নেস্নেল প্রোজেক্ত অমা ওইনা পাইখৎখিবা জিরিবাম-ইম্ফাল রেলৱে অসিনা ২০২৩গী দিসেম্বর ফাওবদা লোইশিন্নবগীদমক্তা থমখিবা পান্দম অদুবু মপুং ফাহন্নবীদমক্তা শেম-শাবা লোইরে, হায়না কেন্দ্রগী রেলৱেজ অমসুং তেক্সতাইলসকী রাজ্য মন্ত্রী, দার্শনা ৱিক্রম জার্দোশনা শগোলশেল নুমিত্তা মফম অসিদা হায়খি।

কেন্দ্রগী মন্ত্রী অসিনা রাজ্য অসিদা নুমিৎ মরিনি খোংচৎ অমদা ইম্ফালদা থুংলখি। রাজ্য অসিদা মহাক্না কেম্পিং তৌবদা, কেন্দ্র মন্ত্রী অসিনা চাউরাক্না লুপা করোর ১২,২৬৪.১৫ চংনা শেমগৎলকখিবা কি.মি. ১১১ শাংবা রেলৱে প্রোজেক্ত অসিদা চত্থরিবা থবক অদুদা কাদাই ফাওবা খুমাং চাউশিল্লবগে হায়দুনা মশামক্না হকথেংননা য়েংশিনখি।

প্রোজেক্ত অসি ২০২৩গী দিসেম্বর ফাওবদা লোইশিন্নবগী পান্দম থম্লি।

“থবকশিং অসি নিংথিনা খুমাং চাউশিল্লি অমসুং প্রোজেক্ত অসিনা থম্লিবা লোইশিন্নবগী পান্দম অদুগী মনুংদা লোইশিনবা ঙমগনি হায়না ঐহাক্না থাজৈ,” হায়না কেন্দ্রগী মন্ত্রীনা হায়খি।

মহাক্না হায়খি মদুদি খ্বাইদগী ৱাংবা থোংগা লোইন-লোইননা তনেলশিং শাবগী থবক অদু ৫০% লোইশিনখ্রে। প্রোজেক্ত অসিনা হেক লোইবগা, মসিনা মনিপুরবু লৈবাক অসিগী মরু ওইবা সিতীশিংগা শম্নহনবদা নত্তনা রাজ্য অসিগী তুরিজম সেক্তরদা মশক নাইবা অহোংবা অমসু পুরক্লগনি।

মহাক্না হায়খি মদুদি রেলৱে লাইন অসিগী শাংলবা লম্বেল অসিদগী মহৌশাগী ফজরবা শক্তম উবা ফংগনি, প্রোজেক্ত অসিদা তুংদা তুরিস্তশিংগী পুক্নিং চিংশিনগদবা মালেম অসিগী খ্বাইদগী ৱাংবা থোং অমসুং মালংম অসিগী অনিশুবা খ্বাইদগী শাংবা তনেলসু য়াওরি।

মসিদা নত্তনা, হৌজিক-হৌজিক শাগৎলিবা ইম্ফাল রেলৱে স্তেশন অসি মালেমগী থাক্তা চাংদম্নবা বারবা স্তেসন ওইগনি হায়না মহাক্না হায়খি।

মহাক্না মনিপুর সরকারবু মসিগী প্রোজেক্ত অসিবু থবক ওইনা পাইখৎপদা এন.এফ.আর. মপুং ফানা তেংবাং পীবীবগীদমক্তা থাগৎপা ফোংদোকখি।

নোর্থইস্তর্ন ফ্রন্তিয়র রেলৱেনা রাজভ সরকারগা তানরবা মতুংদা রেলৱে লাইন অসিগি তোঙন-তোঙান মফম কয়া অমদা পিক্নিক সাইতশিং শেমগৎলগন, হায়না মহাক্না হায়খি।

ভারতকী রেলৱেজনা মতম পুম্বদদা রেলৱে প্রোজেক্তশিং পাইখৎপা মতমদা তুরিজমগী মতাংদসু য়েংশিল্লি অমসুং রাজ্য অসিদা পাইখৎলিবা প্রোজেক্ত অসিদা তুরিজমগী য়াম্না চাউরবা পোতেন্সিয়েল লৈ, হায়না মআক্না হায়খি।

