নীংথৌকাবা নুমিৎতা মপুং ওইবা থৌরম পাঙথোকফম ওইরিবা বিষ্ণুপুর জিলাগী মোইরাং খুন্নৌদা লৈবা সঙাই ইথনিক পার্ক্তা নুমিৎ ১০নি চুপ্না পাঙথোক্কদবা লমকোই কুহ্মৈ ওইরিবা মনিপুর সঙাই ফেস্তিবেল কেন্দ্রগী কলচর, তুরিজম অমসুং অৱাং-নোংপোক্কী চাউখৎ-থৌরাং (দোনর) মন্ত্রী গঙ্গাপুরম কিশন রেদ্দীনা হৌদোক্তুনা চহি অনিগী মতুংদা অমুক হন্না পাঙথোকখ্রে।

মনিপুরগী মুখ্য মন্ত্রী, এন. বিরেন সিংহ, রাজ্য সভাগী এম.পি. লৈশেম্বা সনাজাওবা, মন্ত্রীশিং, এম.এল.এ.শিং, রাজ্য সরকারগী মকোক থোংবা ওফিসিএলশিংনা লমকোই কুহ্মৈ অসিগী হৌদোকপগী থৌরমদা শরুক য়াখি।

‘ফেস্তিবেল ওফ ৱাননেস’ হায়বা থিমগী মখাদা পাঙথোক্লিবা কুহ্মৈ অসিগী হৌদোকপগী থৌরমদা ৱা ঙাংলদুনা জি. কিশন রেদ্দীনা কুহ্মৈ অসি পাঙথোকপনা রাজ্য অসিগী তুরিজম ইন্দস্ত্রীদা শাহৌ পীরগনি হায়না থাজবা ফোঙদোকখি।

কুহ্মৈ অসি নোংমদি মালেম শিনবা থুংবদগী লমকোইবশিংগী পুক্নিং চিংশিল্লিবা লৈবাক্কী খ্বাইদগী চাউবা লমকোই কুহ্মৈ ওইরক্কনি হায়না রেদ্দীনা ফোঙদোকখি।

মহাক্না সঙাই কৌবা শজিগী লৈফম – ফ্লোতিং কৈবুল লমজাও নেস্নেল পার্ক, ভারতকী খ্বাইদগী চাউবা ফ্রেশ ৱাতর লেক – লোক্তাক পাৎ, নুপী খক্তনা চল্লাইবা মমিং লৈরবা – ইমা কৈথেল অসিনচিংবা রাজ্য অসিগী তোঙান-তোঙানবা লমকোইবশিংগী পুক্নিং চিংশিল্লিবা মফমশিং পনখি অমসুং মফমশিং অসি মালেমদা তোপ-তোপ্পা মফমশিং ওইরি হায়না ফোঙদোকখি।

ভারতকী প্রজাশিংনা স্বিৎজরলেন্দ, ন্যু জিলেন্দ, ওস্ত্রেলিয়া, অফ্রিকা অসিনচিংবা মফমশিংদা চৎলি। অদুম ওইনমক হৌজিক্তি লৈবাক্কী লমকোইবশিংনা মফমশিং অসি চৎপগী মথৌ তাদ্রে।

কেন্দ্রগী মন্ত্রীনা হায়খি, “মনিপুর অমসুং অৱাং-নোংপোক্কী লমদমদা হেন্না ফজবা মফমশিং লৈ। অৱাং নোংপোক ভারতকী চাউথোকচনীংঙাই ওইরবা মনিপুর অসি লমকোইবশিংগী লমথুংফম অমা ওইরক্লি হায়না ঐহাক্না চাউথোক্না ফোঙদোকচনীংই”।

রেদ্দীনা হায়খি তোপ-তোপ্পা মফমশিং অসিগী মথক্তা মনিপুরগী ফজরবা কলচরেল হেরিতেজ লৈজৈ মহাক্না মমিং লৈরবা রাস লিলা, মনিপুরগী ক্লাসিকেল দান্স অসি পনখি।

থৌরম অদুদা পীখিবা মহাক্কী ৱারোলদা মনিপুরগী মুখ্য মন্ত্রী, এন. বিরেন সিংহনা হায় কুহ্মৈ অসি “ৱাননেস” হায়বা থিমদা পাঙথোকপনি অমসুং মসিনা মনিপুরগী তোঙান-তোঙানবা ফুরুপশিংগী মরক্তা অপুনবগী লিপুন্না পুল্লগনি অমসুং ভারতকী অপুনবগী শক্তম মপাঙ্গল কনখৎহল্লগনি।

কুহ্মৈ অসিগী হৌদোকপগী থৌরম পাঙথোকফম ওইরিবা সঙাই ইথনিক পার্ক অসিনা রাজ্য অসিদা লৈরিবা তোঙান-তোঙানবা ফুরুপশিংগী মরক্তা অমত্তা ওইবগী ৱাখল্লোন পোকহনগনি হায়না সিংহনা থাজবা ফোঙদোকখি।

ইথনিক পার্ক অসি চহি খুদিংগী সঙাই ফেস্তিবেল পাঙথোক্নবা শাখিবনি অমসুং পার্ক অসিদা রাজ্যগী তোঙান-তোঙানবা ত্রাইবেল কাংলুপশিংগী মশক তাক্লিবা শঙশিং শারি।

পার্ক অসি ঙসি অঙনবদা মুখ্য মন্ত্রীনা কুহ্মৈ অসি হৌদোক্ত্রিঙৈদা শঙ্গাখি।

কুহ্মৈ অসিগী তোঙান-তোঙানবা ফীচরশিংগী মতাংদা শন্দোক্না হায়রদুনা মুখ্য মন্ত্রীনা হায় মরু ওইবা লমকোইবগী মফমশিংদা লাকপা লমকোইবশিংগী ঙাকশেল হেনগৎহন্নবা রাজ্য সরকারনা “তুরিজম পুলিস” হাংদোকখি।

রাজ্যগী হোম দিপার্তমেন্তনা তুরিজম পুলিস হাংদোকখি অমসুং লমকোইফমশিংদা দিপ্লোই তৌগনি।

মখোয়না লমকোইবশিং শাফনা থম্নবা অমসুং খুদোংচানবা অখন্ননা য়েংশিনগনি। মসিনা রাজ্য অসিদা লাকপা লমকোইবশিংদা শাফবা অমসুং নুংঙাইবা পোকহনগনি হায়না মুখ্য মন্ত্রীনা ফোঙদোকখি।

সঙাই ফেস্তিবেল অসি মনিপুরগী চহি খুদিংগী পাঙথোকপা কলচরেল-কম-তুরিজম ফেস্তিবেলনি। মসি ২০১০দগী হৌদুনা নবেম্বর ২১দগী ৩০ ফাওবা পাঙথোকই।

অদুম ওইনমক কোবিদ লাইচৎনা মরম ওইদুনা ২০২০ অমসুং ২০২১দা মসি পাঙথোকখিদে অমসুং লাইচৎকী ফীভম ফগৎলকপগা লোয়ননা চহি অসিদা অমুক হন্না পাঙথোকপা ঙম্লি।

মমাংগী চহিশিংগা মান্নদবা মওংদা মাগী ভেন্যুশিং অসি ইম্ফাল খক্তা নত্তনা কুহ্মৈ অসি রাজ্য অসিগী চীং অমসুং তম্পাক্কী জিলা ১৩দা পাঙথোক্লি।

***

(Release ID: 1877801)