বিষ্ণুপুরগী বিষ্ণু মন্দিরদা থৌরম অমা পাঙথোকপগা লোয়ননা মনিপুরদা এ.এস.আই.না ৱর্ল্দ হেরিতেজ দে পালন তৌখ্রে

ঙসি অয়ুক বিষ্ণুপুরদা লৈবা বিষ্ণু মন্দিরদা অচম্বা থৌরম অমা পাঙথোকপগা লোয়ননা মনিপুরদা আর্কিওলোজিকেল সর্ভে ওফ ইন্দিয়া (এ.এস.আই.)না ৱর্ল্দ হেরিতেজ দে পালন তৌখ্রে।

রাজ্য অসিদা এ.এস.আই.না ঙাকশেল্লিবা অমত্তা ঙাইরবা মোন্যুমেন্ত ওইরিবা, নৌনা শেম্লিবা লাইশঙ অসিদা রেলী, লাই য়েকপগী অথোই-অহেন তানবা অমসুং স্বচ্ছতাগী থবক-থৌরমশিং পাঙথোকখি। মনিপুর অসি এ.এস.আই.গী আইজোল সর্কলগী মনুংদা চল্লি।

বিষ্ণুগী বিষ্ণুপুরদা লৈবা লাইশঙ অসি মনিপুরগী খ্বাইদগী অরিবা চেক্না শাবা লাইশঙশিংগী মনুংদা অমনি। লাইশঙ অসি মনিপুরগী ইনীংথৌ কিয়াম্বাগী (সি.ই. ১৪৬৭-১৫০৮) মতমদা শারমখি। য়ুমলোন্নরিবা শান নীংথৌ (অপ্পর বর্মা)দগী বিষ্ণুগী মীতম অমা ফংলবা মতুংদা লাইশঙ অসি শাখি হায়না থাজনৈ।

এ.এস.আই.গী, আইজোল সর্কলগী সুপরিনতেন্দিং আর্কিওলোজিস্ত কে. রামকৃষ্ণ রেদ্দীগী মীৎয়েং মখাদা এ.এস.আই.না হন্দক্তা লাইশঙ অসি শেমজিন-শাজিনবা অমসুং তঙাই-ফদবা খুদোংচাবশিং ফংহন্নবগী থবক লোইশিনখি। লোইশিনবদা থা ৬ চংখিবা থবক অসিদা অকোইবদা শম্বল খাগৎপা, সোলর লাইৎনিং অমসুং লৈকোল শেমগৎপা অসিনচিংবা য়াওখি।

এ.এস.আই.না লৈবাক শিনবা থুংবদা লৈরিবা মখোয়গী মোন্যুমেন্তশিংদা থৌরমশিং পাঙথোক্তুনা নুমিৎ অসি পালন তৌরি। এ.এস.আই.না ঙাকশেনবা সাইৎশিং অমসুং মোন্যুমেন্তশিংদা ঙসি লেম্না চংবা য়াহনখি।

*****