নোনে জিলাগী মরাংচিংদা রেলৱে প্রোজেক্ত সাইততা হন্দক্কা থোকখিবা য়াম্না অমাং-অতা থোকহনখিবা চিং নিংখাইবগী য়াম্না নুংঙাইতবা থৌদোক অদুবু নিংশিংলদুনা, কেন্দ্রগী মন্ত্রী অসিনা হায়খি মদুদি অসিগুম্বা নুংঙাইতবা থৌদোকশিং অসি অমুক হন্না থোকহন্দনবা  অশোই-অঙাম য়াওহন্দনবগী পাম্বৈশিং অসি রেলৱে লাইনগী শাংলবা লম্বি অসিদা থম্লগনি হায়না হায়খি।

স্ত্রেতেজিক ওইবা মফমশিংদা এলার্ম সীস্তেমশিং হাপ্লগনি অমসুং মসিগীদমক্তা আই.আই.তি. অমসুং অতোপ্পা  মরী লৈনবা ওথোরিতীশিংগা খন্ন-নৈনবা কয়া অমা পাংথোকখ্রে।

কেন্দ্রগী রেলৱে মমন্ত্রালয়না নুঙাইতবা থৌদোক অদুবু য়াম্না লুনা লৌই হায়না মহাক্না হায়খি অমসুং পেসেঞ্জরশিংগী সেফতীগী মতাংদা মতম পুম্বদা ৱারিবনি হায়না মহাক্না মখা তারকখি।

কেন্দ্রগী রেলৱে মন্ত্রী অসিনা নোর্থইস্তর্ন ফ্রন্তিয়র রেলৱেজকী ওথোরিতীশিংবু মসিগী প্রোজেক্ত  অসিবু থবক ওইনা পাইখৎপদা জিয়োতেক্সতাইলশিং অমসুং এগ্রো-তেক্সতাইলশিংগী পোত্থোকশিং শিজিন্নৈ হায়বসি খঙবদা মখোয়বু থাগৎখি।

জিরিবাম - কি.মি. ১১১ শাংবা তুপুল-ইম্ফাল রেল লাইন অসিদা পুন্না তনেল ৪৫ য়াওরি। কিলোমিতর ১০.২৮০ শাংবা তনেল নম্বর ১২ অসিনা নোর্থইস্ততা খ্বাইদগী শাংবা তনেল ওইগনি অমসুং লৈবাক অসিগী অনিশুবা খ্বাইদগী শাংবা তনেল ওইগনি।

খ্বাইদগী ৱাংবা পিয়র ব্রিজ অসি মিতর ১৪১ ৱাংবগা লোইননা নোনেগী মনাক্তা লৈবা ইজৈ তুরেলগী তম্পাক ফাউদুনা শারি।

প্রেস কনফরেন্স আসিদা শরুক য়ারদুনা , এন.এফ.আর.গী জনরেল মেনজর, শ্রী অন্সুল গুপ্তানা হায়খি মদুদি হন্দক চহি অসিগী সেপ্তেম্বর ফাওবদা, খোংশাং ফাওবগী ত্রেক হাপ্পগী থবক লোইশিল্লগনি অমসুং মপুং ফানা লোইশিল্লবা শরুক ফাওবা ত্রেন সর্বিসশিং হোরগনি।

মতম অসিগী খ্বাইদগী নৌবা চেকশিন-থৌরাংগী পাম্বৈশিং অমসুং ত্রেজিক ৱার্নিং সীস্তেমগী তেক্নোলোজী পুম্নমক হাপ্লগনি। মসিগীদমক্তা কন্সল্তেন্তশিং খনখ্রে।

রিপোর্তরশিংনা হংলকপশিং অদুগী পাউখুম পীরদুনা, মহাক্না হায়খি মদুদি ইম্ফালদগীনা মোরেহ ফাওবা রেলৱে লাইনশিং শাংদোক্নবগী সর্ভে হৌখ্রে অমসুং সর্ভে এক লোইবগা অমসুং কেন্দ্র সরকারনা প্রোজেক্ত অসিবু হেক সেঙ্কসন তৌবগা গ্রাউন্দ ৱার্ক হৌরগনি।                       

***

(रिलीज़ आईडी: 1854397) आगंतुक पटल : 118