విదేశాలకు చెందిన బంగారు కడ్డీలను తగిన పత్రాలేవీ లేకుండా ఇండిగో విమానం ద్వారా హైదరాబాద్‌ నుంచి ముంబై, జైపూర్‌ నగరాలకు దొంగచాటుగా తరలిస్తున్నట్లు నిఘా వర్గాల నుంచి హైదరాబాద్‌ కస్టమ్స్‌ విభాగం అధికారులకు విశ్వసనీయ సమాచారం అందింది. ఈ మేరకు 3.10.2020 తెల్లవారుజామున కస్టమ్స్‌ అధికారులు షంషాబాద్‌లోని దేశీయ విమాన సరుకు రవాణా ప్రాంగణంలో అనుమానాస్పద సరుకుల పెట్టెలను చట్ట ప్రకారం నిశితంగా తనిఖీ చేశారు.

   ఈ సందర్భంగా కొన్ని సరుకుల పెట్టెలలో వివిధ రకాల బంగారు ఆభరణాలు, విదేశీ బంగారు కడ్డీలు, 999 స్వచ్ఛతగల వెండికడ్డీలు, సానబెట్టిన వజ్రాలు, విలువైన/పాక్షిక విలువగల రాళ్లు, స్టెయిన్‌లెస్ స్టీల్ వాచీలు, ప్లాటినం చెవిదుద్దులు, పురాతన నాణేలను వారు కనుగొన్నారు. వీటన్నిటినీ చట్టపరమైన పత్రాలేవీ లేకుండా రవాణా చేస్తున్నట్లు తనిఖీలో నిర్ధారణ అయింది. దీంతో కస్టమ్స్ చట్టం-1962, కేంద్ర వస్తుసేవల పన్ను చట్టం (సీజీఎస్టీ)-2017 నిబంధనల ప్రకారం మొత్తం సరుకులను అధికారులు స్వాధీనం చేసుకున్నారు. వీటిలో బంగారు కడ్డీలు 2.37 కిలోలు కాగా, బంగారు ఆభరణాలు 5.63 కిలోలున్నాయి. కాగా, స్వాధీనం చేసుకున్న సరుకుల విలువ ₹6,62,46,387గా అధికారులు నిర్ధారించారు. ఈ అక్రమ రవాణా కేసుపై అధికారులు తదుపరి దర్యాప్తు ప్రారంభించారు.

***

(Release ID: 1661662) Visitor Counter : 26