کئی مہینوں تک مخصوص ذہانت سے کام لینے کے بعد یہ پتہ چلنے پر کہ دو ہندوستانی کشتیاں تامل ناڈو کے ساحل سے روانہ ہوں گی اور مئی 2022 کے دوسرے/تیسرے ہفتے کے دوران بحیرہ عرب میں کہیں بھاری مقدار میں منشیات حاصل کریں گی، ڈائریکٹوریٹ آف ریونیو انٹیلی جنس (ڈی آر آئی) کی جانب سے ایک آپریشن شروع کیا گیا۔

ڈی آر آئی کا انڈین کوسٹ گارڈ (آئی سی جی) کے ساتھ اس مناسبت سے مشترکہ آپریشن 7 مئی 2022 کو شروع کیا گیا جس کا کوڈ نام آپریشن کھوج بین رکھا گیا۔ اس آپریشن کے تحت کوسٹ گارڈ کے جہاز سُجیت نے جہاز پر ڈی آر آئی اہلکاروں کے ساتھ، خصوصی اقتصادی زون کے قریب کڑی نظر رکھی۔ انتہائی دشوار سمندری لہروں کے درمیان کئی دنوں کی مسلسل تلاش اور نگرانی کے بعد دو مشتبہ کشتیوں ’پرنس‘ اور ’لٹل جیسس‘ کو ہندوستان کی طرف بڑھتے ہوئے دیکھا گیا۔ دونوں ہندوستانی کشتیوں کو آئی سی جی اور ڈی آر آئی کے افسران نے 18 مئی 2022 کو لکشدیپ جزائر کے ساحل سے دور روکا۔پوچھ گچھ  کرنے پر اِن کشتیوں میں سوار عملے کے کچھ ارکان نے اعتراف کیا کہ انہیں دورسمندر میں بھاری مقدار میں ہیروئن ملی تھی اور ان لوگوں نے اسے دونوں کشتیوں میں چھپایا تھا۔ دونوں کشتیوں کو مزید کارروائی کے لئے کوچی لے جایا گیا۔

کوچی میں کوسٹ گارڈ ڈسٹرکٹ ہیڈ کوارٹر میں دونوں کشتیوں کی مکمل تلاشی لی گئی جس کے نتیجے میں ایک ایک کلو گرام کے 218 پیکٹ ہیروئن برآمد ہوئی۔ این ڈی پی ایس ایکٹ 1985 کی دفعات کے تحت ضبطی کی کارروائی فی الحال ڈی آر آئی کے ذریعے کی جا رہی ہے۔ مختلف مقامات پر تلاشی لی جارہی ہے اور مزید تفتیش جاری ہے۔

یہ آپریشن ڈی آر آئی اور آئی سی جی کی طرف سے انتہائی احتیاط اور منصوبہ بند طریقے سے عمل میں لایا گیا اور کئی دنوں کے دوران دشوار سمندری لہروں کے بیچ وسیع پیمانے پر نگرانی کی گئی۔ ضبط شدہ منشیات میں  بظاہراعلیٰ درجے کی ہیروئن ہے اور بین اقوامی غیر قانونی مارکیٹ میں اس کی مالیت تقریباً 1,526 کروڑ روپے بتائی جاتی ہے۔ ماضی قریب میں ڈی آر آئی اور آئی سی جی نے منشیات کی اسمگلنگ کے خلاف کچھ اہم کارروائیاں کی ہیں۔

یہ گزشتہ ایک ماہ میں ڈی آر آئی کی طرف سے منشیات کی یہ چوتھی بڑی ضبطی ہے۔قبل ازیں ڈی آر آئی نے 20.04.2022 کو کنڈلا بندرگاہ پر جپسم پاؤڈر کی تجارتی درآمدی کھیپ سے 205.6 کلوگرام ہیروئن برآمد کی تھی۔ 29.04.2022 کو پیپواو بندرگاہ پر (ہیروئن سے لیس) 396 کلو دھاگے پکڑے گئے تھے اور 10.05.2022 کو ایئر کارگو کمپلیکس، آئی جی آئی نئی دہلی میں 62 کلو ہیروئن ضبط ہوئی تھی جس کی مالیت بین الاقوامی غیر قانونی مارکیٹ میں مجموعی طور پر تقریباً 2,500 کروڑ روپے بتائی جاتی ہے۔

اپریل 2021 سے ڈی آر آئی نے 3,800 کلو سے زیادہ ہیروئن ضبط کی ہے۔ جس کی قیمت بین الاقوامی غیر قانونی مارکیٹ میں تقریباً 26,000 کروڑ روپے ہے۔ اس میں ستمبر 2021 میں موندرا میں 3,000 کلوگرام ہیروئن؛ جولائی 2021 میں نہوا شیوا پورٹ پر 293 کلو ہیروئن؛ فروری 2022 میں تغلق آباد، نئی دہلی میں 34 کلو ہیروئنکی ضبطی شامل ہے۔ یہ ضبطیاں ہوائی مسافروں سے ہیروئن کی متعدد ضبطی کے علاوہ ہیں۔ مزید بر آں اس مدت کے دوران 350 کلو سے زیادہ کوکین جس کی بین الاقوامی غیر قانونی مارکیٹ میں قیمت تقریباً 3,500 کروڑ روپے ہے، ڈی آر آئی نے ضبط کئے۔ اس میں اپریل 2021 میں توتیکورن بندرگاہ پر ایک کنٹینر سے 303 کلوگرام کوکین کی سب سے بڑی ضبطی بھی شامل ہے۔

دوسری جانب آئی سی جی نے گزشتہ 3 سالوں میں مختلف کارروائیوں میں تقریباً 3 ٹن منشیات برآمد کی ہیں جن کی مالیت تقریباً 6,200 کروڑ روپے ہے۔ آج تک منشیات کی کل برآمدات 12,206 کروڑ روپے تک پہنچ گئی ۔ قابل ذکر معاملات میں سری لنکا کی کشتی شینایا دووا اور روی ہانسی کو پکڑنا شامل ہے۔ دونوں کو منشیات اور اے کے-47 اور پستول  سمیت گرفتار کیا گیا۔ حال ہی میں دیگر پکڑی جانے والی کشتیوں میں ایرانی کشتی جمعہ، پاکستانی کشتی الحسینی اور الحج شامل ہیں۔

بین اقوامی منشیات کی اسمگلنگ نیٹ ورکس کے خلاف آئی سی جی اور ڈی آر آئی کی مشترکہ کارروائی سمندری راستوں سے ملک میں منشیات کی آمد کو روکنے میں کامیاب رہی ہے۔

*****

U.No:5589

ش ح۔رف۔س ا

(Release ID: 1827047) Visitor Counter : 145