অসামগী গুৱাহাতিদা পাংথোকখিবা থৌরম অমদা সেন্ত্রেল আর্ম পুলিস ফোর্সেসকী পর্সোনেল অমসুং দিপেন্দেন্তশিং অসিগীদমক কেন্দ্রগী গৃহ মন্ত্রী শ্রী অমিত শাহনা ঙসি ‘অয়ুশমান সি.এ.পি.এফ.’স্কিম পুথোকখ্রে৷ থৌরম অসিদা শ্রী অমিত শাহনা সি.এ.পি.এফ.শিংগী ওফিসর খরদা অমসুং পর্সোনেলশিং অসিদা এয়ুশমান সি.এ.পি.এফ. বেনিফিসরী ই-হেল্থ কার্দশিং পীখ্রে৷

থৌরম অসিদা শ্রী অমিত শাহনা ৱা ঙাংলদুনা লৈবাক অসিবু ঙাক শেল্লিবা ঐখোয়গী লান্মীশিং অসিগী য়াইফনবা অমসুং ঙাক শেন্নবা প্রধান মন্ত্রী শ্রী নরেন্দ্র মোদীনা হোৎনরি অমসুং ঐখোয়গী লান্মীশিং অয়ুশমান ওইহনবা অসিনা মোদী সরকার অসিগী খ্বাইদগী ইহান হান্নবা তৌদ্রবা য়াদ্রবা থবক ওইরি৷ নেতাজি সুবাশ চন্দ্র বোজকী ১২০ শুবা পোকপগী নুমিৎ অসিগা মরী লৈননা ঐখোয়না পরাক্রম দিৱস পাংথোক্লি৷ হৌজিক্তদগী হৌনা লৈবাক অসিনা জানুৱারী ২৩ অসি পরাক্রম দিৱস ওইনা পাংথোক্লগনি হায়না প্রধান মন্ত্রী শ্রী নরেন্দ্র মোদীনা ৱারেপখ্রে৷ অয়ুশমান সি.এ.পি.এফ. স্কিম অসি সি.এ.পি.এফ.কী থৌনা ফরবা জৱানশিং অমসুং মখোয়গী ইমুং মানুংশিং অসিগী হেল্থকেয়রগীদমক হৌদোক্লি হায়না মহাক্না ঙসি হায়খ্রে৷ হায়রিবা স্কিম অসি ঙসি হায়বা অফবা নুমিৎ অসিদা হৌদনা অতোপ্পা অফবা নুমিৎ অমফাও লাক্লরোই৷

সি.এ.পি.এফ. পর্সোনেলগী ইমুং মানুংগী হেল্থকেয়রগা মরী লৈনবা প্রোব্লেম অমা মোদী সরকার অসিনা মাই পাক্না লোইশিনখ্রে হায়না শ্রী অমিত শাহনা ফোংদোকখ্রে৷ লৈবাক অসিবু ঙাক শেল্লিবা অমসুং কৎথোক্লিবা মীওইশিং অসিগীদমক ঐখোয়সু মতম পুম্নমক্তা মখোয়বু মতেং পাংবা পাম্মী৷ হৌজিক্তি সি.এ.পি.এফ. পর্সোনেল অমসুং মখোয়গী ইমুং মানুংশিং অসিনা সিম্পল কার্দ স্বাইপ অমগী মতেংদা হোস্পিতাল ২৪,০০০দা লেম্না লাইয়েংবা য়াহল্লগনি৷ স্কিম অসি মে ১দগী মপুং ফানা চৎনবা হৌরগনি অমসুং অয়ুশমান শিল্দ অসি প্রধান মন্ত্রীনা হোৎনদুনা  মে ১ ফাওবগী মনুংদা মীপুং খুদিংমক্তা ফংহন্নবা ইফর্ত অমা শেম্লগনি হায়না শ্রী শাহনা ফোংদোকখ্রে৷

২০২০ চহী অসি মীওইবা জাতি অসিগী খ্বাইদগী চেলে়ঞ্জিং ওইখিবা চহী অমা ওইখি হায়না কেন্দ্রগী গৃহ মন্ত্রীনা ফোংদোরকখ্রে৷ মালেম পুম্নমক অসিগা  লোইননা ভারতনা ক্রাইসিস অসি থেংনখ্রে৷ ঙল্লিঙৈ মতমদা ৱাহং কয়ামরোম হংলকখি অদুবু শ্রী নরেন্দ্র মোদীগী লুচিং মখাদা খোঙথাং খরা লৌখৎখিবা অসিদগী লৈবাক অসিনা কোরোনা লাইনা-লাইচৎ অসি থেংন্নবা শেম শাদুনা লৈখ্রে অমসুং ঙসিদি ভারততা লৈরিবা কোরোনা লাইনা-লাইচৎকী ফিভম অসি অতোপ্পা চাওখৎলবা লৈবাকশিং অসিগা য়েংনবদা অসুক্কী মতিক ফনা লৈরে৷

মোদী সরকার অসিনা নেস্নেল দিফেন্স য়ুনিভর্সিতী অমসুং নেস্নেল ফোরেন্সিক সাইন্স য়ুনিভর্সিতী শেমগৎ শাগৎপা য়াওনা তোঙান তোহানবা রিফোর্মশিং হৌদোকখ্রে হায়না শ্রী অমিত শাহনা ফোংদোকখ্রে৷ মসিনা মহৈরোইশিংনা সেক্যুরিতীগী ফিল্দদা মখোয়গী কেরিয়র শেম্বা পীম্বশিংদা মতেং পাংলগনি৷ হায়রিবা য়ুনিভর্সিতী অনি অসিদা এফিলিয়েত তৌবা কোলেজশিুং হাংদোক্নবা অসামগী মুখ্য মন্ত্রী অমসুং রাজ্য অসিগী শেল-থুমগী মন্ত্রী অসিদা শ্রী শাহনা হংখ্রে৷

হোম এফিয়র্সকী রাজ্যগী মন্ত্রী শ্রী নিত্যঅনন্দ রাই, অসামগী মুখ্য মন্ত্রী শ্রী সর্বানন্দ সোনোৱাল, অসামগী শেল-থুম অমসুং হকশেলগী মন্ত্রী হিমন্তা বিস্বাস শর্ম, কেন্দ্রগী হোম সেক্রেতরী শ্রী অজে কুমার ভল্লা, সি.আর.পি.এফ.কী দাইরেক্তর জেনেরেল শ্রী এ.পি. মাহেশ্বরি, নেস্নেল হেল্থ ওথোরিতী সি.ই.ও. দা. ইন্দু ভুসন অমসুং সি.এ.পি.এফ.শিংগী অমসুং কেন্দ্র সরকারগী সেনিয়র ওফিসরশিং অসিনা থৌরম অসিদা শরুক য়াখি৷

*****