পেত্রোলিয়ম অমসুং নেচরেল গ্যাস অমসুং স্তীলগী মন্ত্রী শ্রী ধরমেন্দ্র প্রধান্না ওইল অমসুং গ্যাস সেক্তরগী চংগদবা স্তীলশিং লমদমসিদা ফংবা স্তীল শীজিন্ননবা অমসুং মপান্দগী পুশিনলকপশিংদা তাংজবা হন্থনবা পুক্নিং চিংশিনখ্রে। 'আত্মনির্ভর ভারতঃ ওইল অমসুং গ্যাস সেক্তরদা লমদম অসিগী স্তীল শীজিন্নবদা পুক্নিং থৌগৎপা' হায়বা ৱেবিনার অসিদা ঙসি ৱা ঙাংলদুনা মহাক্না হায়খি মদুদি, স্তীল অমসুং ওইল অমসুং গ্যাসকী সেক্তর অনী অসি য়াম্না নক্নবা মরী লৈনৈ, অমসুং হায়রিবসি অনৌবা মাইয়োন অমদা পুরকপগী মতম ওইরে। 

প্রধান মন্ত্রী শ্রী নরেন্দ্র মোদীনা আত্মনির্ভর ভারত অমগী খোলাউ লাউখিবদুবু পল্লদুনা, শ্রী প্রধান্না হায়খি মদুদি, আত্মনির্ভর ভারত অসি পোৎচৈ পুথোকপগী সেক্তরদা মপাঙ্গল কনখৎলবা, মরোমদোম লেপচবা ঙম্লবা অদুবু মালেমগী শেন্মিৎলোন্দা পুনবা ঙম্লবা মপাঙ্গল কল্লবা ভারত অমনি। শেমগৎ-শাগৎলিবা, থাউ অমসুং গ্যাস, ওতোমোবিলশিং, মছিনরী সেক্তরশিং অসিগা ভারতকী স্তীলগী সেক্তরগা অচেৎপা মরী অমা শাগৎপা হায়বসি ভারতকী আত্মনির্ভর ভারত ফংনবগী মংলিবা মংলান অসি মংফাওননবা হোৎনবদা অচৌবা থৌদাং লৌরিবনি। মহাক্না হায়খি মদুদি, ভারতকী স্তীলগী সেক্তরনা মালেমগী থাক্তা অচৌবা থৌদাং লৌবা ঙমগনি, অদুবু মসি লমদম অসিগী তঙাইফদবশিং পীবা ঙম্লবা কান্দা খক ওইগনি। " সপ্লাই চেন্দা লমদম অসিগী ওন্থোক্নবা হোৎনবদা মমল ৱাংখৎলক্তনবা লমদম অসিগী থৌদাং লৌরিবশিংনা চোংথোক্লক্কদবনি"।

থাউ অমসুং গ্যাসকী সেক্তরদা, মন্ত্রীনা হায় মদুদি, অচৌবা ইনভেস্তমেন্তকী পোলিসীশিংদা হৌখিবা চহী তরুক্লোমসিদা অচৌবা অহোংবা অমা পুরকখ্রে। সেক্তর অসি অদুক্কী মতীক চাউখৎলক্লি, রিফাইনরীবু ওইরো, পাইপ্লাইন, গ্যাস তর্মিনেল, স্তোরেজ কেপাসিতী, গ্যাস সিলিন্দর, রিতেল আউৎলেৎ, অমসুং হায়রিবা পুম্নমকসি স্তীল অদুক্কী মতীক য়াম্না চংই। থাউ অমসুং গ্যাস সেক্তর অসি স্তীলগী পাইপ অমসুং ত্যুব শীজিন্নবদা পাইপ্লাইন্না পেত্রোলিয়ম, থাউ অমসুং লুব্রিকান্তশিং পুথোক-পুশিন তৌবগী লম্বী ওইবনা খ্বাইদগী য়াম্না শীজিন্নৈ। শহরগী গ্যাস য়েন্থোকপগী নেৎৱার্ক মীয়াম ৭০%দা য়ৌহন্নবা পাকথোক-চাউথোকহনবা, রিফাইনিং কেপাসিতী ওগমেন্তেসন, সি.এন.জি. স্তেসন ১০,০০০ লিংনবা হোৎনবা, ই. এন্দ পি.গী থবক-থৌরমশিং- হায়রিবা পুম্নমক অসিনা স্তীল দিমান্দ শোইদনা তৌরক্কনি।

থাউ অমসুং গ্যাস সেক্তরদা লৈরিবা পুম্নমক্তা মপান্দগী পুশিল্লকপা স্তীলগী মহুত্তা লমদম অসিদা পুথোকপা স্তীল লৈনবা পুক্নিং চিংশিল্লদুনা শ্রী প্রধান্না হায়খি মদুদি লমদম অসিগী স্তীল পুথোক্লিবশিং অসিদা সেক্তর অসিনা তুংদা চঙগদবা স্তীল পীবা ঙম্বগী পাঙ্গল লৈরে। লমদম অসিদা লৈরিবা স্তীলগী দিমান্দ অসি পীবা ঙম্বা অমসুং মপান্দগী পুশিল্লকপদা তাংজবা হন্থবা হায়বসিনা সেক্তর অসিদা থবক মশীং হেন্না পীবা ঙমগনি অমসুং স্তীলগা মরী লৈনবা এম.এস.এম.ই.শিংদা চাউখৎনবা হোৎনবদা মতেং পাংগনি অমসুং মখোয়বু ভেল্যু লৈবা পোত্থোক হেন্না পুথোক্নবা পুক্নিং থৌগৎপীগনি।

থৌরম অদুদা ৱা ঙাংলদুনা রজ্যগী স্তীলগী মন্ত্রী শ্রী ফগন সিংহ কুলাস্তেনা হায়খি, স্তীল অমসুং থাউ অমসুং গ্যাসকী সেক্তর অসি ভারতকী শেন্মিৎলোনগী য়ুম্বীশিংনি অমসুং ভারতনা দোল্লর ৫ ত্রল্লিয়ন ইকোনোমীগী মাইকৈ তম্না চঙশিন্নবা হোৎনবদা অচৌবা থৌদাং লৈ। মহাক্না ইন্দস্ত্রী অসিদা লমদম অসিদা ফংবা পোত্থোকশিং লৌখৎপীনবা অমসুং লৈবাক অসিগী চাউখৎলোন্দা মতেং পাংনবা পুক্নিং চিংশিনখি।

ৱেবিনার অদু পেত্রোলিয়ম অমসুং নেচরেল গ্যাসকী মন্ত্রালয়গী সেক্ত্রেতরী শ্রী তরুন কাপুর, স্তীলগী সেক্রেতরী শ্রী প্রদিপ ত্রিপাথি, তোঙান-তোঙানবা পি.এস.য়ু.শিংগী সি.এম.দি.শিং, স্তীল অমসুং পেত্রোলিয়ম অমসুং নেচরেল গ্যাস মন্ত্রালয়গী মকোক থোংবা ওফিসরশিং, এফ.আই.সি.সি.আই.গী লোইশঙ পায়রিবশিং অমসুং অতোপ্পা স্তেকহোল্দরশিং (কঞ্জ্যুমর অমসুং প্রদ্যুসরশিং) শরুক য়াখি। ৱেবিনার অদু স্তীলগী মন্ত্রালয়না এফ.আই.সি.সি.আই.গা খুৎশম্নরগা পাঙত্থোকখিবনি।

*****