দিবলপমেন্ত ওফ নোর্থ ইস্তর্ন রিজন (দি.ও.এন.ই.আর.), কলচর অমসুং তুরিজমগী কেন্দ্রগী মন্ত্রী শ্রী জি. কিশন রেদ্দীনা সেপ্তেম্বরগী ২৩ অমসুং ২৫গী মরক্তা নুমিৎ হুমনিগী ওইবা ওফিসিএল খোঙচৎতা অরুচল প্রদেশ অমসুং নাগালেন্দদা চৎখ্রে। নাগালেন্দা মহাক্কী খোঙচৎকী শরুক অমা ওইনা, কেন্দ্রগী মন্ত্রীনা নাগালেন্দদা চাউখৎ থৌরাংগী থবক কয়া অমা শঙ্গাখ্রে অমসুং হৌজিক চৎথরিবা চাউখৎ থৌরাং কয়াগী স্কীমশিং য়েংশিনখ্রে।

কেন্দ্রগী মন্ত্রী শ্রী জি. কিশন রেদ্দীনা মহাক্কী খোঙচৎ মনুংদা নাগালেন্দগী মুখ্য মন্ত্রী শ্রী নৈফুয়ু রিও অমসুং অতৈ অতোপ্পা  রাজ্য সরকারগী ওফিসিএলগা উনখি। মহাক্না ইনফ্রাস্ত্রকচর অমসুং তুরিজমগা মরী লৈনবা চাউখৎ থৌরাংগী প্রোজেক্ত কয়া অমগী মরমদা খন্ন-নৈনখি। মীফম অসিগী মতুংদা মহাক্না ত্বীত তৌরকখি “ঐখোয়না প্রধান মন্ত্রী শ্রী নরেন্দ্র মোদীগী মংলান অসি থুংহন্নবগীদমক অৱাং-নোংপোক্কী রাজ্য ৮গী চাউখৎ থৌরাংদা পুন্না থবক তৌমিন্নবা ঙাইদুনা লৈরি”।  

মন্ত্রীনা প্লানিং অমসুং কোওর্দিনেসন দিপার্তমেন্ত অমসুং স্কীম অসি হাপ্লিবা অতৈ দিপার্তমেন্তশিংগা রিভ্যু মিতিংঅমা পাংথোকখি।  মিতিং অদুদা মহাক্না হায়খি “ঐহাক্না মফম অসিদা নাগালেন্দ সরকারগী মকোক থোংবা ওফিসিএলশিংগা উননবগীদমক লাকপা অসি য়াম্না নুঙাইজৈ। হন্দক্তা, দি.ও.এন.ই.আর.গী মিনিস্ত্রীগা লোয়ননা এন.আই.তি.আই. আয়োগনা, ২০২০-২১ দিস্ত্রীক্তকী থাক্তা এস.দি.জি. ইন্দিয়া ইন্দেক্স ইসু তৌখি। ইন্দেক্স অসিনা ভারতকী রাজ্য য়ু.তি.গী সোসিএল, ইকোনোমিক অমসুং এনভাইরোনমেন্তেল সেক্তরগী চাউখৎ থৌরাংগী ফিভম ওল্লি। এস.দি.জি. ইন্দিয়া ২০২১ ইন্দেক্সতা রাজ্য ২৮গী মনুংদা নাগালেন্দনা ২১সুবা মফমদা লৈরি অমসুং মসিদা ফগৎহন্নবগী মিৎয়েং চিংশিনবা য়াবা মফম কয়া অমা লৈরি”। মখা তানা ৱা ঙাংলদুনা মহাক্না হায়খি “পান্দম খরা মদুদি “জেন্দর মান্ননা থম্বা”, “থবক নিংথিনা তৌবা অমসুং ইকোনোমী চাউখৎহনবা”, “লাইফ ওন লেন্দ” অসিনচিংবা অসি নাগালেন্দদা নিংথিনা পাংথোক্লি অমসুং ঐহাক্না থাজৈ মদুদি অতৈ পন্থুংশিং অসি ২০৩০গী পান্দমগী মমাংদা ফংবা ঙমগনি।  

