সোসিএল জজতিস অমসুং ইমপ্বারমেন্তগী য়ুনিয়ন মিনিস্তর শ্রী রামদাস অথাৱালেনা ঙসি মনিপুরগী বিষ্ণুপুর জিলাদা অহানবা নোর্থ ইস্ত এরো স্পোর্তস হোত এয়র বেল্লুন এন্দ পেরা মোতোরস ফিয়েস্তা হৌদোকখ্রে।  

পুং খরগী মনিপুর খোঙচত্তা ঙসি ইম্ফালদা থুংলখিবা য়ুনিয়ন মিনিস্তরনা মনিপুরগী রুরেল দিবলপমেন্ত অমসুং পঞ্চায়তি রাজগী মিনিস্তর ৱাই খেমচান্দ অমসুং ইজুকেসন মিনিস্তর শ্রী থৌনাওজম বসন্তকুমার য়াওবা থৌরম অমদা ফিয়েস্তা হৌদোক্লে হায়না লাউথোকখি।

খাসিয়া ভেঞ্জরস প্রাইবেত লিমিতেদকী য়ুনিত অমা ওইরিবা স্কাইফঞ্জিনা কেপ্তেন ইমোচাউবগা লোয়ন্না শীনবা নুমিৎ তরুক্নিগী কুহ্মৈ অদু বিষ্ণুপুর জিলাগী ফুবালাদা পাংথোকখি।

মরুওইনা মনিপুর য়াওনা অৱাং-নোংপোক রাজ্যশিংদা এরো স্পোর্তসশিং চাউখৎনবা অমসুং ২০২৩দা ভারত অসি শান্নবগী মকোক থোংবা লৈবাকশিংগী মনুং চনহন্নবা পান্দমদা ভারত্তা তুংকোইনা চৎনবা য়াগদবা এয়র স্পোর্তসকী ফিবম অমা শেমগৎনবা থৌরম অসি শীনবনি।

কুহ্মৈ অসিনা মনিপুর অমসুং অৱাং-নোংপোক্কী নহারোলশিংদা এরো স্পোর্তস য়োকখৎনবা পান্দম থম্লি অমসুং মসিনা ভারত অমসুং মপান লৈবাকশিংদগী মীওই কয়া এরো স্পোর্তস শরুক য়াহনবগা লোয়ন্না তুরিজম চাউখৎহন্নবা পান্দম থম্লি। 

কুহ্মৈ য়েংবা লাকপশিংদা পেরামোতোরিং, বেল্লুন সাফারি, বেল্লুন তেথেরিং, রোক কন্সর্ত, কলচর অমসুং অতৈ থৌরমশিং শরুক য়ানবগী খুদোংচাবশিং পীগনি। কুহ্মৈ হৌদোকপগী থৌরম অদু অকনবা নুংশিৎ অমনা অপনবা পীদুনা থৌরমগী ফম্বাক অদু হুমদোকখি।

কুহ্মৈ অসিনা রাজ্য অসিদা তুরিজম চাউখৎহনবদা মতেং পাংবা খক নত্তনা অসিগুম্বা মখলগী শান্ন-খোৎনবশিং য়োকখৎপদা য়াম্না চাউনা মতেং পাংগনি হায়না য়ুনিয়ন মিনিস্তরনা ফোঙদোকখি।

ভারতনা জি-২০গী প্রসিদেন্ত ওইরিবা অসিগী মতাংদা য়ুনিয়ন মিনিস্তরনা হায়খি ২০২৩ অসি ভারতকী মরুওইবা চহি অমনি। ভারতনা জি-২০গী প্রসিদেন্ত ওইনবা খুদোংচাবা ফংখি অমসুং রাজ্যশিং শীনবা থুংনা তোঙান-তোঙানবা সহরশিংদা থৌরম কয়া পাংথোক্কনি।

বিষ্ণুপুর জিলাগী মোইরাং খুনৌদা হন্দক নৌনা হাংদোকখিবা সঙাই ইথনিক পার্কতা ফেব্রুৱারি ১৭ অমসুং ফেব্রুৱারি ১৮দা মনিপুরনা য়ুম্বু ওইদুনা জি-২০ মীফমগী থৌরমশিং পাংথোক্কনি।

*****

(Release ID: 1898308) Visitor Counter : 105