওইবা রিসোর্সশিং মরাং কাইনা লৈ, মসিদা মেগাৱাত ৫০০০০গী হাইদ্রো ইলেক্ত্রিক পাৱর অমসুং ফোসিল ফ্যুয়েলশিংগী চাউরবা লনশিং য়াওরি। ভারত সরকার নোর্ধ ইস্ত রিজনদা অখন্নবা মিৎয়েং থম্লি। রিজন অসিগীদমক্তা কেন্দ্র সরকারগী দিপার্তমেন্ত খুদিংমক্না মখোয়গী বজেতকী ১০% খাইদোক্কদবনি অমসুং চাউখৎ-থৌরাংগী থবক-থৌরম পুম্বা য়েংশিন্নবা দেবেলপমেন্ত ওফ নোর্থ ইস্ত রিজনগী মন্ত্রালয় অমা থমখ্রে। লমদম অসিদা ইন্ত্রা-স্তেত, ইন্তর-স্তেত, অমসুং ক্রোস বোর্দর৫ য়াওনা ইনফ্রাস্ত্রকচর ফগৎহন্নবা থবক-থৌরম কয়া অমা পাইখৎখ্রে। ২০২২-২৩গী কেন্দ্রগী বজেত্তা লাউথোকখিবা নোর্থ ইস্তকীদমক্তা অনৌবা থৌরাংশিং অদু অহানবা তাঙ্কক্তা লুপা করোর ১,৫০০ ওইখি, মসিনা কেন্সর য়েংশিন্নবগীদমক্তা অখন্নবা সর্বিসশিং লিংখৎনবা পান্দম থম্লি। মহাক্না মখাতানা পনখি মদুদি মনিপুর অশি য়াম্না ফজরবা কলচরগী য়াম্না মরু ওইবা মফম্নি।

ভারত সরকারগী এক্সতর্নেল এফিয়র্সকী রাজ্য মন্ত্রী, দা. আর.কে. রঞ্জন সিংহ মহাক্কী কীনোৎ এদ্রেসতা হায়খি মদুদি মপানদা থাদোকপা য়াবা রিসোর্সশিংগা লোইননা লৈরিবা মফম অসিগী খুদোংচাবা অসিগা লোইননা, অয়ুরভেদিক থেরাপীশিং অমসুং নাৎকী ওইবা হিদাক লাংথক্কী ওইবা লাইয়েংশিংগী খুত্থাংদা খুদোংচাবা কয়া অমা পীদুনা নোর্থ ইস্ত ইন্দিয়া অসিবু মাইপাকপা ইন্তর্নেস্নেল দেস্তিনেশন অমা ওইনা ওইহল্লগনি। নোর্তথ ইস্ত অমসুং মরু ওইনা মনিপুরগী বিজনেস কম্যুনিতীনা মখোয়গী বিজনেস পোতেন্সিয়েল অদু উত্থোকপা পাম্লি। মনিপুরিশিংনা ওর্গানিক ওইবা মওংদা,  হোসপিতেলিতী অমসুং কেয়র-গিবিং সেক্তরদা পুথোরকখ্রে, মশাগী মফম অমা কনখ্রে অমসুং মখোয় মশাগী ওইবা ব্রান্দ ভেল্যু শেমখ্রে। হৌজিক্তি মসিগী সেক্তরশিং অসিগী কান্নবা অদুবু ঐখোয়গী নহারোলশিংনা মপুং ফানা মসিগী কান্নবা ফংহন্নবগীদমক্তা ইন্তর্নেস্নেল পার্তনর্শিপকীদমক্তা ইনখৎপীবা মথৌ তাই। মহাক্না মখাতানা হায়খি  ইম্ফালদা মহৌশাদগী আর্তিস্তিক অমসুং ক্রিয়েতিব ওইবা হৈ-শিংলবা মীশিংগী খুদোংচাবা য়াম্না চাউনা লৈ।  হায়রিবশিং অসি মখোয়গী হেন্দলুম অমসুং হেন্দোইক্রাফকী পোত্থোকশিং অদু মখোয়গী মমি ময়েক শেংনা তারি, হায়রিবা অসিমক মখোয়গী দিজাইনশিং, মখোয়গী হৈ-শিংবা, ফজরবা মচু অমসুং কান্নবা অদুগীদমক্তা মালেম শিনবা থুংনা মমিং চৎলিবনি।