কেন্দ্রগী মন্ত্রীনা মহাক্কী খোঙচৎ মনুংদা নাগালেন্দগী কোহিমাদা লৈবা স্তেত দাইরেক্তোরেৎ ওফ সোইল অমসুং ৱাতর কঞ্জার্বেসন্দা স্তেত সোইল তেস্তিং লেবোরেতরী শঙ্গাখি। প্রোজেক্ত অসি দি.ও.এন.ই.আর. মিনিস্ত্রীগী মখাদা ফন্দ তৌবনি অমসুং নাগালেন্দ সরকারবু মতেং পীবা অমসুং মখোয়গী লৌদা শেন্দোং লৈবা মহৈ-মরোং থাবদা মতেং পীনবনি। মহাক্না হায়খি “ঐহাক খুঙ্গংদগী হৌরকপনি অমসুং লৈহাওগী ওইবা তেক্নোলোজিকেল খেন্নবা লৈরিবগী মরুওইবা খঙই। মসিগী তেস্তিং লেবোরেতরী অসি অহানবা সিস্তেমনি অমসুং নাগালেন্দগী লৌউ-শিংউবগী কাংলুপ্তা কান্নবা ফংগনি হায়না ঐহোক্না থাজৈ”।

শ্রী কিশন রেদ্দীনা কোহিমাদা লৈবা কোহিমা ৱার সিমিত্রিদা পৃথিবীগী অনিশুবা লাঞ্জাও মনুং ১৯৪৪গী এপ্রিলদা থৱায় থাখিবা মথৌনা লৈরবা ভারতকী লান্মীশিংদা ইকাই খুম্নবা উৎখি। মসিগী লানগী সিমিত্রি অসি জাপানিজশিংগী মায়োক্তা লান্থেংনখিবা লান্মীশিংদা কৎপা নিংশিং খুবম্নি। মসিগী মথক্তা মহাক্না কোহিমাদা থায়নগী ওইবা খাংপোকশঙশিংদা কোইখি। অসিগুম্বা থায়নগী ওইবা খাংপোকশঙশিং অসি মপুং ওইনা মফম অসিগী উমংদা ফংবা পোৎলম্না শাবনি। হায়রিবা অসি অৱাং-নোংপোক্কী মফমশিংদা জুৱা হাবা ঙাকথোক্নবা অয়াংবা পোৎলম্না শাবনি। “ খাংপোকশঙশিং অসি হায়নিংঙাই লৈতনা ফজৈ অমসুং মফমসিগী ওইনা শাবনি অমসুং নাগালেন্দ সংস্কৃতী অমসুং হেরিতেজকী মমি তারি” হায়না মহাক্না ত্বীত্তরদা মখা তাখি।

মন্ত্রীনা নাগালেন্দগী দিমাপুরদা ত্রেনিং কম একজামিনেসন সেন্তরগী উরেপ-উয়ুংসু তমখি। শঙ্গাবা অসিদা মহাক্না হায়খি “সেন্তর অসি দি.ও.এন.ই.আর. মিনিস্ত্রীনা এন.ই.এস.আই.দি.এস.কী মখাদা লুপা কোতি ১৫.৫০গী শেনফম কাইথখি হায়না ঐঙোন্দা হায়খি। মসিগী ইন্সতিত্যুসন অসিনা ওজা অমসু মহৈরোই অনিমক মান্ননা কান্নবা ফংগনি অমসুং নোংমদি মসিনা অৱাং নোংপোক লমদম পুম্বদা তমজনিংঙাই ওইরক্কনি”। 

মন্ত্রীনা নাগালেন্দগী দিমাপুরদা সোবিমা খুঙ্গং অমসুং থাহেখু খুঙ্গং শম্নরিবা এন.ঐচ.-২৯গী লম্বী শেম্বা অমসুং পাকথোক্নবসু শঙ্গাখি।

***

(Release ID: 1758335) Visitor Counter : 189