ঙসি, ইম্ফালগী রাজ ভবন্দা পাংথোকপা থৌরম অমদা, এন. বিরেন সিংহনা থংন-থংনবা অনিশুবা তর্মগীদমক্তা মনিপুরগী মুখ্য মন্ত্রী ওইনা ৱাশক লৌখ্রে। শ্রী বিরেন্না রাজ্যগী রাজ্যপাল লা গনেসন অমসুং অতোপ্পা রাজনিতীগী লুচিংবশিং য়াওবা থৌরমদুদা অতোপ্পা লেজিস্লেচর মঙাগা লোয়ননা ৱাশক লৌখি।

কাউন্সিল ওফ মিনিস্তরগী মনুং চন্না ৱাশক লৌখিবা অতোপ্পা লেজিস্লেচর মঙা অদুদি শ্রী তি.ঐচ. বিস্বজীত, শ্রী ৱাই. খেমচান্দ, শ্রী গোবিন্দাস কোন্থৌজম, শ্রী নেমচা কিপগেন অমসুং শ্রী অৱাংবৌ ন্যুমাইনি।

ৱাশক লৌবগী থৌরম অদুদা বি.জে.পি.গী নেস্নেল প্রসিদেন্ত জে.পি. নদ্দা; বি.জে.পি. মনিপুরগী প্রসিদেন্ত, এ. শার্দা দেবী; সোসিএল জস্তিস অমসুং ইম্পাৱর্মেন্তকী কেন্দ্রগী রাজ্য মন্ত্রী, প্রতিমা ভুমিক; অসমগী মুখ্য মন্ত্রী, শ্রী হিমন্তা বিস্বা শর্মা; ত্রিপুরাগী মুখ্য মন্ত্রী, বিপ্লব কুমার দেব অমসুং নাগালেন্দগী উপ-মুখ্য মন্ত্রী, য়ান্থুংঙো পেত্তোনসু অতোপ্পা মীওইশিংগা লোয়ননা শরুক য়াখি।

শ্রী বিরেন্না হন্দক্তা পাংথোকখিবা ১২শুবা মনিপুর লেজিসলেতিব এসেমব্লীগী মীখলদা মায় পাক্তুনা হৈঙাং এসেমব্লী সীতপু রেকোর্দ ওইবা মঙারক শুবা ওইনা কনখিবনি। ইং ২০২২গী জেনেরেল ইলেক্সন অসিদা এসেমব্লী সীত ৬০ লৈবগী মনুংদা, মহাক্কী পার্তী, বি.জে.পি.না সীত ৩২ কাখিবনি।

*****

(रिलीज़ आईडी: 1807763) आगंतुक पटल : 137