প্লেনরী সেসন অদুদা, শিজা হোসপিতাল অমসুং রিসর্চ ইনস্তিত্যুতকী চেয়রমেন অমসুং মেনেজিং দাইরেক্তর, দা. কে.ঐচ. পালিননা হেল্থকিয়র অমসুং মেদিকেল তুরিজমগী মতাংদা মনিপুরদা লৈরিবা মতিক অদুবু পল্লদুনা ঙাংখি অমসুং মসিগী ইন্দস্ত্রী অসি লাক্কদবা চহি খরদা শোইদনা চাউখৎলক্কনি হায়না মহাক্না পনখি।

বাবিনা হেল্থকিয়র অমসুং হোসপিতেলিতী প্রিআভেত লিমিতেদকী চেবরমেন অমসুং মেনেজিং দাইরেক্তর, দা. ধবলি সিংহনা তুরিজম অমসুং হোসপিতেলিতীগী মতাংদা পাংথোকখিবা খন্ন-নৈনবগী থৌরম অদুদা ৱা ঙাংখি। মহাক্না লমদম অসিগী ফজরবা কলচরেল হেরিতেজ অমসুং মসিনা করম্না রাজ্য অসিগী মীপুম কয়াদা থবক ফংহনবা ঙমগনি হায়বসিগী মতাংদা অখন্নবা মিৎয়েং থমখি। হৌখিবা দেকেদ অসিদা লম্বি-থোংদা য়াম্না ফগৎলকখ্রে হায়না মহাক্না হায়খি। মহাক্না তুরিজমগী মতাংদা রাজ্য অসিনা পীগদবা রিসোর্সশিং অদুগী মতাংদসু পনখি অমসুং হায়রিবা মসিগী সেক্তরশিং অসিদা ইনভেস্তমেন্ত তৌবগীদমক্তা খুদোংচাবশিং অদু পনখি।

ক্যুব তেন তেক্নোলোজীজ প্রাইভেত লিমিতেদকী সি.ই.ও. অমসুং মেনেজিং দাইরেক্তর হাওবম জোইরেম্বা অমসুং মনিপুর সরকারগী দাইরেক্তর (আই.তি.), শ্রী নাম্বম দেবেননা প্লেনরী সেসন অদুদা ইনফোর্মেশন অমসুং কম্যুনিকেশন তেক্নোলোজী (আই.সি.তি.)গী মতাংদা ৱা ঙাংখি অদুগা কে.বি. ফিলান্ত্রোফীফূ চীফ একজিক্যুতিব ওফিসর, এল. মনোরঞ্জন সিংহনা হেন্দলুম অমসুং তেক্সতাইলসদা লৈরিবা খুদোংচাবশিং অদুগী মতাংদা ঙাংখি।

ওস্ত্রেলিয়া, আর্জেন্তিনা, বংগ্লাদেশ, ভুতান, ছাদ, কেনাদা, চাইনা. ফ্রান্স, গ্রীস, ঘানা, আইসলেন্দ, জাপান, নেপাল, রসিয়া, সীসিলীজ, সিঙ্গাপোর, সাউথ অফ্রিকা, স্বিতজর্লেন্দ, তুনিসিয়া, তোগো, য়ুগান্দা, য়ুনাইতেদ স্তেতসনা মসিগী য়াম্না চাউরবা থৌরম অসিদা শরুক য়ারগনি।

মপান লমগী ত্রেদ দেলিগেশনদগী ত্রেদ দেলিগেতশিং – ভুতান চেম্বর ওফ কমর্স অমসুং ইন্দস্ত্রী, এসিয়া  সপোর্তিং ওর্গনাইজেশন, এ.পি.ও., জাপান,  ইন্দিয়া-বংগ্লাদেশ চেমধ্বর ওফ কমর্স অমসুং ইন্দস্ত্রী অমসুং বাইলেতরেল ওর্গনাইজেশণ – ইন্দিয়ন এসোসিয়েশন ওফ জাপান, ইন্দো আইসলেন্দিক বিজনেস এসোসিয়েশন্না থৌরম অদুদা শরুক য়াখি।

দিপ্লোমেতশিংদা নত্তনা – দ রিপব্লিক ওফ তুনিসিয়াগী এম্বেসীদগী এম্বেসেদরশিং, বংগ্লাদেশ হাই কমিসনগী হাই কমিস্নর, রিপব্লিক ওফ সীসিলিসকী হাই কমিসনগী কমিস্নর, নই দিল্লী, দেপ্যুতী হেদ ওফ মিসন – আইসলেন্দগী এম্বেসী, চার্জ দি এফিয়র্স/ হেদ ওফ মিসন- ভারত্তা লৈবা তোগোগী হাই কমিসননা বি.২০গী থৌরম অদুগী শরুক য়াখি।

*****